Aizaaya 17 - EBƆRƐ BE KAWƆL

Ebɔrɛ ka beeŋ gberge Siriya nɛ Israɛl kusoe be asheŋ

¹ Kusɔ nɛ Enyɛnpe Ebɔrɛ na kaŋɛ a laŋɛ kadegboŋ nɛ baa tre Damaskɔs na be kaplɛa so nde. E yɛ: “Damaskɔs beeŋ ki kadegboŋ nɛ k bure a dese fanɛ b ka koli asɔ bureso n deŋi abar so na.

² Siriya be efuli so be ndegboŋ beeŋ ki nde nɛ ekama shile ka amo nɛ a dese fuloŋ. A beeŋ ki mbolpɔ nɛ ana be ejikpa nɛ esa kikɛ maaŋ baa ju amo a lar ndoŋ.

³ Israɛl beeŋ paŋ kumo be ndegboŋana nɛ b pɔr egbal lempoana a kuŋ amo na nɛ Damaskɔs be kuwurgboŋ na malɛ e mur. Siriya be basa kama nɛ baaŋ ji efute na beeŋ ji anishinyɔr fanɛ Israɛl be basa. Ma, Enyɛnpetale Ebɔrɛ na e kaŋɛ.”

⁴ Kumo be kaman nɛ Enyɛnpe Ebɔrɛ na naŋ kaŋɛ le: “Kachako bee ba nɛ Israɛl be kemaŋkura nɛ keshi e ba ekar nɛ kumo be damawuraana e ki betirpo nseŋ nyɔr ŋ ki awibi nawule.

⁵ Israɛl beeŋ ki fanɛ kudɔsawule nɛ b dɔ ayu n teŋi kumo so ashi ketaŋɛ nɛ baa tre Refaebi na to na.

⁶ Basa gbrɛbi ko e naŋ ji efute nɛ Israɛl e ki fanɛ ɔlif be kedibi nɛ b chuge kumo so be asɔrso kikɛ nseŋ ka anyɔ ŋko asa ko ashi kumo be awɔlto ŋko asɔrso gbrɛbi ko ashi kumo be kaseto be ayabi so na. Ma, Enyɛnpe, Israɛl be Ebɔrɛ na e kaŋɛ na.”

⁷ Loŋ be kachɛ na kaŋ fo, basa beeŋ bɛta n yɔ bumo be etopo nɛ e la Israɛl be Ebɔrɛ cheembi na kutɔ n ya fin kechɛto.

⁸ B maaŋ naŋ ta bumo be yirda n deŋi agbirsure nɛ bumo gbagba pɔr na ŋko ndibi tenteŋ nɛ b yuu kakpa nɛ baa shuŋ kegbir cheso nɛ baa tre Ashira na, nsaa chɔɔ eduwu agbirsure so ndoŋ na so.

⁹ Loŋ be kachɛ na kaŋ fo, baaŋ shile ŋ ka ndegboŋ nɛ b daa kuŋ nɛnɛ na nɛ a ki alambure a dese fanɛ ndegboŋ nɛ Hivi nɛ Amɔ be basa daŋ shile ŋ ka jemanɛ nɛ Israɛl be basa daa kɔ bumo kena nɛ baa shile a mɔlga bumo be amu na.

¹⁰ Menyi Israɛlebi teŋ Ebɔrɛ nɛ e bee mɔlga menyi nsaa kuŋ menyi fanɛ kefalta gboŋ na so nna. Men dɔ atoto be adɔbi nna a shuŋ agbirana amo to.

¹¹ Ama nɛ aduuso na kɔr n daŋ nseŋ purge kachɛ nɛ men duu amo na kikɛ gba, men kraa maaŋ teŋi shɛŋ amo so, ama etɔrɔ nɛ ebesa nɛ a maaŋ ku nɛ menyeeŋ nya.

Ebɔrɛ ka beeŋ kɔ n sa mbe basa be asheŋ

¹² Efuliana nɛ a kɔ eleŋ ga na du fanɛ atiligboŋ nɛ a bee koso teku so a wora awɔrgboŋ na nna.

¹³ Ama nɛ efuli lempoana bee ba eleŋso fanɛ atiligboŋ gba, Enyɛnpe Ebɔrɛ na beeŋ ponte bumo so nɛ b bɛta fanɛ kalabɛr ka koso kebee ase ŋko kewabi nɛ kawuliwuli ta a yɔ na.

¹⁴ Baa kɔ kenishipereso nna a ta kufu a pɛ basa kaaseso, ama ta a ba kachipurso nɛ b mur nsaa maŋ naa wɔtɔ. Kusɔ nɛ k bee tu bekama nɛ baa ta eleŋsheŋ a kɔ a suge anyi be asɔ nna na.