2 Samuɛl 21 - EBƆRƐ BE KAWƆL

B ka mɔ Sɔɔl be kanaŋ to ebi be asheŋ

¹ Saŋɛ nɛ Deevid la ewura na nɛ akoŋgboŋ ko daŋ tɔr nfɛ asa. Ndoŋ nna nɛ Deevid bishi Enyɛnpe Ebɔrɛ kusɔ nɛ e beeŋ wora a laŋɛ akoŋ na be kaplɛa so. Nɛ Enyɛnpe Ebɔrɛ kaŋɛ mo le: “Ewura Sɔɔl nɛ mbe kanaŋ wora kulubi ŋkpal b ka mɔ Gibiɔnebi so.”

² Gibiɔnebi na daa maŋ la Israɛlebi, b daa la Amɔriebi be katuŋ fimbi ko nna nɛ Israɛlebi na daŋ nase kɔnɔ n sa bumo fanɛ baŋ baa kuŋ bumo. Ama Sɔɔl daŋ wora ania nɛ e mur bumo nna ŋkpal e ka daa sha fanɛ Israɛlebi nɛ Judaebi e sɔ bumo be efuli na kikɛ so.

³ Ndoŋ nna nɛ Deevid tre Gibiɔnebi na ŋ kaŋɛ bumo le: “Manɛ nɛ menyee sha ŋ ka wora nɛ k wushi menyi kagbene ŋkpal kusɔ nɛ Sɔɔl wora na so, saŋɛ na so menyeeŋ kule Ebɔrɛ nɛ e wu anyi mbe basa kuwɔr?”

⁴ Nɛ Gibiɔnebi na kaŋɛ le: “Shuwa nɛ gbiti maaŋ tiŋ ŋ ka kusɔ nɛ Sɔɔl nɛ mbe kanaŋ wora anyi na be kukɔ. Anyi alɛ maŋ kɔ ekpa nɛ an mɔ Israɛl be esa n tal to.” Nɛ Deevid kaŋɛ bumo le: “Meeŋ wora kusɔ kama nɛ menyee sha ŋ ka wora n sa menyi.”

⁵ Nɛ b yɛ: “Sɔɔl daa sha kemur anyi kikɛ nna, saŋɛ na so anyi be ekama maaŋ naa wɔ Israɛl be efuli so.

⁶ Amoso, lara mbe kanaŋ to be benyɛn ashunu n sa anyi nɛ an ya chɛ bumo efɔl n shiga ashi Enyɛnpe Ebɔrɛ be ewura laraso Sɔɔl be kade nɛ baa tre Gibia na be kakpa nɛ baa bunyaŋ Enyɛnpe Ebɔrɛ na.” Nɛ Deevid yɛ: “Meeŋ ta bumo n sa menyi.”

⁷ Ama ŋkpal kashenteŋ be kɔnɔ naseso nɛ Deevid nɛ Jonatan nase n sa abar na so Deevid daŋ yige Sɔɔl mo nanabi Mifiboshɛf nɛ e la Jonatan pibi na bre nna.

⁸ Sɔɔl nɛ Ayai pibiche Rizpa daŋ kurge mbinyɛnsobi anyɔ nna. Bumo e daa la Amoni nɛ Mifiboshɛf. Sɔɔl pibiche Merab gba nɛ Bazilai pibinyɛn Adriɛl nɛ e shi Mɛhola na daŋ kurge mbinyɛnsobi anu nna.

⁹ Bumo nɛ Deevid daŋ ta n sa Gibiɔnebi na nɛ b ya chɛ efɔl ashi kebee so be kakpa nɛ baa bunyaŋ Enyɛnpe Ebɔrɛ na nɛ bumo basa ashunu na kikɛ wu kachɛ koŋwule, saŋɛ so nɛ b baŋ fara a buri akoŋboyu na.

¹⁰ Ndoŋ nna nɛ Sɔɔl mo jipo Rizpa buu kagbenejijaso be asɔbuuso nseŋ wora kekpata ashi kefalta nɛ bubuni na dese na so n chena ndoŋ saŋɛ nɛ b fara a buri akoŋboyu na n ya fo dɔchubɔrɛ be saŋɛ so. E daa ju mbuibi kapaso nna nsaa ju kupuŋ to be asɔbɔya malɛ kanyɛso ashi bubuni na to.

¹¹ Deevid ka nu kusɔ nɛ Rizpa wora na,

¹² nɛ e ya sɔ Sɔɔl nɛ mo pibi Jonatan be kebuni be awibi ashi Jabesh Giliad be basa na kutɔ. Filistiebi e daŋ mɔ Sɔɔl nɛ Jonatan ashi Gilbɔa be kebeegboŋ na ase saŋɛ nɛ bumo nɛ Israɛlebi daa kɔ kena na nseŋ ta bumo be eyurana n ya chɛ n shiga egbal nɛ b pɔr ŋ kulti Bɛfshan na be kowushina nɛ Jabesh Giliad be basa ya yuri bumo be eyurana na n yɔ bumo pe n ya chɔɔ.

¹³ Ewura Deevid ka sɔ Sɔɔl nɛ Jonatan be awibi na nɛ e muu basa ashunu nɛ b chɛ efɔl m mɔ na gba be awibi n ti amo so.

¹⁴ Sɔɔl mo tuto Kish be nchaŋ to ashi Zɛla nɛ k wɔ Bɛnjamin be kasawule so na nɛ b daŋ puli Sɔɔl nɛ Jonatan be awibi fanɛ kananɛ ewura Deevid kaŋɛ bumo fanɛ b wora na. Ade kikɛ be kaman nɛ Ebɔrɛ nu bumo be kabɔrɛkule nseŋ nɛfa bumo be kasawule nɛ akoŋ nɛ k daŋ tɔr na loge.

B ka kɔ Filistiebi kena be asheŋ

¹⁵ Kachako nɛ kena ko naŋ koso Filistiebi na nɛ Israɛlebi be kefɛato, nɛ ewura Deevid nɛ mbe basa yɔ nɛ b ya kɔ Filistiebi na. B ka bee kɔ kena na nɛ ewura Deevid gben.

¹⁶ Kanyɛn gboŋgboŋi ko nɛ baa tre Ishbibenɔb nɛ e shi Rafa be kanaŋ to a kɔ danyaŋ be kekpa nɛ kumo be egbɛ daa sa fanɛ kilo asa, nɛ tokobi popɔr to na fɛ fanɛ e beeŋ tiŋ m mɔ Deevid.

¹⁷ Ndoŋ nna nɛ Zeruwa pibinyɛn Abishai daŋ ba mɔlga Deevid nseŋ mɔ kanyɛn gboŋgboŋi na. Kumo be kaman nɛ Deevid be basa na shin nɛ Deevid nase kɔnɔ fanɛ e maaŋ naa tu bumo a yɔ kena to. Nseŋ kaŋɛ mo le: “Anyi maa sha kepaŋ fo, ŋkpal manɛ so fo nɛ Israɛlebi kikɛ bee fute a yige so.”

¹⁸ Kede be kaman nɛ kena ko malɛ naŋ koso Israɛlebi nɛ Filistiebi na be kefɛato ashi Gɔɔb. Loŋ be kena na to nɛ Sibɛkai nɛ e shi Husha na mɔ kanyɛn gboŋgboŋi ko nɛ baa tre Saaf nɛ e la Rafa be kanaŋ to be esa na.

¹⁹ Kena ko gba daŋ naŋ koso bumo nɛ Filistiebi na be kefɛato ashi Gɔɔb. Kena na to nɛ Jair pibinyɛn Elhanan nɛ e shi Bɛtlɛhɛm na daŋ mɔ Goliɛf mo sipo Lami nɛ e la Giti be esa nɛ mbe kekpa be kedibi be bumburuŋ daa du fanɛ esa be keyapuye na.

²⁰ Ndoŋ nna nɛ kena ko malɛ naŋ koso ashi Gaaf. Kanyɛn gboŋgboŋi ko nɛ mo alɛ gba shi Rafa be kanaŋ to nsaa sha kolu ga na daa wɔ ndoŋ. Ashilbi ashe she nɛ anashibi ashe she nɛ e daa kɔ.

²¹ E daa tege Israɛlebi na nna, nɛ ewura Deevid mo da Shamaa pibinyɛn Jonatan malɛ mɔ mo.

²² Le be basa ana gboŋgboŋi ere kikɛ daŋ shi Rafa be kanaŋ to nna ashi Gaaf nɛ Deevid nɛ mbe benapo mɔ bumo kikɛ.