2 Samuɛl 6 - EBƆRƐ BE KAWƆL

B ka ta ŋkre be deka na m ba Jerusalɛm to be asheŋ

¹ Nɛ Deevid naŋ tre mbe benapo lempo ŋgboŋ adesa ashi Israɛl be efuli so m ba abar so,

² nseŋ juŋkpar bumo n yɔ Baala nɛ k wɔ Juda be efuli so na, nɛ b ya ta Enyɛnpe be ŋkre be deka nɛ mbe ketre Enyɛnpetale na deŋ kumo so ashi emalaika anyɔ na be nferinto na.

³ B daŋ lara kumo Abinadab be laŋ nɛ k yil kebee so na to nna nseŋ ta kumo n deŋi turko popɔr ko so a yɔ. Abinadab be mbinyɛnsobi Uzza nɛ Ahio e daa kɔ kumo a yɔ.

⁴ Ahio e daŋ juŋkpar.

⁵ Deevid nɛ Israɛlebi na kikɛ daŋ ta bumo be eleŋ kikɛ nna a boŋ nshɛ a cha a maŋkura Enyɛnpe Ebɔrɛ na. B daa laŋ ejaŋjilaŋ nɛ egoji nɛ ŋkure nɛ echakachaka nɛ ayawa nna.

⁶ B ka fo Naakɔn be kugooro nɛ e b bri ayu kumo so na, nɛ egbolu na fiti nɛ ŋkre be deka na bee shin nɛ k tɔr nɛ Uzza teŋi enɔ nɛ e suse kumo to.

⁷ Epul to nɛ Enyɛnpe Ebɔrɛ na nya agbo ga n wɔtɔ Uzza nseŋ mɔ mo, ŋkpal e ka maŋ sa mo bunyaŋ so. Uzza daŋ wu n dese ŋkre be deka na ase nna.

⁸ Ndoŋ nna nɛ Deevid nya agbo ga ŋkpal Enyɛnpe Ebɔrɛ ka gberge Uzza kusoe m mɔ so. Hale nɛ mbre Uzza be kasogberge nɛ b kraa tre kakpa na.

⁹ Ndoŋ nna nɛ Deevid fara a ŋana Enyɛnpe Ebɔrɛ na nseŋ kaŋɛ le: “Nuso nɛ meeŋ wora n ta ŋkre be deka ere a yɔ?”

¹⁰ E daŋ yili mbe nfɛra nna fanɛ e maaŋ naŋ yɛr kumo Jerusalɛm to, amoso e daŋ ta ŋkre be deka na nna ŋ gbɛ n ya yili Obɛd Edɔm nɛ e la Gaaf be kadetobia na be laŋ to.

¹¹ Deka na daa wɔ ndoŋ nna n ya fo afɔl asa nɛ Enyɛnpe Ebɔrɛ nɛfa Obɛd Edɔm nɛ mbe kanaŋ kikɛ.

¹² Ewura Deevid ka nu fanɛ ŋkpal ŋkre be deka na ka wɔ Obɛd Edɔm be laŋ to so, nɛ mo nɛ mbe kanaŋ kikɛ nya nɛfa na nɛ e lara kumo laŋ na to n yɔ Jerusalɛm nɛ kagbenefuli.

¹³ Basa nɛ b sulɔ deka na ka teŋi ateŋgreŋ ashe, nɛ e shin nɛ b yili; ndoŋ nna nɛ e lara gbolu nɛ kena fɔlbi duliduli ko n lara sarga n sa Ebɔrɛ.

¹⁴ Deevid daŋ dela wajɛ fuful nawule mbe kashɛr to nna nseŋ ta mbe eleŋ kikɛ n cha m maŋkura Enyɛnpe Ebɔrɛ.

¹⁵ Ndoŋ nna nɛ mo nɛ Israɛlebi na kikɛ ta ŋkre be deka na, a foŋ mbel a cha awɔr kagbenefuliso a yɔ Jerusalɛm.

¹⁶ B ka ta ŋkre be deka na a luri kade to na, nɛ Sɔɔl pibiche Mikaal keni tokuro to n wu ewura Deevid ka bee cha a tɛto, nɛ mbe asheŋ nu mo agbo alegaiso nɛ e maŋ naa keni mo a bɔlɔ kenishi.

¹⁷ Ndoŋ nna nɛ b ta deka na m ba yili wajɛbu nɛ Deevid lɔŋɛ na to. Nɛ e ta asɔbɔya n lara sarga nseŋ chɔɔ amo bɔrɛsure na so n sa Enyɛnpe Ebɔrɛ.

¹⁸ E ka lara esarga na n loge nɛ e nɛfa basa na ashi Enyɛnpetale Ebɔrɛ na be ketre to.

¹⁹ Kumo be kaman nɛ e chige bumo kikɛ ajibi. E daŋ sa benyɛn nɛ beche nɛ b wɔ Israɛl na kikɛ ebodobodo nɛ eblaŋ tɔso nɛ asɔrso jiso nɛ ekama ta n yɔ laŋ to.

²⁰ B ka loge nɛ Deevid bee ba laŋ to nɛ e ba chɔrɔ mbe kanaŋ, nɛ Sɔɔl pibiche Mikaal shɛr Deevid to ŋ kaŋɛ mo le: “Kabre Israɛl malɛ be ewura nase ketande bre! Mbe beyaasepo be mbita be anishito nɛ e delgeso fanɛ ewulpo!”

²¹ Nɛ Deevid kaŋɛ le: “Enyɛnpe Ebɔrɛ maŋ lara esa kikɛ menyi be kanaŋ to fanɛ e ba sɔ fo tuto Sɔɔl so ŋ ki mbe basa be ejuŋkparpo. Ma nɛ Enyɛnpe Ebɔrɛ na lara, amoso nɛ mee cha a maŋkura mo na.

²² Hale nɛ n wora ma kumu yɛryɛrbi nseŋ ŋaba ma kumu fo ere kutɔ gba, mbita ere bre beeŋ sa ma bunyaŋ gboŋgboŋi!”

²³ Ŋkpal kusɔ nɛ Sɔɔl pibiche Mikaal kaŋɛ na so e daa maŋ naŋ kurge kikɛ hale m ba wu.