2 Samuɛl 24 - EBƆRƐ BE KAWƆL

Ewura Deevid ka karga mbe basa be asheŋ

¹ Enyɛnpe Ebɔrɛ na daŋ naŋ nya agbo nna ga n wɔtɔ Israɛlebi nseŋ bɔla Deevid so m bar le be tɔrɔ ere bumo so ŋ kaŋɛ Deevid le: “Ya karga Israɛl nɛ Juda be basa kikɛ.”

² Ndoŋ nna nɛ Deevid kaŋɛ mbe benapo be enimu Jɔab le: “Fo nɛ fo benimuana na kikɛ e yɔ Israɛl be eyiri na kikɛ kutɔ n ya yili Dan be kade to ashi efuli na so be kelargato be esoso ŋ karga basa nɛ b fo kena be kekɔ na kikɛ n ya fo Bɛshiba ashi kelargato be kaseto.”

³ Nɛ Jɔab kaŋɛ ewura na le: “Yiramu, Enyɛnpe fo Ebɔrɛ na e shin nɛ Israɛl be benapo na e wora kishi n ti so fanɛ ntuŋ kalfa a chɔ kananɛ b du naniere, nseŋ teŋi fo ŋkpa malɛ so nɛ fo wu kumo be loŋ. Ama manɛ nna nɛ fee sha fanɛ fo wora le?”

⁴ Ama ewura na daŋ maŋ chɛrga mbe nfɛra nseŋ shin nɛ Jɔab nɛ benimuana na lar n yɔ nɛ b ya karga Israɛl be benapo na.

⁵ B daŋ ya dii Jɔɔdan be Lɔr na nna n ya wora bumo be keeyito m mata kade nɛ baa tre Arowa nɛ k wɔ ketaŋɛ nɛ k wɔ Gad be kaba so na nna. Ndoŋ nɛ b yili n sɔ kelargato be esoso be kaba so n yɔ Jeza.

⁶ Nseŋ yili ndoŋ n yɔ Giliad nɛ Kadɛsh ashi Hiti be kasawule so. Nseŋ bɔla ndoŋ n yɔ Dan n ya yili Dan malɛ n yɔ Sidɔn be epeŋitɔrkpa be kaba so a mata teku nɛ baa tre Mɛditerenia na.

⁷ Kumo be kaman nɛ b yɔ kade nɛ b pɔr egbal ŋ kulti nɛ baa tre Tayɛ na, n ta loŋ n ya fo Hivebi nɛ Keenanebi be nsawule so be nde kikɛ to. N yili ndoŋ n yɔ Bɛshiba nɛ k wɔ Juda be kelargato be kaseto be keshishɛrsawule so na.

⁸ Afɔl akpanu nɛ nchɛ adunyɔ nɛ b ta n nite efuli na kikɛ so pɔɛŋ nseŋ bɛta m ba Jerusalɛm.

⁹ Ndoŋ nna nɛ Jɔab ba kaŋɛ ewura na basa nɛ b fo kena to be keyɔ na be kananɛ b sa. E yɛ basa ŋgboŋ alfa aburwa nɛ b daŋ nya ashi Israɛl, nseŋ nya basa ŋgboŋ alfa anu malɛ ashi Juda.

¹⁰ Ewura Deevid ka pin basa na b kananɛ b sa na nɛ mbe nfɛra fara a wɔl mo to nɛ e fɛ fanɛ e wora kulubi ŋ gbiti Ebɔrɛ nseŋ kaŋɛ le: “Kusɔ nɛ n wora ere bee ŋini nna fanɛ n wora kulubi gboŋgboŋi. Amoso ta m paŋ ma ŋkpal manɛ so n wora kawulisheŋ ga.”

¹¹ Kumo be ŋklade chipurso nɛ Enyɛnpe Ebɔrɛ kaŋɛ Gad nɛ e la Deevid be anebi na le:

¹² “Ya kaŋɛ Deevid fanɛ n sa mo asɔ asa nɛ e lara amo to be kumo nɛ e bee sha.”

¹³ Nɛ Gad yɔ ewura Deevid kutɔ n ya kaŋɛ mo kusɔ nɛ Enyɛnpe Ebɔrɛ kaŋɛ. E yɛ: “Asɔ ere be kumo nɛ feeŋ baa sha? Akoŋgboŋ be ketɔr fo kasawule so nfɛ asa ŋko fo keshile fo doŋana afɔl asa ŋko kulɔ be aleblawu ko be keba fo kasawule so nchɛnsa? Fɛ kumo be asheŋ nseŋ kaŋɛ ma kusɔ nɛ fee sha fanɛ ŋ kaŋɛ Enyɛnpe Ebɔrɛ.”

¹⁴ Nɛ Deevid kaŋɛ le: “Nuso be asheŋ nde? Asheŋ ere be kekama maŋ bɔ! Ama maa sha keji tɔrɔ dimɛdi be enɔ to. Amoso shin nɛ Enyɛnpe Ebɔrɛ gbagba e gberge ma kusoe, ŋkpal manɛ so e la kuwɔrwu be Ebɔrɛ nna.”

¹⁵ Amoso Enyɛnpe Ebɔrɛ daŋ shin nna nɛ kulɔ be aleblawu ba Israɛl so kumo be kamɔnchɛ chipurso n ya fo jemanɛ mo nɛ mo ere Ebɔrɛ yili na. Yili efuli na be kebonfu ko n ya fo kumo be kebonfu ko, Israɛlebi na be basa ŋgboŋ adushunu e daŋ wu.

¹⁶ Ama Enyɛnpe Ebɔrɛ be Malaika ka daa shin nɛ e mur Jerusalɛm na, nɛ kuwɔr pɛ Enyɛnpe Ebɔrɛ nɛ e chɛrga mbe nfɛra a yɔ basa na be kasogberge na be kaplɛa so nseŋ kaŋɛ Malaika nɛ e bee mɔ bumo na le: “K nyalɛ loŋ. Lara fo enɔ ashi bumo be asheŋ to!” Kumo be jemanɛ na nɛ Malaika na wɔ Aruna nɛ e la Jebusi be esa na be kugooro na ase.

¹⁷ Ewura Deevid ka wu Malaika nɛ e daa mɔ basa na, nɛ e kaŋɛ Enyɛnpe Ebɔrɛ na le: “Ma e wora n jija nseŋ wora kulubi n ti so. Nɛ manɛ nɛ bebɔlpo ere malɛ wora? Ma nɛ ma kanaŋ e daga fo ka gberge kusoe.”

¹⁸ Kumo be kamɔnchɛ kikɛ nɛ Gad yɔ Deevid kutɔ n ya kaŋɛ mo le: “Yɔ Aruna be kugooro na so n ya pɔr bɔrɛsure n sa Enyɛnpe Ebɔrɛ.”

¹⁹ Ndoŋ nna nɛ Deevid nu n sa kusɔ nɛ Enyɛnpe Ebɔrɛ bɔla Gad so ŋ kaŋɛ mo kenishipereso na, nseŋ yɔ.

²⁰ Aruna ka keni, n wu ewura na nɛ mbe benapo ka bee ba mo kutɔ, nɛ e ya gbir kasawule Deevid be anishito

²¹ nseŋ bishi mo le: “Manɛ nna nɛ fo ba nfe, Yiramu?” Nɛ Deevid yɛ: “M ba nna nɛ m ba tɔ fo kugooro ere m pɔr bɔrɛsure n sa Enyɛnpe Ebɔrɛ, saŋɛ na so e beeŋ ju aleblawu ere ashi anyi so.”

²² Nɛ Aruna kaŋɛ le: “Ta kumo n wora kusɔ kama nɛ k par fo n sa Enyɛnpe Ebɔrɛ na. Ana gba nde! Feeŋ tiŋ n ta amo n lara sarga chɔɔso bɔrɛsure na so; nseŋ ta bumo be abɔto be abarga nɛ ndibi nɛ b kɔ a bri ayu na malɛ m puga edɛ.”

²³ Aruna ka ta asɔ na kikɛ n sa ewura na nɛ e kaŋɛ mo le: “Ebɔrɛ e sɔ fo kekule.”

²⁴ Nɛ ewura na malɛ kaŋɛ mo le: “M-m, meeŋ ka amo be kukɔ n sa fo ŋkpal manɛ so m maa sha kelara sarga nɛ m maŋ bɔ kukɔ kumo so n sa Enyɛnpe Ebɔrɛ.” Nɛ e tɔ kugooro na nɛ ana na kikɛ gbiti be ndarbi adunu,

²⁵ nseŋ pɔr bɔrɛsure ndoŋ n sa Enyɛnpe Ebɔrɛ. Kumo be kaman nɛ e lara esarga chɔɔso nɛ kɔnɔkoŋwuleso be esarga. Ndoŋ nna nɛ Enyɛnpe Ebɔrɛ na nu mbe kabɔrɛkule nɛ aleblawu nɛ k wɔ Israɛl na kikɛ ku.