Aizaaya 15 - EBƆRƐ BE KAWƆL

Ebɔrɛ ka beeŋ mur Mowab be asheŋ

¹ Kubɔya nɛ k wɔtɔ a laŋɛ efuli nɛ baa tre Mowab na be kaplɛa so nde. Kanyɛ koŋwule nɛ ndegboŋ nɛ baa tre Ar nɛ Kir na mur nɛ kakpa wora shruum ashi Mowab be kasawule so, ŋkpal shɛŋ ka maŋ naa wɔ kumo so so.

² Ndoŋ nna nɛ basa nɛ b wɔ kade nɛ baa tre Dibɔn na dii n yɔ kegbir ase ashi kebee so n ya shu ndoŋ. Mowab be basa daŋ shu kagbenejijaso nna ŋkpal ndegboŋ nɛ baa tre Nɛbo nɛ Mɛdiba na so. B daŋ she bumo be amu nɛ ntɔl kagbenejijaso gba nna.

³ Basa nɛ b daa nite agbembi so na daŋ buu nli be asɔbuuso a ŋini bumo be ŋgbenejija nna, nɛ beko malɛ daa wɔ achoŋi nɛ alɔnɛ so a shu.

⁴ Basa nɛ b wɔ nde nɛ baa tre Hɛshbɔn nɛ Ɛliale na daa shu awɔrso nna, nɛ esa wɔ kakpa wɔfɔ fanɛ Jahaz gba e daa nu bumo be kushu na. Bumo be esoji gba be kenyɛn kikɛ daŋ lar bumo to nna nɛ baa chicha kufuso.

⁵ Mee shu ma kagbene to nna a sa Mowabebi na ŋkpal b kaa shile a yɔ nde nɛ baa tre Zowa nɛ Ɛglaf Shelishiya na so. Bumo be beko dii m bɔla ekpa nɛ k bee yɔ kade nɛ baa tre Luhif na nna a shu a yɔ, nɛ beko malɛ ŋana n ta kagbenejija a shu awɔrso a shile a yɔ kade nɛ baa tre Hɔronaim na.

⁶ Mbombi nɛ a wɔ kakpa nɛ baa tre Nimrim na wɔlto nna nɛ ndoŋ be afitiri kikɛ wɔl. Kefitiri bumbuŋ kikɛ maŋ naa wɔ eboŋkarana na.

⁷ Basa na daa wora ania nɛ b tiŋ n ta bumo be asɔ ŋ ŋana n dii ketaŋɛ na nna.

⁸ Kagbenejija so be kushu baaŋ sɔ Mowab be kasawule kikɛ so nna nɛ esa beeŋ tiŋ n nu bumo be kushu ashi nde nɛ baa tre Eglaim nɛ Beerilim na to.

⁹ Lɔr nɛ k wɔ kade nɛ baa tre Dibɔn na be nchu kikɛ kilgi ŋ ki ŋklaŋ nna. Ebɔrɛ malɛ kraa kɔ kusɔ nɛ k chɔ loŋ nɛ e wora basa nɛ b wɔ ndoŋ nna. Kashenteŋto, luwu kraa wɔtɔ a jo basa kama nɛ b ka a wɔ Mowab be efuli so na.