2 Samuɛl 22 - EBƆRƐ BE KAWƆL

Deevid be kapandi be kashɛ

¹ Enyɛnpe Ebɔrɛ ka mɔlga ewura Deevid ashi mo doŋana nɛ ewura Sɔɔl be enɔ to na, nɛ e boŋ kashɛ ere m maŋkura mo.

² Enyɛnpe Ebɔrɛ na e la ma kefalta nɛ n yil so. Mo e la ma ekumpo gboŋ nɛ emɔlgapo.

³ Ma Ebɔrɛ na e la ma kejembugboŋ nɛ ma eŋanakpa. Mo kutɔ nɛ ma kumɔlga bee shi. E bee kuŋ ma nna fanɛ kebɛlso be kusɔkuŋso. Mo e naa kɔ a sa ma, nsaa mɔlga ma. Mo e la ma emɔlgapo. Mo e naa kuŋ ma nsaa mɔlga ma, nsaa ta ma a ŋana basa nɛ baa ta eleŋ a tintiŋ basa na so.

⁴ N kule Enyɛnpe Ebɔrɛ na nɛ e mɔlga ma ashi ma doŋana be enɔ to. Kemaŋkura e baa la mo peya!

⁵ Luwu kulti ma n wɔtɔ fanɛ nchu ka kpa esa ekwi na nna a shin nɛ k mur ma.

⁶ Luwu kre ma fanɛ efɔl nna, nɛ nchaŋ malɛ sho ma kejigbelɛ.

⁷ Enyɛnpe Ebɔrɛ na nɛ n shu e tre ma etɔrɔsheŋ kikɛ to nɛ ma kushu tɔr mbe asoe to ashi mbe kuwurputi so ebɔrɛso nɛ e nu ma kushu nseŋ chɛ ma to.

⁸ Ndoŋ nna nɛ kasawule chicha nseŋ gbuŋgbuŋ to. Nɛ awɔlpa malɛ gba fara a filito nsaa gbuŋgbuŋ to, ŋkpal Ebɔrɛ ka nya agbo so!

⁹ Edishi daa lar mbe kamuna to nna nɛ ajanwulɛbi be edɛ shi mbe kɔnɔ to a chɔ wuloŋwuloŋ.

¹⁰ E lar awɔlpa to ŋ gbelge to a ba nɛ kuwɔlpa lembir ko wɔ mbe aya ase.

¹¹ E dii nna n chena emalaika nɛ b du fanɛ asɔ firgiso so nɛ b kɔ mo a firgi afu to.

¹² Tentembiri daŋ buu mo so nna nɛ abɔrɛwɔlpa kulti mo n wɔtɔ.

¹³ Nɛ kakpa nɛ e wɔ na bee nyɛkpɛ a kpa edɛ fanɛ afu ka bee foŋ ajanwulɛ be edɛ to na.

¹⁴ Enyɛnpetale Ebɔrɛ na shi awɔlpa to m ponte fanɛ bɔrɛ ka gbri na. Nɛ b nu mbe ebɔl.

¹⁵ Nɛ e to atanyembi nɛ a bee nyɛkpɛ plɛplɛ fanɛ bɔrɛ ka nyɛkpɛ na nɛ mo doŋana kikɛ jaŋgeto n shile.

¹⁶ Enyɛnpe Ebɔrɛ na ka ponte n fiɛ mo doŋana so agboso na nɛ teku feeto ŋ ka kasawule, nɛ kumo be gbaltɔlase dii efuli.

¹⁷ Nɛ Enyɛnpe Ebɔrɛ yili esoso n teŋi enɔ m pɛ ma ŋ gberge n lara nchu chiŋgeliŋ na to.

¹⁸ E mɔlga ma ashi ma doŋ lempoana na nɛ bumo nɛ b kishi ma na kikɛ be enɔ to, ŋkpal b ka daa kɔ eleŋ ga a chɔ ma so.

¹⁹ Saŋɛ nɛ asheŋ tu ma na, nɛ baa kɔ ma, ama Enyɛnpe Ebɔrɛ na kuŋ ma.

²⁰ B kulti ma n shɛrto nɛ e mɔlga ma nseŋ sɔ ma n yige, ŋkpal ŋ kaa bee wora asheŋ nɛ a bee par mo so.

²¹ Ŋkpal ŋ ka bee wora asheŋ niŋiso so nɛ fo Enyɛnpe Ebɔrɛ be alelasheŋ shi ga n sa ma na. Fo nɛfa wɔ ma so nna ŋkpal ŋ ka maŋ wora kulubi so.

²² Kusɔ nɛ Enyɛnpe Ebɔrɛ bee sha nɛ mee wora. Maa ba nɛ n shile ma Ebɔrɛ n ya wora kulubi kikɛ.

²³ N ta mbe mbra kikɛ n wɔtɔ ma kagbene to nna. Ma alɛ maŋ kplaŋ mbe keŋini so kikɛ.

²⁴ E nyi ŋ ka maŋ kɔ amoso kikɛ, nsaa gelge alubisheŋ kikɛ malɛ.

²⁵ Ŋkpal ma alɛ ka bee wora kusɔ nɛ k walɛ so, e bee nɛfa ma nna. Mo alɛ nyi fanɛ m maŋ wora kulubi mbe anishito.

²⁶ O Enyɛnpe Ebɔrɛ, fee ji kashenteŋ a sa bekama nɛ bumo alɛ gba bee ji kashenteŋ a sa fo. Nsaa wora bumo nɛ b maŋ kɔ amoso na kelela.

²⁷ Basa kama nɛ kulubi maŋ wɔ bumo to na nɛ fee lara fo kumu a ŋini, ama belubiworapo bre be alubi be kakɔka nɛ fee sa bumo.

²⁸ Bumo nɛ baa bar bumo be amu kaseto na nɛ fee mɔlga, ama bekama nɛ baa maŋ bumo be amu so na bre fee bar bumo kaseto nna.

²⁹ Fo, Enyɛnpe Ebɔrɛ na du fanɛ kefulto nna n sa ma. Fo e naa ta kanyɛ a kilgi kapaso.

³⁰ Fo e naa sa ma eleŋ nɛ mee kɔ ma doŋana a pɔɔ so nsaa suge bumo be nde.

³¹ Le be Ebɔrɛ ere be asheŋ woraso niŋi ga, mo alɛ be kamalga maŋ kɔ saŋgre kikɛ! E du fanɛ kebɛlso be kusɔ kuŋso nna n sa bekama nɛ baa fin kekuŋ ashi mo kutɔ.

³² Wanɛ malɛ e naa la Ebɔrɛ nɛ manɛ Enyɛnpe Ebɔrɛ nɛ e la ma kefalta ere.

³³ Ebɔrɛ nawule e la ma elempo a ju bedoŋ ashi ma ekpa to.

³⁴ Mo e sa ma aya shileso fanɛ chibir peya na, nsaa shin nɛ mee tiŋ a shile abee to.

³⁵ Mo e naa ŋini ma kananɛ baa kɔ kena nɛ kananɛ baa to danyaŋ be keta.

³⁶ O Enyɛnpe Ebɔrɛ, fo e naa kuŋ ma nsaa mɔlga ma. Fo kechɛto malɛ e shin nɛ ŋ ki esagboŋ.

³⁷ Fo ka maŋ sa ekpa fanɛ b pɛ ma so, maa ba nɛ mee tɔr kikɛ.

³⁸ Mee ju a bɛ ma doŋana so nna a pɔɔ bumo so, a mur bumo.

³⁹ N ta ma tokobi ŋ ŋe bumo n lɛ nɛ b koso ŋ gben. M pɔɔ bumo so cheche.

⁴⁰ Fo e naa sa ma eleŋ nɛ mee tiŋ a kɔ kena a pɔɔ ma doŋana so.

⁴¹ Fo e naa shin nɛ ma doŋana bee shile nɛ ma alɛ bee mɔ bekama nɛ b kishi ma na kikɛ.

⁴² Baa shu nna a fin kechɛto ama bumo alɛ maŋ nya esa nɛ e beeŋ mɔlga bumo. Baa kule Enyɛnpe Ebɔrɛ na, ama mo alɛ maa tuge bumo.

⁴³ N nɔkɔr ma doŋana nɛ b ki fanɛ kasawule so be shishɛr, nseŋ chichi bumo so nɛ b ki fanɛ ekpa to be depɔ.

⁴⁴ Fo mɔlga ma ashi basa nɛ baa nyaŋɛto a sha nɛ b mɔ ma na be enɔ to nseŋ ta ma ŋ ki efuli pɔtɛana so be ejuŋkparpo hale nɛ baa shuŋ ma.

⁴⁵ Efuli pɔtɛana so be basa bee chicha nna a jɔŋɛ ma ase. Ma alɛ baŋ malga, baa wora ma kasonu nna.

⁴⁶ Bumo be tama loge nɛ b shi bumo be kekuŋ be kumɔlga be kakpa n chicha a ba.

⁴⁷ Enyɛnpe Ebɔrɛ fo wɔtɔ! Meeŋ di fo epaŋ! Fo la kejembu nna nɛ mee ŋana fo to! Meeŋ maŋkura fo ŋkpal fo ka mɔlga ma so.

⁴⁸ Fo e naa wora a tal to a sa ma, nsaa shin nɛ mee ji efuliana na kikɛ so eleŋ.

⁴⁹ Fo e naa mɔlga ma ashi ma doŋana kutɔ. O Enyɛnpe Ebɔrɛ fo e naa shin nɛ mee kɔ a pɔɔ ma doŋana so. Fo alɛ e naa kuŋ ma ashi basa nɛ baa ta eleŋ a tintiŋ basa na kutɔ.

⁵⁰ Amoso meeŋ di fo epaŋ nɛ efuli kikɛ e nu, nseŋ boŋ kashɛ m maŋkura fo ketre.

⁵¹ Fo Ebɔrɛ e naa sa esa nɛ fo lara fanɛ e baa la ewura na kekɔmpɔɔso be eleŋ. Fo alɛ be kasha nɛ fo kɔ n sa fo ewura laraso Deevid nɛ mbe kaman to ebi na maa loge kikɛ.