Aizaaya 14 - EBƆRƐ BE KAWƆL

Enyɛnpe Ebɔrɛ na be basa ka beeŋ bɛta m ba epe be asheŋ

¹ Enyɛnpe Ebɔrɛ na beeŋ naaŋ wu mbe basa Israɛlebi nɛ e lara n sa mbe kumu na kuwɔr. E beeŋ shin nɛ b bɛta bumo m ba bumo gbagba be kasawule so, nɛ befɔ e tu bumo n chena ndoŋ fanɛ bumo alɛ gba ka la Israɛlebi na.

² Efuli pɔtɛana so be basa beeŋ chɛ Israɛl be basa to nɛ b bɛta n yɔ kasawule nɛ Enyɛnpe Ebɔrɛ na sa bumo na so. Efuli pɔtɛ ebi na beeŋ ya kaa shuŋ Israɛlebi na fanɛ anya, nɛ Israɛlebi na e naa ji kuwura basa nɛ b daa kɔrfɛ bumo na so.

Babilɔn be ewura ka beeŋ wu be asheŋ

³ Enyɛnpe Ebɔrɛ na beeŋ sɔ Israɛl be basa na n yige ashi ebesa nɛ awurfoŋ nɛ kenyaya to.

⁴ E kaŋ wora loŋ n loge nɛ bumo alɛ e wora Babilɔn be efuli so be ewura eyur to nseŋ kaŋɛ le: “Ewura nyaŋnyaŋso na e tɔr na! E maaŋ naŋ tiŋ ŋ kɔrfɛ esa kikɛ!”

^5-6 Enyɛnpe Ebɔrɛ na shin nɛ bewura lubiana nɛ baa nya agbo ga a kɔrfɛ basa nsaa tɔrɔ efuliana nɛ b kɔ m pɔɔ so na be eleŋgboŋana fo ekar.

⁷ Naniere durnya na kikɛ nya ewushi nɛ kayurwushi, nɛ ekama bee boŋ nshɛ kagbene fuli so.

⁸ Ndibi kpakpaso fanɛ seprɛs nɛ Lebanɔn be efuli so be ndibi nɛ baa tre sida na, e ji eyur ŋkpal Babilɔn be ewura ka tɔr nɛ esa kama maŋ naa wɔtɔ nɛ e naa ku amo a lɛ na so.

⁹ Bumo nɛ b wɔ bubuni to wora shiriya nna a jo nɛ b keta Babilɔn be efuli so be ewura kefɔ. Bewura dra nɛ b ji eleŋ ga durnya to na ka nu mbe keba bumo kutɔ ashi bubuni to na be asheŋ, bumo be ŋgbene fuli nna.

¹⁰ E kaŋ ba bumo kutɔ baaŋ kaŋɛ mo le: “Naniere fo alɛ gba pɔ fanɛ anyi! Fo ki anyi to be eko nna na!

¹¹ Ejaŋjilaŋ nɛ b daa ta a boŋ nshɛ a maŋkura fo, ama naniere fo e ba bubuni to na. Ashushombi e ki fanɛ fo kusɔ dese so nɛ echɔnchɔŋ malɛ ki fanɛ keta m buu fo so na.”

¹² Fo Babilɔn be efuli so be ewura nɛ fo du fanɛ kachipurso be kechɛkpabi na, shi ebɔrɛso n tɔr to kasawule so! Jemanɛ nɛ k choŋ na fo daŋ kɔ m pɔɔ efuliana so nna, ama naniere fo alɛ gba nɛ b kɔ m pɔɔ so na.

¹³ Fo daŋ kre fo kagbene to nna fanɛ feeŋ dii n yɔ ebɔrɛso n ya baŋ achɛkpabi nɛ a wɔ awɔlto so na n ya chena ndoŋ a ji kuwura. Fo daa fɛ fanɛ feeŋ chena fanɛ ewura nna ashi kebee nɛ k wɔ kelargato be esoso be kakpa nɛ baa shɛr na.

¹⁴ Fo yɛ feeŋ dii n yɔ awɔlpa be awɔlto n ya ki fanɛ Enyɛnpetale Ebɔrɛ na.

¹⁵ Ama b gbelge fo n yɔ durnya be kaseto ashi bubuni to.

¹⁶ Bubuni nɛ baaŋ wu fo na beeŋ pɛ nnɔ ŋ keta a keni fo, nseŋ bishi le: “Kanyɛn nɛ e gbuŋgbuŋ durnya nseŋ shin nɛ bewurgboŋana bee chicha kufuso na nde a?

¹⁷ Kanyɛn nɛ e mur ndegboŋ nseŋ shin nɛ durnya ki fanɛ kiyitokpaŋ na nde a? Mo e daŋ kini keshin nɛ basa nɛ b pɛ kena to na e nya ekpa n yɔ bumo peana na a?”

¹⁸ Durnya to be bewura kikɛ baaŋ wu baa pɔr bubuni be ebu ko nna a ta bumo a wɔtɔ to,

¹⁹ ama fo ere maŋ kɔ loŋ be ebu ere. B ta fo kebuni nna n lɛ nɛ k dese m bɛ. Esoji e wu kena to n deŋi fo kebuni so nɛ b ta fo nɛ bumo kikɛ n wɔtɔ kefalta be kemaŋ to nseŋ gbare eshishɛr n deŋi so n chichi so.

²⁰ Fo ka shin nɛ efuli pɔtɛana ba mɔ fo basa nseŋ mur fo efuli so, b maaŋ puli fo fanɛ kananɛ baa puli bewuraana na. Fo kanaŋ lubi ere to be esa kama maaŋ ji efute a wɔ ŋkpa to.

²¹ Anyeeŋ teŋ fo mbinyɛnsobi so ŋkpal bumo nananyɛnana be alubi so. Bumo be ekama maaŋ ji kuwura ŋko m pɔr ndegboŋ durnya be kaplɛkama.

Ebɔrɛ ka beeŋ mur Babilɔn be asheŋ

²² Ade kikɛ be kaman, nɛ Enyɛnpetale Ebɔrɛ na naŋ kaŋɛ le: “Meeŋ kɔ Babilɔn be efuli so be basa nseŋ mur esa kama nɛ e wɔ ndoŋ, nɛ basa maaŋ naŋ nyiŋi bumo be asheŋ kikɛ.

²³ Meeŋ shin nɛ Babilɔn be efuli e ki ketaŋɛsawule a pete nchu nɛ egbuŋgbula e baa wɔ ndoŋ. Meeŋ lara kumo be basa ashi kumo so fanɛ b ka ta pese n fuge bumo na. Ma, Enyɛnpetale Ebɔrɛ na e kaŋɛ na.”

Ebɔrɛ ka beeŋ mur Asiriya be basa be asheŋ

²⁴ Kumo be kaman nɛ Enyɛnpetale Ebɔrɛ na bɔ ntaŋ ŋ kaŋɛ le: “Kusɔ nɛ n yili ma kagbene to fanɛ meeŋ wora na gbagba nɛ meeŋ wora.

²⁵ Meeŋ mur Asiriya be efuli so be basa ashi ma kasawule nɛ k la Israɛl be fuli na so nseŋ chichi bumo so ashi ma abee so. Ma alɛ beeŋ mɔlga ma basa ashi bumo be etɔrɔ kikɛ nɛ bumo be kebaala Asiriyaebi be anya to.

²⁶ Ŋkre nɛ ŋ kɔ n sa durnya to ebi nna na. Ma alɛ kraa shin nɛ ŋ gberge efuliana na kusoe nna.”

²⁷ Enyɛnpetale Ebɔrɛ na e yili kumo mbe kagbene to fanɛ e beeŋ wora ade kikɛ. Esa kikɛ malɛ maaŋ tiŋ ŋ kuŋ mo ekpa fanɛ e sa maŋ wora amo.

Ebɔrɛ ka beeŋ mur Filisti be basa be asheŋ

²⁸ Kafɛ nɛ Ewura Ahaz wu na nɛ kubɔya ere shi Enyɛnpe Ebɔrɛ na kutɔ m ba:

²⁹ Filistiebi, men sa maŋ shin nɛ menyi be ŋgbene e fuli menyi ŋkpal kekpabi nɛ k bee gberge menyi kusoe na ka bu to so. Kekpabi butoso na beeŋ ki fanɛ kuwɔ lubi. Kumo be kaman nɛ k ki kusɔ gbeyeso nɛ k du fanɛ laŋchaŋ nɛ k kɔ mbuibi be aba a firgi na.

³⁰ Enyɛnpe Ebɔrɛ na beeŋ baa keni betirpo nɛ b wɔ mbe basa Israɛlebi to so fanɛ kananɛ mbolpɔkpapo bee keni mbe mbolpɔ so na. E beeŋ shin nɛ b baa wɔtɔ nɛ shɛŋ maaŋ naa tɔrɔ bumo. Ama mo alɛ beeŋ shin nɛ akoŋgboŋ e tɔr menyi Filistiebi so nɛ menyi be ekama maaŋ pete.

³¹ Menyi nɛ men wɔ Filisti be ndegboŋ to na e boŋ to n shu n fin kechɛto! Men kikɛ e baa chicha kufuso! Ŋkpal manɛ so, kalabɛr gboŋgboŋi nɛ k du fanɛ kuwɔlpa shi kelargato be esoso a ba. K yili n sa benapo nɛ efupo kikɛ maŋ wɔ bumo to nna.

³² Nɛ fanɛ kabɔ ko shi Filisti be efuli so m ba menyi kutɔ, a daga fanɛ men kaŋɛ mo le: “Enyɛnpe Ebɔrɛ na e pɔr Zayɔn, nɛ mbe basa to be etirpo gba e nya a wɔ ndoŋ nɛ shɛŋ maaŋ tɔrɔ mo.”