Aizaaya 21 - EBƆRƐ BE KAWƆL

Babilɔn be ketɔr be asheŋ

¹ Kubɔya nɛ k wɔtɔ a laŋɛ Babilɔn be efuli so be kaplɛa so na nde. Kananɛ kawuliwuli bee koso kiyi to a choŋ na nɛ kumulubi gboŋgboŋi nɛ k bee bar kemur na beeŋ shi efuli nɛ kumo be asheŋ kɔ kufugboŋ na so m ba.

² Ŋ ku bɔrɛdare n wu asheŋ ko nɛ a bee bar awurfoŋ basa so. Amo e la kedebɔr abar nɛ kemur abar be asheŋ. Kaŋɛ Elam be efuli nɛ Mediya be efuli so be benapo fanɛ b kre kena m ba kulti Babilɔn be efuli so be ndegboŋana n wɔtɔ ŋ kɔ bumo kena! Ŋkpal manɛ so, Enyɛnpe Ebɔrɛ na bɔ ntaŋ fanɛ e beeŋ shin nɛ awurfoŋ nɛ Babilɔnebi bee shin nɛ efuli pɔtɛana so be basa bee ji na e ba ekar.

³ Kusɔ nɛ n daŋ wu nseŋ nu bɔrɛdare na to na shin nna nɛ kufugboŋ ko nɛ ebesa fanɛ kakurge be ebesa luri ma to.

⁴ Ndoŋ nna nɛ ma nfɛra wul ma to nɛ kufu pɛ ma ga nɛ mee chicha. N daa yɛlga fanɛ kaaseso e fo manaŋ nna nɛ ma eyur e wushi ma, ama kaaseso ka fo nɛ kusɔ nɛ k chɔ loŋ naŋ tu ma.

⁵ N daŋ wu bɔrɛdare na to nna fanɛ benapo be benimuana na ka wora kejigboŋ a ji ashi Babilɔn be kadegboŋ na to. Jemanɛ nɛ baa ji nsaa nu na, nɛ esa ko ponte epul to ŋ kaŋɛ le: “Benimu, men koso! Ekama e ta mbe kebɛlso be kusɔ kuŋkumuso.”

⁶ Ndoŋ nna nɛ Enyɛnpe Ebɔrɛ na kaŋɛ ma le: “Shin nɛ esa ko e ya yili menyi be kadegboŋ na be egbal so a keni ekpa to nsaa kute kusɔ kama nɛ e wu k kaa bee ba.

⁷ E kaŋ wu basa ka dii egbaŋɛ m bɛ abar so kenyɔ nyɔ, nɛ beko dii ekurma nɛ enyɔma m bɛ so a ba, e dara bumo ŋ keni nɛnɛ nseŋ kaŋɛ kadeebi nɛ b bela ase.”

⁸ Ndoŋ nna nɛ esa nɛ e yil egbal na so a keni na kaŋɛ le: “Kapa nɛ kanyɛ kikɛ nɛ n yili nfe a dara a keni, ama m maŋ wu shɛŋ ka bee ba.”

⁹ K maŋ chɛr ko nɛ esoji nɛ b dii egbaŋɛ m bɛ abar so kenyɔ nyɔ fara a ba. Epul na to nɛ ekenipo na ponte awɔrso n sa baru nɛ egbaŋɛ diipo na bar ŋ kaŋɛ le: “Babilɔn be basa kɔ n tɔr! Agbirana nɛ b daa shuŋ na bure kuraa m pesaŋ to a dese kasawule.”

¹⁰ Ndoŋ nna nɛ ma, Aizaaya kaŋɛ le: “Ma basa, Israɛlebi, men ji awurfoŋ fanɛ kananɛ baa bri adurbi kegoro so na, ama n teŋ kaŋɛ menyi baru lela nɛ n nu ashi Enyɛnpetale, Israɛl be Ebɔrɛ na kutɔ.” Edɔm be kaplɛa so be kubɔya be asheŋ

¹¹ Kubɔya nɛ k wɔtɔ a laŋɛ efuli nɛ baa tre Edɔm na be kaplɛa so nde. Esa ko yili Edɔm be efuli so nna n tre ma m bishi le: “Ekenipo, saŋɛ mo nɛ kare beeŋ chɛ nɛ kaboŋ e fuli to?”

¹² Ndoŋ nna nɛ ŋ kaŋɛ mo: “K maaŋ chɛr nɛ kare e chɛ, ama kanyɛ kraa beeŋ naŋ biri. Nɛ fo kraa sha kenaŋ pin to n ti so, kumo ere fo naŋ bɛta m ba bishi to.”

Areebia be kaplɛa so be kubɔya be asheŋ

¹³ Kubɔya nɛ k bee yɔ efuli nɛ baa tre Areebia na be basa kutɔ nde. Menyi basa nɛ men wɔ kebonfu nɛ baa tre Dedan nɛ menyi be eyawujipoana bee dii enyɔma a ji yawu nsaa yuu bumo be ewajɛbu ashi Areebia be efuli so be kiyi to na,

¹⁴ daga fanɛ men sa basa nɛ achukoŋ kɔ nɛ b ba menyi kutɔ na nchu nɛ b nuu. Menyi alɛ nɛ men wɔ kasawule nɛ baa tre Tɛma na, e sa basa nɛ b shile kena m ba menyi be efuli so, nɛ akoŋ kɔ bumo na ajibi.

¹⁵ B la basa nɛ baa shile a mɔlga bumo be amu nna ashi bumo doŋana nɛ b ta etokobi nɛ atanyembi a ju a buu bumo so a fin kemɔ bumo na kutɔ nna.

¹⁶ Kumo be kaman nɛ Enyɛnpe Ebɔrɛ na kaŋɛ ma le: “Ta a ba fanɛ kafɛ be jemanɛ to gbagba, eyiri yiri nɛ b shi Areebia be kebonfu nɛ baa tre Kɛda na be kemaŋkura kikɛ beeŋ ba ekar, fanɛ kananɛ paawura be kushuŋ bee loge a ba ekar na.

¹⁷ Bumo to be benapo nɛ baa ta ata a kɔ kena na e la basa nɛ b kɔ kenyɛn, ama bumo to be gbrɛbi e naaŋ ka a wɔ Kɛda be kebonfu to ndoŋ. Ma, Enyɛnpe Israɛl be Ebɔrɛ na e kaŋɛ na.”