Aizaaya 16 - EBƆRƐ BE KAWƆL

Etɔrɔ damta ka beeŋ naŋ ba Mowab so be asheŋ

¹ Mowab be basa nɛ b wɔ kiyi to be kadegboŋ nɛ baa tre Sela na ta mbolpɔ fɔlbi n shuŋi n ya sa Jerusalɛm be ewura nna.

² Mowab be beche nɛ baa dii lɔr nɛ baa tre Aanɔn na du fanɛ mbuibi nɛ b jija bumo be asha to nna.

³ Le nɛ Mowab be mbɔ na daŋ kaŋɛ Juda be basa na: “Men baa ŋini anyi kusɔ nɛ anyeeŋ baa wora. Men baa kuŋ anyi fanɛ kedibi be kiyoyul kapiidi, nseŋ shin nɛ an chena menyi be kayul to n wushi. An la basa nɛ b shile kena nna a mɔlga anyi be amu. Men ta anyi ŋ ŋana kakpa nɛ esa kikɛ maaŋ wu anyi.

⁴ Men shin nɛ an chena menyi be kasawule so nɛ men baa kuŋ anyi ashi basa nɛ baa sha kemur anyi na kutɔ.” Mowabebi, men doŋana nɛ b maa wu kuwɔr nsaa kɔrfɛ menyi na maaŋ naa wɔtɔ. B maaŋ naaŋ kɔ menyi m mur menyi be efuli.

⁵ Kumo be kaman, Deevid be kaman to ebi to be eko beeŋ ba ki ewura nseŋ ta kashenteŋji nɛ kasha a keni basa so. E beeŋ nya manaŋ n wora kusɔ nɛ k daga nseŋ keni so n ji asheŋ nɛ amo be ekpa so.

⁶ Ndoŋ nna nɛ Juda be basa na kaŋɛ: “An nu fanɛ Mowab be basa bee wu bumo be amu nna. An nyi fanɛ b la basa nɛ b kpeŋ nsaa keni basa jiga nna, ama mpuchi fuloŋ nɛ b kɔ.”

⁷ Mowab be basa ere beeŋ shu anishichubi ŋkpal bumo be etɔrɔ nɛ a beeŋ tu bumo so. B kaŋ nyiŋi ajibi nɛ b daa ji ashi kadegboŋ nɛ baa tre Kir Hɛrɛs na, baaŋ shu anishichubi nɛ k wora bumo fanɛ tama kikɛ loge a laŋɛ bumo be kaplɛa so.

⁸ Bumo be adɔ nɛ a mata Hɛshbɔn na nɛ ewaindibi be adɔana nɛ a wɔ Sibma na mur. Loŋ be adɔana na to be afeelebi be asɔrso nɛ b daa ta a wora yabra a sa efuli na so be bewura nɛ baa nu. Jemanɛ ko afeelebi na daŋ salga to loŋ hale n ya fo kadegboŋ nɛ baa tre Jaza, nɛ keshishɛrsawule so ashi epeŋilarkpa be kaba so, nɛ Teku Wuso na be kaba ndoŋ ashi epeŋitɔrkpa be kaba so nna.

⁹ Naniere kananɛ mee shu anishichubi a sa Sibma be afeelebi na nɛ mee shu a sa Jaza gba peya. Ma anishichubi wurge nna ŋkpal shɛŋ ka maŋ naa wɔtɔ nɛ Hɛshbɔn nɛ Eliale be ndeana to ebi e teŋi nɛ bumo be ŋgbene fuli bumo so.

¹⁰ Esa kama b kagbene maŋ fuli ŋkpal nsawule na ka maŋ naa wora adɔjibi ga na so. Esa kikɛ maa boŋ nshɛ ashi waindibi be adɔana to. Ekama maŋ naa nya afeelebi be asɔrso nɛ baa tre greeps na a wora nsa. Esa kama maŋ naa nu kagbenefuliso be awɔr gba kuraa.

¹¹ Ebesa bee ji ma nna ashi ma kagbene to nɛ mee shu a sa Mowab nɛ Kir Hɛrɛs.

¹² Mowab be basa bee gben jiga nna a yɔ bumo be agbir to ashi abee so nɛ agbirlambuana to n ya ka shuŋ amo. Tɔnɔ kikɛ maaŋ lar kumo to.

¹³ Enyɛnpe Ebɔrɛ na teŋ bɔ le be kubɔya ere a laŋɛ Mowab be kaplɛa so.

¹⁴ Ama naniere le nɛ Enyɛnpe Ebɔrɛ naaŋ laŋɛ a kaŋɛ: “Ta a ba nfɛ asa be jemanɛ to gbagba Mowab be kedama damta nɛ kumo be basa na kikɛ beeŋ mur. Basa gbrɛbi ko e naŋ ji efute ashi kumo be basa damta na kikɛ to, bumo alɛ maaŋ baa kɔ eleŋ nɛ b tiŋ n chɛ bumo be amu to.”