2 Samuɛl 3 - EBƆRƐ BE KAWƆL

¹ Kolu nɛ k tɔr benapo nɛ b yili Sɔɔl be kanaŋ to ebi be kaman na nɛ bumo nɛ bumo alɛ yili Deevid be kaman na daŋ chɛr ga. Ama saŋkama Deevid bre be eleŋ daa ti so nna a chɔ basa nɛ baa kɔ mo na.

Deevid be mbia be asheŋ

² Kananɛ Deevid be mbia ashe nɛ b daŋ kurge ashi Hibrɔn na bɛ abar so kenimu kenimuso nde. Mo pibinyɛn nimuso e daa la Amnɔn nɛ mo nio daa la Ahinɔam nɛ e shi Jizreel na.

³ Mo pibinyɛn nyɔsopo e daa la Chiliab nɛ mo nio daa la ekulgepoche Abigɛl nɛ e daa la Nabaal nɛ e shi Kaamɛl be kebeegboŋ na ase na be eche na. Absalɔm nɛ mo nio la Maaka, ewura Talmai nɛ e shi Geshur na pibiche na e la mo pibinyɛn sasopo.

⁴ Mo pibinyɛn nasopo e la Adonija nɛ mo nio daa la Hagif. Shifatia nɛ mo nio la Abitaal na e la mo pibinyɛn nusopo.

⁵ Mo pibinyɛn shesopo e la Itriam nɛ mo alɛ mo nio la Igla na.

Abna ka shile m ba ti Deevid so be asheŋ

⁶ Jemanɛ nɛ Deevid be kanaŋ to ebi nɛ Sɔɔl be kanaŋ to ebi bee kɔ kena na, Abna nawule ashi Sɔɔl be kanaŋ to ebi to be asheŋ woraso e daa bɔlɔ kenishi saŋkama.

⁷ Kachako nɛ Sɔɔl pibi Ishboshɛf ku Abna kɔnɔ fanɛ mo nɛ Sɔɔl mo jipo Rizpa nɛ e la Aiya pibiche na di keche nɛ kenyɛn.

⁸ Nɛ Abna nya agbo ga ŋ kaŋɛ: “Fee fɛ fanɛ meeŋ debɔr Sɔɔl a, ŋko fee fɛ fanɛ n yili Judaebi be kaman nna? Sososo na kikɛ nɛ m bugi kagbene n shuŋ fo tuto Sɔɔl nɛ mo sipoana nɛ mo teriana. Ma alɛ e mɔlga fo ashi Deevid be enɔ to. Ama kabre ma e ki esa lubi fo kutɔ ŋkpal eche so na!

^9-10 Nɛ m baa maŋ chɛ Deevid to nɛ e ji kuwura fanɛ kananɛ Enyɛnpe Ebɔrɛ nase kɔnɔ n sa mo fanɛ e beeŋ sɔ kuwurji na ashi Sɔɔl nɛ mbe kanaŋ kutɔ n sa mo nɛ e ki Israɛl nɛ Juda kikɛ be ewura, yili Dan be kasawule nɛ k wɔ kelargato be esoso na so n ya fo Bɛshiba nɛ k wɔ kelargato be kaseto be kaba so kikɛ na, kumo ere Ebɔrɛ e mɔ ma!”

¹¹ Nɛ kufu pɛ Ishboshɛf ga hale nɛ e maŋ naŋ tiŋ m bugi kɔnɔ gba.

¹² Ndoŋ nna nɛ Abna shuŋi mbɔ Deevid kutɔ, fanɛ b ya kaŋɛ mo le: “Fo e naa shin nɛ fo ki kasawule ere kikɛ so be ewura, amoso shin nɛ ma nɛ fo e wora kɔnɔkoŋwule be ŋkre nɛ n chɛ fo to nɛ fo sɔ Israɛl be efuli kikɛ ŋ ki feya.”

¹³ Nɛ Deevid yɛ: “Kenyalɛ! Kusɔ koŋwule nɛ meeŋ yili so nɛ ma nɛ fo e wora kɔnɔkoŋwule be ŋkre n sa abar e la fanɛ, fo baa ba nɛ fo ba wu ma, fo keta Sɔɔl pibiche Mikaal m ba sa ma.”

¹⁴ Kede be kaman nɛ Deevid shuŋi mbɔ Ishboshɛf kutɔ fanɛ b ya kaŋɛ mo le: “Men shin nɛ ma eche Mikaal e laŋɛ m ba ŋ kutɔ, ŋkpal manɛ so, Filistiebi be basa kalfa nɛ m mɔ pɔɛŋ nseŋ nya mo n ta.”

¹⁵ Nɛ Ishboshɛf sɔ Mikaal ashi mo kul Paltiɛl nɛ e la Laash pibinyɛn na kutɔ.

¹⁶ Ndoŋ nna nɛ Mikaal mo kul teŋi keeli m bɛ bumo so hale n ya fo Bahurim pɔɛŋ nɛ Abna kaŋɛ mo fanɛ e bɛta a yɔ epe. Nɛ e bɛta.

¹⁷ Nɛ Abna yɔ Israɛlebi be bejuŋkparpo na kutɔ n ya ber bare nseŋ kaŋɛ bumo le: “Men ka bee fin fanɛ Deevid e ki menyi be ewura na chɛr ga.

¹⁸ Naniere bre men nya loŋ be ekpa. Men baa nyiŋi kusɔ nɛ Ebɔrɛ kaŋɛ na.” E yɛ: “Meeŋ bɔla ma kayɛrbi Deevid so m mɔlga ma basa Israɛlebi ashi bumo doŋana kutɔ, fɔŋfɔŋ Filisti be basa na.”

¹⁹ Kede be kaman nɛ Abna ya malga Bɛnjamin be kanaŋ to ebi kutɔ nseŋ yɔ Hibrɔn n ya kaŋɛ Deevid kusɔ nɛ Bɛnjamin be kanaŋ to ebi nɛ Israɛlebi na yili fanɛ baaŋ wora.

²⁰ Abna daŋ keta mbe benapo adunyɔ nna m ba Deevid kutɔ ashi Hibrɔn, nɛ Deevid wora kejigboŋ n sa bumo.

²¹ Kumo be kaman nɛ Abna kaŋɛ Deevid le: “Nɛ fo sa ma akpa, meeŋ shin nɛ Israɛlebi kikɛ e sɔ fo fanɛ bumo be ewura, nɛ fo nya kusɔ nɛ fee sha nsaa ji kuwura kasawule na kikɛ so.” Ndoŋ nna nɛ Deevid ta kɔnɔ lela ŋ kela mo nɛ e yɔ nɛ kayurwushi.

B ka mɔ Abna be asheŋ

²² K maŋ chɛr ko nɛ Jɔab nɛ Deevid be benapo na be beko bar asɔ damta nɛ b suge basa kutɔ na be ako. Kumo be jemanɛ so nɛ Abna maŋ naa wɔ Deevid kutɔ ashi Hibrɔn, ŋkpal manɛ so, Deevid ta kɔnɔ lela nna ŋ kela mo nseŋ shin nɛ e yɔ.

²³ Jɔab nɛ mbe basa ka ba, nɛ b kaŋɛ mo fanɛ Abna nɛ mbe basa ba ewura Deevid kutɔ nɛ e ta kɔnɔ lela ŋ kela bumo nɛ b bɛta.

²⁴ Ndoŋ nna nɛ Jɔab yɔ ewura Deevid kutɔ n ya kaŋɛ mo le: “Manɛ nna nɛ fo wora loŋ? Manɛ nna nɛ fo shin nɛ Abna ba fo kutɔ nseŋ naŋ bɛta?

²⁵ E ba nna nɛ e ba fule fo m pin kusɔ nɛ fee wora kikɛ nɛ kaplɛkama nɛ fee du fo aya. Ma alɛ baa nyi geeŋ fanɛ fo nyi kumo be loŋ!”

²⁶ Jɔab ka lar Deevid kutɔ na be kaman, nɛ e shuŋi mbɔ fanɛ b ya bar Abna, ndoŋ nna nɛ b yɔ Sira be ketirbu na ase n ya keta mo m ba; ama Deevid daa maŋ nyi mbe keba na be asheŋ.

²⁷ Abna ka ba na nɛ Jɔab keta mo n lar kabunagboŋ na ekpa fanɛ e ka bee sha nɛ e kuli m malga mo kutɔ na, nseŋ ta kasaŋɛ n da mbe epun nɛ e wu. Ŋkpal Abna ka mɔ Jɔab mo sipo Asahɛl so nɛ Jɔab malɛ mɔ mo na.

²⁸ Deevid ka nu Abna be luwu na be asheŋ nɛ e kaŋɛ le: “Enyɛnpe Ebɔrɛ na gbagba nyi fanɛ ma nɛ ma beyaasepo maŋ nyi Abna be luwu ere be asheŋ.

²⁹ Ama kumo be kasogberge beeŋ ba Jɔab nɛ mbe kanaŋ kikɛ so! Kumo e la fanɛ echefoso, bumo be kanaŋ mo nɛ k beeŋ koso be enyɛn ko beeŋ lɔ babaso be kulɔ ŋko keboti, ŋko e beeŋ baa la esa nɛ e maaŋ tiŋ n shuŋ benyɛn be kushuŋ ama beche peya ŋko e beeŋ baa la esa nɛ e beeŋ wu kena to, ŋko esa nɛ e maaŋ ji m moɛ kikɛ!”

³⁰ Jɔab nɛ mo sipo Abishai e daŋ wora kɔnɔ m mɔ Abna ŋkpal e ka mɔ bumo sipo Asahɛl ashi Gibiɔn be kena to so.

B ka puli Abna be asheŋ

³¹ Ndoŋ nna nɛ Deevid ponte ŋ kaŋɛ Jɔab nɛ mbe basa fanɛ b kpɛa bumo be asɔbuuso to, nseŋ ta kagbenejijaso be asɔbuuso m buu n shu Abna be keeli. Ewura Deevid gbagba e daŋ wora Abna be keeli.

³² Hibrɔn nɛ b daŋ puli Abna, nɛ ewura Deevid shu ga ashi mbe nchaŋ ase. Basa nɛ b wɔ ndoŋ na gba kikɛ daŋ shu ga.

³³ Le nɛ Deevid daŋ shu ŋ karga awɔba ashi Abna be keeli to. “Abna, manɛ nna nɛ fo wu fanɛ ewulpo loŋ?

³⁴ B daa maŋ kre fo enɔana. Bumo alɛ daa maŋ kre fo aya gba. Ama fo wu fanɛ esa nɛ beyu mɔ.” Ndoŋ nna nɛ basa na naŋ pante kushu n lɛ to.

³⁵ Kamɔnchɛ na basa wora ania nɛ b sa Deevid kusɔ ko nɛ e ji, ama e daŋ bɔ ntaŋ nna fanɛ nɛ epeŋi baa maŋ tɔr pɔɛŋ nɛ n ji ajibi kumo ere Ebɔrɛ e mɔ mo!

³⁶ Kusɔ nɛ k wora na daŋ bɔlɔ basa na kikɛ kenishi. Kashenteŋto ewura Deevid be kusɔ nɛ e wora na daŋ bɔlɔ bumo kenishi ga.

³⁷ Kumo be kamɔnchɛ na nɛ ewura Deevid be basa, nɛ Israɛlebi na yirda fanɛ ewura Deevid be enɔ maŋ wɔ Abna be luwu na be asheŋ to.

³⁸ Ndoŋ nna nɛ ewura na kaŋɛ mbe benimuana le: “Men maŋ nyi fanɛ esa gboŋ ko wu Israɛl to kabre a?

³⁹ Kashenteŋto nna fanɛ ma e la Ebɔrɛ be ewura laraso, ama kabre ma alɛ maŋ naa kɔ eleŋ. Zeruwa be mbinyɛnbi Jɔab nɛ Abishai bre bee ŋini ma nna fanɛ b kɔ eleŋ ga a chɔ ma. Enyɛnpe Ebɔrɛ e ta kasogberge nɛ k daga n sa le be basa lubi ere!”