2 Samuɛl 8 - EBƆRƐ BE KAWƆL

Deevid ka kɔ m pɔɔ so be asheŋ

¹ Jemanɛ ko nɛ ewura Deevid naŋ laŋɛ n ya kɔ Filistiebi na m pɔɔ bumo so, amoso b daa maŋ naa kɔ eleŋ Israɛl be kasawule so kikɛ.

² Deevid gba daŋ kɔ m pɔɔ Mowabebi na so nna nseŋ daŋ shin nɛ bumo be benapo na dese kasawule nɛ e mɔ bumo be basa asa to kikɛ be benyɔ. Mowabebi na daa shuŋ mo nna nsaa ka lampo a sa mo.

³ Ndoŋ nna nɛ ewura Deevid lar a yɔ Yufreetes be Lɔr na ase nɛ e ya ŋini fanɛ ndoŋ la mo peya nna. E ka bee yɔ na, nɛ e ya tu Zoba be ewura nɛ baa tre Hadadeza nɛ mo tuto la Rehob na ŋ kɔ kena m pɔɔ mo so.

⁴ Kena na to nɛ Deevid pɛ bumo be egbaŋɛdiipoana kagboŋ nɛ alfa shunu nɛ benapo nɛ b na aya so ŋgboŋ adunyɔ. E daŋ pɛ bumo nɛ baa dii egbaŋɛturko na gba nna nseŋ tuge egbaŋɛ na be achin n yige bumo to be kalfa nawule.

⁵ Siriyaebi nɛ b shi Damaskɔs na daŋ shuŋi benapo nna fanɛ b ya chɛ Zoba be ewura Hadadeza to ŋ kɔ kena, nɛ Deevid mɔ bumo be basa ŋgboŋ adunyɔ nɛ anyɔ kikɛ.

⁶ Deevid daŋ yige mbe benapo na be beko nna ashi Damaskɔs, nɛ Siriyaebi na sɔ Deevid fanɛ bumo be ewura nsaa ka lampo a sa mo. Kaplɛkama nɛ ewura Deevid daŋ baŋ yɔ Enyɛnpe Ebɔrɛ daa shin nna nɛ e bee kɔ a pɔɔ so.

⁷ Deevid daŋ sɔ shuwa be asɔ kuŋso nɛ a la Hadadeza be nyɛrbi peya na nna n yɔ Jerusalɛm.

⁸ E daŋ naŋ sɔ danyaŋ be abɛlso damta ashi Bɛta nɛ Bɛrotai be nde nɛ Hadadeza daa ji kuwura amo so na nna.

⁹ Hamaf be kade to be ewura Toi ka nu fanɛ Deevid kɔ m pɔɔ Hadadeza be benapo kikɛ so na,

¹⁰ nɛ e shuŋi mo pibinyɛn Joram fanɛ e ya chɔrɔ ewura Deevid nseŋ sa mo ansaŋ nɛ kushuŋ, ŋkpal e ka kɔ m pɔɔ ewura Hadadeza, nɛ ewura Toi kɔ mo kena alɛ damta a maŋ tiŋ m pɔɔ mo so na so. Joram daŋ ta shuwa nɛ gbiti nɛ danyaŋ be abɛlso nna m ba sa Deevid.

¹¹ Ndoŋ nna nɛ ewura Deevid ta asɔ na nɛ shuwa nɛ gbiti nɛ e ya kɔ efuliana na m pɔɔ so n sɔ na m bɔɔ Ebɔrɛ enɔ fanɛ b baa ta amo a shuŋ mo.

¹² Efuliana na e la Edɔm nɛ Mowab nɛ Ammɔn nɛ Filistia nɛ Amalɛk. E daŋ ta asɔ nɛ e suge Zoba be ewura Hadadeza kutɔ na gba nna n ti so m bɔɔ Ebɔrɛ enɔ.

¹³ Deevid ka ya mɔ Edɔmebi be basa ŋgboŋ kuduaburwa ashi Nfɔl be ketaŋɛ na to nseŋ bɛta m ba na, nɛ mbe ketre dii ga n ti so.

¹⁴ Deevid daŋ yige mbe benapo ko ashi Edɔm be efuli so nna, nɛ ndoŋebi bee shuŋ mo. Kaplɛkama malɛ nɛ Deevid baaŋ yɔ, Enyɛnpe Ebɔrɛ na bee chɛ mo to nna nɛ e bee kɔ a pɔɔ so.

¹⁵ Saŋɛ nɛ Deevid daa la Israɛl be efuli so kikɛ be ewura na, e daa ji asheŋ nɛ amo be ekpa so nna nsaa wora asheŋ nɛ a niŋi.

¹⁶ Zeruwa pibinyɛn Jɔab e daa la benapo na be enimu, nɛ Ahilud malɛ pibinyɛn Jehoshafat daa la esa nɛ e bee sibɛ asheŋ a nase kawɔl to.

¹⁷ Ahitub pibinyɛn Zadɔk, nɛ Abiata pibinyɛn Ahimɛlɛk e daa la bɔrɛmatapo nimusoana, Sɛraya malɛ e daa la esibɛpo.

¹⁸ Jehowada pibinyɛn Bɛnaya e daa la esa nɛ e bee kuŋ ewura Deevid. Ewura Deevid malɛ be mbinyɛnsobi e daa la mbe asoetojipoana.