3 Jɔn 1 - EBƆRƐ BE KAWƆL

¹ Kawɔl ere shi ma nɛ baa tre Enimu na kutɔ nna a yɔ n teri kpakpaso Gayes nɛ mee sha kashenteŋto ga na kutɔ.

² N teri shaso, ma kabɔrɛkule nɛ ŋ kɔ a kule a sa fo e la fanɛ Ebɔrɛ e shin nɛ kusɔ kama e baŋ nyalɛ n sa fo nɛ fo baa kɔ eyur be alenfia fanɛ kananɛ fo kɔ eleŋ fo kiyoyu to na.

³ Bekurgepo ko ka ba kaŋɛ ma kananɛ fo kɔ kagbene koŋwule a bɛ kashenteŋ be keŋini na so nɛ kananɛ fo baa wɔ kashenteŋ na be kebaawɔtɔ to, ma kagbene fuli ma ga.

⁴ Shɛŋ shɛŋ maa fuli ma kagbene a chɔ kebaanu fanɛ ma mbia wɔ kashenteŋ na be kebaawɔtɔ na to.

Gayes ka nya kechɔrɔ be asheŋ

⁵ N teri shaso, kananɛ fo ta kagbene koŋwule a wora ashuŋ a sa bekurgepoana na ŋkeshin nɛ b la befɔ gba nna na, esa beeŋ tiŋ n fute n yige fo so.

⁶ B ba ji fo kasha be asheŋ asɔri ere to nfe. Jande chɛ bumo to nɛ b naŋ nya bumo be enite na to be ekpa a yɔ fanɛ kananɛ asheŋ daga Ebɔrɛ be anishito.

⁷ Ŋkpal manɛ so, Kristo be ketre na so nɛ b lar a wɔ bumo be enite na to a maa sɔ shɛŋ ashi bumo nɛ b maŋ yirda Yesu na kutɔ.

⁸ Amoso, loŋ be basa e daga fanɛ anyi alɛ e baa chɛ bumo to, saŋɛ na so anyi nɛ bumo beeŋ baa chɛ abar to kashenteŋ be keŋini be kushuŋ na to.

Dayɔtrefis nɛ Demitrias be asheŋ

⁹ N sibɛ kusɔ ko n shoŋi asɔriebi na, ama Dayɔtrefis nɛ e baa sha kejuŋkpar ga ashi bumo to na maa sha kenu n sa anyi.

¹⁰ Amoso, ŋ kaŋ ba, meeŋ lara asheŋ nɛ e bee wora na kikɛ efuli. Meeŋ malga mbe mmalga lubi nɛ e kɔ a na a ji ma asheŋ na kikɛ. Ade malɛ be buushi, mo gbagba kini kesɔ bekurgepoana na, mo alɛ nsaa maa sa bumo nɛ baa sha kechɛ bumo to na ekpa nseŋ naa wɔtɔ a ju loŋ be basa na ashi asɔri to.

¹¹ N teri shaso, sa maa kute asheŋ lubi to, baa kute asheŋ lela to. Esa kama nɛ e bee wora alela la Ebɔrɛ peya nna, ama ekama nɛ e bee wora alubi maŋ naŋ wu Ebɔrɛ.

¹² Demitrias bre, ekama bee malga mbe kebaawɔtɔ lela be asheŋ nɛ loŋ be kebaawɔtɔ na malɛ nɛ kashenteŋ be keŋini na maa lar abar kaman. Anyi alɛ gba bee ji mbe kebaawɔtɔ lela be shɛda nɛ fo alɛ nyi anyi be shɛda ka la kashenteŋ.

Lalaloge be kechɔrɔ be asheŋ

¹³ Ŋ kraa kɔ asɔ damta nɛ ŋ kaŋɛ menyi, ama m maa sha kesibɛ amo kawɔl to.

¹⁴ Ŋ kɔ tama fanɛ k maaŋ chɛr nɛ n wu fo, saŋɛ na so anyeeŋ chena m malga abar kutɔ.

¹⁵ Ebɔrɛ e sa menyi kagbenewushi. Fo teriana na kikɛ bee chɔrɔ fo. Chɔrɔ an teriana na kikɛ kukoko to n sa ma.