Aizaaya 11 - EBƆRƐ BE KAWƆL

Kuwurgboŋ nɛ k kɔ kayurwushi na be asheŋ

¹ Kananɛ keyimu bee purge afantaŋ popɔr nɛ a bee daŋ a ki kedibi na, aloŋ nɛ esa ko beeŋ shi ewura Deevid be kanaŋ to m ba ki ewura kachako so.

² Enyɛnpe Ebɔrɛ na be kiyoyu e naŋ sa mo kanyiasheŋ nɛ kashennyi nɛ kasheŋwora be kenyi nɛ e ta n ji kuwura mbe basa so nɛnɛ. E beeŋ baa nyi Enyɛnpe Ebɔrɛ na be aparsheŋ nsaa bunyaŋ mo.

³ Kusɔ nɛ k beeŋ baa fuli mo kagbene ga e naaŋ baa la kewora Enyɛnpe Ebɔrɛ na kasonu. Ewura ere maaŋ baa keni kananɛ esa du so, ŋko a yili b yɛ b yɛ so a ji demu.

⁴ Kashenteŋ be ekpa so nɛ e beeŋ baa ji betirpo demu nsaa kɔ a kuŋ bumo nɛ b maaŋ tiŋ n wora shɛŋ n sa bumo be amu na. Kusɔ nɛ e beeŋ kaŋɛ kenishipereso na beeŋ ki mbra ashi efuli na kikɛ so; nɛ basa lubi malɛ e nya luwu be kasogberge.

⁵ Kashenteŋji nɛ keji asheŋ nɛ amo be ekpa so nɛ e beeŋ ta n ji kuwura mbe basa so.

⁶ Ekuntuŋ nɛ mbolpɔ beeŋ baa wɔ abar so kayurwushi so, nɛ ekarmɛ nɛ mboe fɔlbi e baa tu abar a dese. Anabi nɛ ebuluŋ be bibi beeŋ baa gama abar so a ji, nɛ mbiwurbi e baa keni bumo so nsaa kpa bumo a yɔ a ba.

⁷ Eshishiri beeŋ baa tu abar a ji, nɛ bumo be bibi e baa tu abar a dese kayurwushiso. Saŋɛ na so nɛ ebuluŋ e baa ji afitiri fanɛ ana.

⁸ Mbiwurbi beeŋ baa pɛl ashi awɔ be amaŋ ase nɛ a maaŋ duŋ bumo. Baaŋ ta bumo be enɔana n wɔtɔ awɔ lubi be amaŋ to nɛ awɔ na maaŋ wora bumo shɛŋ.

⁹ Kusɔ lubi kikɛ maaŋ naa wɔ Ebɔrɛ be kebee cheembi nɛ baa tre Zayɔn na so. Kananɛ nchu bɔlɔ teku to na, aloŋ nɛ basa nɛ b nyi nsaa bunyaŋ Enyɛnpe Ebɔrɛ na gba beeŋ baa kaa shi kasawule na so.

Ebɔrɛ be basa ka beeŋ bɛta m ba epe be asheŋ

¹⁰ Jemanɛ ko bee ba nɛ ewura popɔr nɛ e beeŋ shi ewura Deevid be kuwurji be kabuna na e baa la tɔɔnɛ n sa efuliana na. Baaŋ baa gama abar so mbe kuwurade to nsaa sa mo bunyaŋ.

¹¹ Loŋ be kachɛ na kaŋ fo, Enyɛnpe Ebɔrɛ na beeŋ naŋ bɔla mbe eleŋgboŋ so m bɛta mbe basa nɛ b ka a wɔ efuliana nɛ baa tre Asiriya nɛ Ijipt nɛ Patrɔs nɛ Itiopia nɛ Ilam nɛ Babilɔn nɛ Hamaf nɛ teku ase be nsawule nɛ kepla so na m ba.

¹² Enyɛnpe Ebɔrɛ na beeŋ maŋ tɔɔnɛ be tuta so ŋ ŋini efuliana na fanɛ e naa bɛta Israɛl nɛ Juda be basa nɛ b daŋ pesaŋ to a wɔ durnya be kaplɛkama na nna a ba.

¹³ Israɛl be kuwurji maaŋ naa kɔ Juda be kuwurji kukɔrkɔ. Juda malɛ maaŋ naa la Israɛl mo doŋ.

¹⁴ Baaŋ chɛ abar to ŋ kɔ Filistiebi nɛ b wɔ epeŋitɔrkpa na nseŋ suge basa nɛ b wɔ epeŋilarkpa na be asɔ eleŋso. Bumo alɛ beeŋ kɔ m pɔɔ Edɔm nɛ Mowab be basa so, nseŋ shin nɛ Ammɔn be basa e wora bumo kasonu.

¹⁵ Kumo be kaman nɛ Enyɛnpe Ebɔrɛ na e shin nɛ Teku Peper na be keyabi nɛ k mata Ijipt na e wɔlto nseŋ shin nɛ afu tushiso e ba shin nɛ lɔrgboŋ nɛ baa tre Yufreetes na gba e wɔlto ŋ ka mbombi wurbi ashunu nawule. Saŋɛ na so ekama beeŋ tiŋ n nite m bɔla kumo to n choŋ.

¹⁶ Ekpagboŋ lela beeŋ dese n shi Asiriya be efuli so n sa mbe basa Israɛlebi nɛ b ji efute nseŋ ka a wɔ ndoŋ na nɛ b bɔla so, fanɛ kananɛ ekpa lela daa dese n sa bumo nanaana jemanɛ nɛ b daŋ lar Ijipt be efuli so na.