Aizaaya 13 - EBƆRƐ BE KAWƆL

Ebɔrɛ ka beeŋ gberge Babilɔn kusoe be asheŋ

¹ Kubɔya nɛ Aizaaya nɛ e la Amɔz pibinyɛn na nya ashi Ebɔrɛ kutɔ a laŋɛ Babilɔn be kadegboŋ be kaplɛa so na nde.

² E yɛ, Aizaaya, yili kepreŋ nɛ shɛŋ maŋ wɔ kumo so na be awɔlto m maŋ kena be tuta so! Ponte ŋ kaŋɛ esoji na fanɛ b kre kena. Pla bumo enɔ fanɛ b kɔ n nya n luri mbunagboŋ lempo na to n ya kɔ Babilɔn be kadegboŋ na.

³ N tre ma benapo lempoana nɛ b yirda bumo be amu n lar nɛ b ya kɔ kena ŋ gberge basa nɛ n nya agbo n wɔtɔ na kusoe.

⁴ Men kaŋ asoe n nu, awɔr ka bee gbri abee so fanɛ jimaŋ damta na! K du fanɛ efuliana nɛ kuwurgboŋana e naa gama abar so! Enyɛnpetale Ebɔrɛ na e naa gama benapo abar so nɛ b kɔ kena.

⁵ B shi efuli wɔfɔ wɔfɔ nɛ a wɔ durnya be lalaloge to nna a ba. Enyɛnpe Ebɔrɛ na malɛ e kaa kagbene n ta mbe akɔsɔ a ba nɛ e ba mur Babilɔn be efuli kikɛ.

⁶ Men baa boŋ to a shu awɔrso! Ŋkpal manɛ so, Enyɛnpe Ebɔrɛ na be demuji be kachɛ na taga to. K la kachɛ nɛ Enyɛnpetale Ebɔrɛ na beeŋ shin nɛ basa e mur nna.

^7-8 Kufugboŋ beeŋ tɔr basa kikɛ so nɛ bumo be mbre e yulge bumo nɛ bumo be kenyɛn kikɛ e foe. Nɛ ebesagboŋ e tɔr ekama so fanɛ kakurge be ebesa ka tɔr eche nɛ e bee kurge so na. Anishinyɔr beeŋ pɛ bumo nɛ b kurgi amu n yuu to a maaŋ naŋ tiŋ ŋ keni abar be anishito.

⁹ Loŋ be kachɛ na kaŋ fo, Enyɛnpe Ebɔrɛ na maaŋ shu esa kikɛ so ŋko n wu esa kuwɔr. E beeŋ nya agbo ga nseŋ mur alubiworapoana n shin nɛ efuli na kikɛ e ki kiyitokpaŋ.

¹⁰ Kefulto maaŋ naa wɔtɔ, ŋkpal manɛ so achɛkpabi nɛ a wɔ esoso na kikɛ beeŋ fulto ŋ gben nɛ epeŋi e pete nseŋ biri to nɛ kufɔl malɛ gba e fuli to ŋ gben.

¹¹ Ade be kaman nɛ Enyɛnpe Ebɔrɛ naŋ kaŋɛ le: “Meeŋ gberge efuli lubi ere nɛ kumo to be basa kusoe ŋkpal bumo be alubi so. Ma alɛ beeŋ bar ekama nɛ e bee maŋ mbe kumu so kaseto nseŋ gberge ekama nɛ e bee fɛ fanɛ e shi ga nsaa ŋini to, a kute a wɔtɔ basa ebesa to na kusoe.

¹² Loŋ be jemanɛ na basa gbrɛbi fimbi e naŋ ji efute. Kewu esa kenishiso beeŋ ba kaa du kpakpa a chɔ kewu shuwa.

¹³ Kachɛ nɛ ma, Enyɛnpetale Ebɔrɛ na beeŋ ŋini kananɛ ma agbo du na, meeŋ shin nɛ esoso e baga to nɛ kasawule e gbuŋgbuŋ m pulgi ashi kumo be epul to.

¹⁴ Kumo be kaman nɛ befɔ nɛ b wɔ Babilɔn be kadegboŋ to na e shile n yɔ bumo peana be nsawule so, n ya pesaŋ to n sɔ kaplɛkama fanɛ echibir ka wu ekpampo nsaa shile na ŋko fanɛ mbolpɔ nɛ a maŋ kɔ ekpapo na.

¹⁵ Bekama malɛ nɛ baaŋ pɛ na, baaŋ da bumo etokobi m mɔ.

¹⁶ Basa beeŋ baa yil a keni nɛ bedoŋ a pɛ bumo be mbia n ta bumo ŋ ŋmɛa afalta so m mɔ nseŋ luri bumo be elaŋana to n ta bumo be asɔ eleŋ so nseŋ pur bumo be beche gba n ti so.”

¹⁷ Ade be kaman nɛ Enyɛnpe Ebɔrɛ na naŋ kaŋɛ le: “Meeŋ we n wɔtɔ efuli nɛ baa tre Mɛdi na be basa nɛ b koso m ba kɔ Babilɔn be efuli so be basa kena. Bumo ere be shɛŋ maŋ wɔ shuwa nɛ gbiti to.

¹⁸ Bumo be ata nɛ atanyembi nɛ baaŋ ta m mɔ mbrantiɛfɔlbi. B maaŋ wu mbi popɔrbi kuwɔr ŋko n shu mbiwurbi so.

¹⁹ Babilɔn be kadegboŋ na e walɛ nsaa kɔ eleŋ a chɔ kadegboŋ kama. Kumo be basa bee puchi kumo so nna, ama ma, Enyɛnpe Ebɔrɛ na beeŋ mur kumo fanɛ kananɛ m mur ndegboŋ nɛ b daa tre Sodɔm nɛ Gomɔra na!

²⁰ Esa kama maaŋ naa wɔ Babilɔn be kadegboŋ na to. Asɔbɔya belapo nɛ b maŋ kɔ epul na gba maaŋ naŋ yuu bumo be ewajɛbu ndoŋ. Mbolpɔkpapo gba maaŋ naŋ kpa bumo be mbolpɔ n yɔ ndoŋ nɛ b ya dese n wushi.

²¹ Kadegboŋ na beeŋ ki kakpa nɛ kiyi to be asɔbɔya beeŋ baa wɔ, nɛ egbuŋgbula nɛ mbuibi be yiri yiri e tɔ asha ndoŋ. Kupuŋ to be asɔbɔya be yiri yiri beeŋ baa wɔ ndoŋ nɛ echibir e baa tɛ to a pɛl kumo to.

²² Ekuntuŋ nɛ ejiŋkaamu beeŋ baa nite kadegboŋ na be ebu jeŋgreŋana nɛ a kɔ eleŋ ga na nɛ bewura be elambu nɛ a walɛ ga na to a shu. Ŋkpal manɛ so, Babilɔn be kemur be jemanɛ na fo.”