2 Samuɛl 7 - EBƆRƐ BE KAWƆL

Ebɔrɛ ka nase kɔnɔ n sa Deevid be asheŋ

¹ Ade kikɛ be kaman nɛ ewura Deevid ya chena mbe laŋ to, nɛ Enyɛnpe Ebɔrɛ shin nɛ kayurwushi ba mbe efuli so kikɛ.

² Ndoŋ nna nɛ ewura Deevid kaŋɛ anebi Neetan le: “Keni! Ndibi nɛ baa tre sida na nɛ b ta m pɔr ma laŋ ere, ama Ebɔrɛ be ŋkre be deka na bre wɔ wajɛbu to nna!”

³ Nɛ Neetan shuli so ŋ kaŋɛ le: “Kusɔ kama nɛ fee fɛ fanɛ feeŋ wora, fo wora, ŋkpal manɛ so, Enyɛnpe Ebɔrɛ na wɔ fo kutɔ.”

⁴ Kumo be kanyɛso nɛ Enyɛnpe Ebɔrɛ kaŋɛ Neetan le:

⁵ “Ya kaŋɛ ma kayɛrbi Deevid fanɛ ma, Enyɛnpe Ebɔrɛ e naa kaŋɛ mo na fanɛ mannɛ mo nɛ mee sha fanɛ e pɔr bɔrɛlambu n sa ma nɛ m baa wɔtɔ.

⁶ Baŋ yili jemanɛ so nɛ n lara Israɛlebi ashi Ijiptebi na m ba fo kabre, m maŋ naŋ chena bɔrɛlambu to kikɛ, kaplɛkama nɛ ma alɛ yɔ, wajɛbu to nɛ mee luri.

⁷ Enite damta nɛ ma nɛ Israɛlebi ere malɛ nite ere kikɛ, m maŋ naŋ bishi bumo be bejuŋkparpo nɛ n tre fanɛ b baa keni ma basa so fanɛ kananɛ mbolpɔkpapo bee keni mbe mbolpɔ so na be ekama kusɔ nɛ k ba nɛ b maŋ ta ndibi nɛ baa tre sida na m pɔr bɔrɛlambu n sa ma.

⁸ Amoso kaŋɛ ma kayɛrbi Deevid fanɛ ma Enyɛnpetale Ebɔrɛ na e naa kaŋɛ mo ere, Deevid fanɛ n lara fo ashi mbolpɔkpapo be kushuŋ to nna nseŋ ta fo ŋ ki ma basa Israɛlebi be ejuŋkparpo.

⁹ Kaplɛkama nɛ e baŋ yɔ, ma nɛ mo nna. Nɛ ma alɛ bee pɔɔ mo doŋana kikɛ so a sa mo. Kananɛ basa ko be atre dii ga durnya ere to na, loŋ gbagba nɛ meeŋ shin nɛ mo alɛ gba be ketre e dii.

¹⁰ N sa ma basa Israɛlebi bumo gbagba be kakpa nɛ b chena, saŋɛ na so, shɛŋ shɛŋ maaŋ naŋ tɔrɔ bumo. Baŋ yili saŋɛ so nɛ b ba chena kasawule ere so kikɛ, basa lubi maŋ yige bumo ama loŋ maaŋ naŋ wora kikɛ.

¹¹ Ŋkpal manɛ so, meeŋ kuŋ menyi ashi men doŋana kutɔ nseŋ naŋ shin nɛ menyi be kanaŋ to ebi e wora kishi ga n ti so.

¹² E kaŋ wu nɛ b ta mo n ya nase mo nananyɛnana be edesekpa, meeŋ shin nɛ mbe mbinyɛnsobi ere be eko e ki ewura, nɛ n shin nɛ mbe kuwurji malɛ e ba kɔ eleŋ ga.

¹³ Mo e naŋ pɔr ma bɔrɛlambu n sa ma. Mo alɛ be kuwurji maaŋ loge kikɛ.

¹⁴ Meeŋ ki mo tuto, nɛ mo alɛ e baa la m pibinyɛn. E baŋ wora n foe, meeŋ niŋi mo fanɛ kananɛ etuto bee niŋi mbe kebia na.

¹⁵ Ma alɛ maaŋ lar mo kaman fanɛ kananɛ n lar Sɔɔl nɛ n daŋ lara nɛ e ki ewura pɔɛŋ nɛ e ba chena so na kaman na.

¹⁶ Fo alɛ Deevid be kenana maa ba nɛ k mur kikɛ. Fo kuwurji beeŋ baa wɔtɔ hale mbaanaayɔ.”

¹⁷ Kusɔ kama nɛ Ebɔrɛ lara ŋini Neetan na nɛ e daŋ kaŋɛ ewura Deevid.

Deevid ka ba kabɔrɛchɔrɔ to be asheŋ

¹⁸ Ndoŋ nna nɛ ewura Deevid yɔ wajɛbu na to ashi Enyɛnpe Ebɔrɛ be anishito n ya kule Ebɔrɛ ŋ kaŋɛ le: “Enyɛnpetale Ebɔrɛ, kusɔ nɛ fo wora n sa ma ere maŋ daga ma nɛ ma kanaŋ to ebi kuraa.

¹⁹ Ama naniere bre gba nɛ fo Enyɛnpetale Ebɔrɛ be kelela nɛ fee wora a sa ma kraa ti so. Fo nase kɔnɔ n sa ma kaman to ebi gba. Ama Enyɛnpetale Ebɔrɛ, le nɛ fee wora a sa basa kikɛ a?

²⁰ Manɛ bre nɛ n naa kɔ nɛ ŋ kaŋɛ fo! Fo nyi fo kayɛrbi be nfɛra.

²¹ Fo keparso nɛ fo wora le be kesheŋ tumase ere; fo alɛ wora loŋ nna nɛ fo ŋini ma

²² kananɛ fo Enyɛnpetale be keshi du! Fo nawule e la Ebɔrɛ. Dra kikɛ nɛ an nyi fo ka la Ebɔrɛ.

²³ Efuli pɔtɛana so ebi kikɛ malɛ maŋ naa wɔtɔ a du fanɛ Israɛl be efuli so ebi nɛ fo lara kenyaya to ashi Ijipt be efuli so nseŋ ta bumo ŋ ki fo gbagba be basa ere so. Fo asheŋ tumase damta nɛ fo wora nɛ fo ketre dii na so e shin nɛ efuli pɔtɛana kikɛ ta bumo agbirana n shile efuliana na so, saŋɛ na so, fo basa beeŋ sɔ ndoŋ n chena.

²⁴ Fo lara Israɛlebi na fanɛ fo basa nna hale mbaanaayɔ, nɛ fo Enyɛnpe Ebɔrɛ malɛ ki bumo be Ebɔrɛ.

²⁵ Naniere bre Enyɛnpe Ebɔrɛ, shin nɛ fo kɔnɔ nɛ fo nase n sa ma nɛ n nanabiana na e bɔlɔ so.

²⁶ Fo ketre beeŋ dii n sɔ kaplɛkama nɛ basa e baa kaŋɛ saŋkama fanɛ, fo e la Enyɛnpetale nɛ fo la Israɛl be Ebɔrɛ na. Ma alɛ be kanaŋ ere to nɛ feeŋ baa lara bewura saŋkama.

²⁷ Enyɛnpetale, Israɛl be Ebɔrɛ, ŋkpal fo ka lara le be asheŋ ere kikɛ ŋ ŋini ma, fo kayɛrbi, nseŋ kaŋɛ ma fanɛ feeŋ shin nɛ n nanabiana e ba ki bewura kachako so na so nɛ n nya kagbene ŋ kule le be kabɔrɛkule ere na.

²⁸ Enyɛnpetale Ebɔrɛ, ŋkpal fo nnɔ naseso ka bee bɔlɔ so saŋkama so so nɛ fo nase le be kɔnɔ gboŋgboŋi ere n sa ma na.

²⁹ Kusɔ nɛ mee kule fo e la fanɛ fo nɛfa n nanabiana nsaa lara fo bewura bumo to saŋkama. Fo Enyɛnpetale Ebɔrɛ na e nase kɔnɔ fanɛ fo nɛfa beeŋ baa wɔ n nanabiana so hale mbaanaayɔ.”