2 Samuɛl 23 - EBƆRƐ BE KAWƆL

Ewura Deevid be lalaloge be mmalga be asheŋ

¹ Ebɔrɛ nɛ e la Jeekɔb be Ebɔrɛ na e daŋ lara Jese pibinyɛn Deevid nɛ e ki esagboŋ nɛ ewura. Deevid malɛ e daa la esa nɛ e boŋ nshɛ nɛ a wɔ ebel ga ashi Israɛl to. Deevid be lalaloge be mmalga nɛ e daŋ malga nde.

² Enyɛnpe Ebɔrɛ be kiyoyu na e naa kaŋɛ ma kusɔ nɛ meeŋ malga.

³ Le nɛ Israɛl be Ebɔrɛ nɛ e la ma ekumpo na daŋ malga ŋ kaŋɛ: “Ewura nɛ e kɔ kasonu n sa Ebɔrɛ nseŋ ta kashenteŋji a ji mbe kuwura na

⁴ du nna fanɛ bɔrɛ ka maŋ mɔl nɛ epeŋi nyaŋɛ chipurso nɛ kakpa kikɛ wora parr nna. Loŋ be epeŋi e naa nyaŋɛ a shin nɛ afitiri bee nyɛkpɛso chipurso na.”

⁵ Le be ekpa malɛ so nɛ Ebɔrɛ beeŋ bɔla so n nɛfa ma nɛ ma kaman to ebi. Ŋkpal manɛ so e nase kɔnɔ nɛ k wɔtɔ mbaanaayɔ nna n sa ma. Mo alɛ beeŋ wora kusɔ nɛ e kaŋɛ na m bɔlɔ so. Mbe kɔnɔ naseso malɛ maa chɛrga kikɛ. Amoso e beeŋ sa ma kusɔ kama nɛ mee tama na, nseŋ mɔlga ma.

⁶ Ama belubiworapoana bre du fanɛ ewi nɛ esa maaŋ tiŋ n ta mbe enɔ m pulgi nna.

⁷ Ama fo baŋ ta kebɛlso be katɔkɔrɔ nna m pulgi amo nseŋ ŋ gbare amo n ya chɔɔ.

Deevid be benapo lempo be asheŋ

⁸ Deevid be benapo nɛ bumo be atre dii ga nde: Joshɛb Baashibef nɛ e shi Tachimɔn na e daa la mbe benapo lempo asa nɛ bumo be atre dii a chɔɔ ekama na be ejuŋkparpo. E daŋ ta kekpa nna ŋ kɔ m mɔ benyɛn alfa aburwa ashi kena koŋwule to.

⁹ Enyɔsopo e daa la Eliaza nɛ mo tuto la Dodo nɛ e shi Aho be kanaŋ to na. Kachako nɛ mo nɛ ewura Deevid juŋkpar Israɛlebi na nɛ b ya to Filistiebi na kena be emaŋ nɛ Israɛlebi be benapo bre kikɛ bɛta kaman gbrɛbi.

¹⁰ Ndoŋ nna nɛ Eliaza yili to ŋ kɔ Filistiebi na hale nɛ mbe enɔ ki shiŋgreŋ nɛ e maaŋ naŋ tiŋ n yige tokobi to. Kumo be kamɔnchɛ nɛ Enyɛnpe Ebɔrɛ na sa bumo kekɔmpɔɔso gboŋgboŋi. Kena na ka loge na nɛ Israɛl be benapo na kikɛ bɛta m ba Eliaza kutɔ m ba bela akɔsɔ nɛ a deŋ bubuni na so na kikɛ.

¹¹ Benapo lempo asa na be esasopo e daa la Shamma nɛ mo tuto la Agee nɛ e shi Haraa na. Kachako nɛ Filistiebi be benapo kre kena nɛ b ba jija akuloŋku be kudɔ nɛ k mata Lehi na nɛ Israɛlebi be benapo na kikɛ shile ŋ ka Shamma nawule.

¹² Nɛ Shamma bre daŋ yili kudɔ na to ŋ kɔ m pɔɔ Filistiebi na so ŋ kuŋ kudɔ na. Kumo be kamɔnchɛ kekɔmpɔɔso gboŋgboŋi nɛ Enyɛnpe Ebɔrɛ na daŋ sa bumo.

¹³ Kasɔteŋi be jemanɛ so nɛ benapo lempo adesa na to be basa asa nɛ bumo be atre daŋ dii ga na yɔ ewura Deevid kutɔ ashi Adulam be kebeelaŋ na ase, nɛ Filistiebi na malɛ be benapo ko ya wora bumo be keeyito ashi Refaebi be ketaŋɛ na to,

¹⁴ nseŋ sɔ Bɛtlɛhɛm kikɛ nɛ ewura Deevid malɛ wɔ kakpa nɛ e ŋana na.

¹⁵ Ndoŋ nna nɛ achukoŋ pɛ ewura Deevid, nɛ Bɛtlɛhɛm be nchu yɛlga mo nɛ e kaŋɛ le: “Nɛ esa ko daa beeŋ jɔ ketirbu nɛ k dese Bɛtlɛhɛm be kabunagboŋ na ase na be nchu n sa ma nna, k daa beeŋ par ma ga!”

¹⁶ Nɛ benapo lempo asa nɛ bumo be atre dii benapo adesa na to na pete n yɔ Filistiebi na be keeyito n ya jɔ ketirbu na be nchu m ba sa Deevid, ama Deevid daa maŋ nu nchu na. E daŋ chulgi amo nna n wurge kasawule fanɛ sarga n sa Enyɛnpe Ebɔrɛ,

¹⁷ nseŋ kaŋɛ le: “Enyɛnpe Ebɔrɛ, nuso gba nɛ meeŋ wora n nuu nchu ere! Ma kenuu amo beeŋ baa du nna fanɛ basa nɛ b ta bumo be amu ŋ kpa kelara ere be ŋklaŋ nɛ mee nuu na!” Ŋkpal loŋ so nɛ e kini kenuu nchu na. Le be kenyɛn be ashuŋ nɛ benapo lempo asa na daŋ shuŋ.

¹⁸ Jɔab mo sipo Abishai nɛ mo nio la Zeruwa na e daa la benapo lempo adesa nɛ bumo be atre daŋ dii na to be ejuŋkparpo. E daŋ ta mbe kekpa nna ŋ kɔ benyɛn alfa asa m mɔ bumo kikɛ nɛ mbe ketre dii fanɛ benapo lempo asa nɛ bumo be atre daŋ dii a chɔɔ ekama na.

¹⁹ Mo e daa la benapo lempo adesa na kikɛ to be elempo ama mo alɛ daa maŋ kɔ eleŋ n fo benapo lempo asa juŋkparso na so.

²⁰ Jehowada pibinyɛn Bɛnaya nɛ e shi Kabziil na gba daa la enapo lempo ko nna: E daa kɔ kenyɛn ga hale n daŋ mɔ Mowabebi be benapo lempo anyɔ ko. Kachako gba e daŋ lar bɔrɛ nɛ abɔrɛjembubi to nna n ya gbelge kejamaŋ to m mɔ buluŋ.

²¹ Mo alɛ daŋ naŋ mɔ Ijipt be kanyɛn gboŋgboŋi ko nɛ e daŋ ta kekpa a kɔ na. Kaprɛ nɛ Bɛnaya bre daŋ keta a kɔ ama e tiŋ n sɔ kanyɛn na be kekpa na mbe enɔ to ŋ kilgi n ta kumo m mɔ mo.

²² Le be kenyɛn nɛ Bɛnaya nɛ e la benapo lempo adesa na to be eko na daŋ ji.

²³ E daŋ nya kemaŋkura ga ama mo alɛ daa maŋ fo benapo lempo asa na so. Mo nɛ ewura Deevid daŋ ta ŋ ki basa nɛ baa kuŋ mo na be enimu.

^24-39 Benapo lempo adesa na be beko e la: Asahɛl nɛ e la Jɔab mo sipo na, nɛ Dodo nɛ e shi Bɛtlɛhɛm na pibinyɛn Elhanan, Shamma nɛ Elika nɛ b shi Haarɔd na nɛ, Hɛlɛz nɛ mo alɛ shi Pɛlɛt na, Ikkish nɛ e shi Tekua na pibinyɛn Ira, nɛ Abieza nɛ e shi Anatɔf na, Mebunai nɛ e shi Husha na, nɛ Zalmɔn nɛ mo alɛ shi Aho na, nɛ Maharai nɛ e shi Nɛtofa na, nɛ Baana nɛ e shi Nɛtofa na pibinyɛn Hɛlɛb nɛ Ribai nɛ e shi Gibia nɛ k wɔ Bɛnjamin be efuli so na pibinyɛn Ittai nɛ Bɛnaya nɛ e shi Piratɔn na, nɛ Hiddai nɛ mo alɛ shi ketaŋɛ nɛ k wɔ a mata Gaash na, nɛ Abialbɔn nɛ e shi Araba na nɛ Azmavɛf nɛ e shi Bahurim na, nɛ Eliab nɛ e shi Shaalbɔn na kikɛ daa la Jaashɛn be mbinyɛnbi nna. Shamma nɛ e shi Haraa na pibinyɛn Jonatan nɛ Shaara nɛ e shi Haara pibinyɛn Ahiam nɛ Ahasbai nɛ e shi Maaka na pibinyɛn Elifelɛt nɛ Ahitofɛl nɛ e shi Gilo na pibinyɛn Eliam nɛ Hizro nɛ e shi Kaamɛl na nɛ Paarai nɛ e shi Arab na, nɛ Neetan nɛ e shi Zooba na pibinyɛn Igaal nɛ mo nana la Hagri na, nɛ Bani nɛ e shi Gad na nɛ Zɛlɛk nɛ e shi Ammɔn na nɛ, Naharai nɛ e shi Bɛɛrɔf nseŋ daa keta Zeruwa pibinyɛn Jɔab be akɔsɔ na nɛ Ira nɛ Garɛb nɛ b shi Jatiir na, nɛ Yuriya nɛ e la Hiti be esa na. Benapo lempo adesa nɛ ashunu na be beko be atre nna na.