2 Samuɛl 9 - EBƆRƐ BE KAWƆL

Deevid nɛ Mifiboshɛf be asheŋ

¹ Kachako nɛ Deevid bishi le: “Esa ko kraa wɔ Sɔɔl be kanaŋ ere to nɛ meeŋ tiŋ n wora mo kelela ŋkpal Jonatan so a?”

² Ndoŋ nna nɛ b shuŋi n tre kayɛrbi ko nɛ e shi Sɔɔl be kanaŋ to nɛ baa tre mo Ziba m ba Deevid kutɔ. E ka ba nɛ ewura Deevid bishi mo le: “Fo e la Ziba na a?” Ndoŋ nna nɛ e kaŋɛ “Mm, n nyɛnpe, fo e wɔ ma.”

³ Nɛ ewura Deevid naŋ bishi mo le: “Sɔɔl be kanaŋ ere to be esa ko kraa wɔ ŋkpa to a? Nɛ kanaŋ na be esa ko kraa wɔtɔ, kumo ere meeŋ ba sha kewora mo kelela ŋkpal Ebɔrɛ be kasha so.” Nɛ Ziba kaŋɛ le: “Jonatan kraa kɔ ebinyɛn koŋwule ko, ama mo alɛ la bobi nna.”

⁴ Nɛ ewura Deevid naŋ bishi le: “Nnɛ nɛ e wɔ?” Nɛ Ziba yɛ: “E wɔ Lodiba ashi Ammiɛl pibinyɛn Makiir be laŋ to.”

⁵ Ndoŋ nna nɛ Ewura Deevid shuŋi n tre mo.

⁶ Jonatan pibinyɛn Mifiboshɛf nɛ e la Sɔɔl mo nanabi na ka ba nɛ e ba gbir m bunyaŋ Deevid. Nɛ Deevid kaŋɛ le: “Mifiboshɛf!” Nɛ mo alɛ shuli so ŋ kaŋɛ: “Fo e wɔ ma, n nyɛnpe.”

⁷ Ndoŋ nna Deevid kaŋɛ mo: “Sa maa lɔ kufu. Ŋkpal fo tuto Jonatan so maaŋ tiŋ n yige kewora fo kelela. Meeŋ ta kasawule nɛ k la fo nananyɛn Sɔɔl peya na kikɛ n laŋɛ n sa fo. Ma laŋ to malɛ nɛ feeŋ baa ji saŋkikɛ.”

⁸ Nɛ Mifiboshɛf jɔŋɛ bunyaŋ so ŋ kaŋɛ le: “N nyɛnpe, manɛ nna nɛ fee wora ma alɛ le kelela? Ma kujɔnɔmu fuloŋ ere!”

⁹ Nɛ ewura Deevid naŋ tre Sɔɔl be kayɛrbi Ziba nseŋ kaŋɛ mo le: “Mee ta kusɔ kama nɛ k la Sɔɔl nɛ mbe kanaŋ kikɛ peya nna a sa fo nyɛnpe mo nanabi Mifiboshɛf.

¹⁰ Amoso fo nɛ fo mbinyɛnsobi kuduanu nɛ fo nyɛrbi adunyɔ na beeŋ baa dɔ Sɔɔl be kanaŋ to ebi be adɔsawule a sa fo nyɛnpe Mifiboshɛf. Saŋɛ na so Sɔɔl be kanaŋ to ebi beeŋ baa nya kusɔ jiso. Ama Mifiboshɛf bre, ma kutɔ nɛ e beeŋ baa ji saŋkikɛ.”

¹¹ Nɛ Ziba kaŋɛ le: “N nyɛnpe, meeŋ wora kusɔ kama nɛ fo kaŋɛ ma.” Amoso Mifiboshɛf nɛ ewura Deevid e daa bɔɔ enɔ a ji fanɛ mo gbagba pibinyɛn na.

¹² Mifiboshɛf malɛ daa kɔ kebinyɛnsobi ko nɛ baa tre mo Mika. Ziba nɛ mbe kanaŋ kikɛ daŋ ki Mifiboshɛf be nyɛrbi nna.

¹³ Ama Mifiboshɛf nɛ e la bobi na bre daa wɔ Jerusalɛm nna nɛ mo nɛ ewura na bee bɔɔ enɔ a ji saŋkikɛ.