Aizaaya 18 - EBƆRƐ BE KAWƆL

Ebɔrɛ ka beeŋ gberge Itiopia kusoe be asheŋ

¹ Efuli ko dese Itiopia be elɔrana be kaba ndoŋ nɛ baa tre kumo Ijipt, nɛ asɔ firgisobi shi ga ndoŋ nɛ esa beeŋ tiŋ n nu amo be kefergi be egbri.

² Ijipt bee shuŋi mbɔ nna nɛ baa ta nchu so be ekuloŋ nɛ b ta agasa n lɔŋɛ a nite lɔrgboŋ nɛ baa tre Nail na so, fanɛ b nya manaŋ n yɔ Itiopia nɛ kumo be basa wɔ nteŋ nɛ bumo be kayurwule du mɔlmɔlbi na. Elɔr shibi nna ashi Itiopia ebi ere be kasawule so nɛ b kɔ eleŋ nseŋ lubi ga nɛ ekama bee ŋana bumo ashi durnya kikɛ to.

³ Esa kama nɛ e wɔ durnya ere to, e nu nfe! Tɔɔnɛ be tuta ko beeŋ baa wɔ abee be awɔlto nɛ men wu kumo nseŋ nu kabel be kushu!

⁴ Kumo be kaman nɛ Enyɛnpe Ebɔrɛ na kaŋɛ ma le: “Meeŋ baa wɔ ma pe ashi ebɔrɛso nsaa keni kaseto boeŋ fanɛ kapiidi be epeŋi ŋko awɔlpa nɛ a bee lar kasɔteŋi be jemanɛ ketarso na.

⁵ Pɔɛŋ nɛ atoto beeŋ wora ŋ ki asɔrso na, Ebɔrɛ beeŋ shin nɛ a chuge n tɔr saŋɛ nɛ a bel na nseŋ shin nɛ ndibi sɔrso na be ayabiana na malɛ e buri n tɔr to.

⁶ Itiopia be esoji na beeŋ ki keji n sa kebee so be ejita kechali so nsaa ki keji n sa kupuŋ to be asɔbɔya malɛ ketarso.”

⁷ Itiopia be basa ere la basa tenteŋ nɛ bumo be kayurwule du mɔlmɔlbi nna. Ekama bee ŋana bumo durnya ere to nna, ŋkpal b ka kɔ eleŋ ga nseŋ lubi so. Ama loŋ be jemanɛ kaŋ fo, baaŋ shi bumo be kasawule nɛ elɔr shibi kumo so na so n ta esarga m ba sa Enyɛnpetale Ebɔrɛ nɛ baa shuŋ mo ashi Zayɔn be kebee so na.