2 Samuɛl 20 - EBƆRƐ BE KAWƆL

Shɛba ka kini kenu n sa Deevid be asheŋ

¹ Kanyɛn ko nɛ e daa ku asheŋ nɛ baa tre Shɛba nɛ e la Bikri pibinyɛn nseŋ shi Bɛnjamin be yiri to daa wɔ Gilgaal nna. E daŋ foŋ kabel nna m ber kubomboŋ ŋ kaŋɛ le: “Men sa maŋ bɛ Jɛsi pibinyɛn Deevid so! E maŋ la anyi to be eko! Israɛlebi men shin nɛ an yɔ epe!”

² Ndoŋ nna nɛ Israɛl be basa na shile ewura Deevid n ya bɛ Shɛba so, ama Juda be basa na bre daŋ bugi kagbene nna m bɛ Deevid so ashi Jɔɔdan be Lɔr na ase kikɛ hale n ya fo Jerusalɛm.

³ Ewura Deevid daŋ shin nna nɛ mo jipoana kudu na bee keni mbe laŋ so ashi Jerusalɛm. Ama e kaŋ naŋ bɛta m ba na nɛ e shin nɛ b yɛr bumo n ya wɔtɔ laŋ pɔtɛ to nseŋ shin nɛ bekumpo bee keni bumo so. E daa sa bumo kusɔ kama nɛ k tir bumo ama mo alɛ nɛ bumo daa maŋ di keche nɛ kenyɛn. Bumo alɛ daŋ baa wɔ laŋ na to nna fanɛ bekulpoche hale n ya fo bumo luwu be jemanɛ.

⁴ Ndoŋ nna nɛ ewura Deevid kaŋɛ Amasa le: “Tre Juda be benapo na kikɛ nɛ fo nɛ bumo e ba nfe nchɛ asa be kefɛato.”

⁵ Nɛ Amasa fara a tre benapo na nseŋ nya bumo m ba ewura kutɔ nchɛ asa be kefɛato na.

⁶ Nɛ ewura na kaŋɛ Abishai le: “Bikri pibinyɛn Shɛba beeŋ tɔrɔ anyi a chɔ Absalɔm. Amoso, ya keta ma benapo lempo na n ju m bɛ mo so, nɛ e maaŋ nya ekpa n luri kade nɛ b pɔr egbal ŋ kulti na to ŋ ŋana anyi so.”

⁷ Ndoŋ nna nɛ Abishai keta Jɔab nɛ benapo lempo na kikɛ, nɛ ewura be bekumpo n lar Jerusalɛm a fin Shɛba a yɔ.

⁸ B ka bee yɔ n ya fo Gibiɔn be kefalta gboŋ na ase nɛ Amasa ba tu bumo ndoŋ. Jɔab malɛ daŋ buu mbe anasɔ nna nɛ mbe kasaŋɛbi wɔ kumo be efar to a chɛ mbe kashɛr to a chul. E ka bee ba Amasa kutɔ, nɛ mbe kasaŋɛbi na lar kumo be efar to n tɔr.

⁹ Nɛ Jɔab kaŋɛ Amasa le: “Ŋkurgepo, alenfia wɔtɔ a?” Nɛ e ta enɔ jisa m pɛ mbe katɔl to m ber mo to kashaso.

¹⁰ Ama Amasa malɛ daa maŋ nyi Jɔab ka keta kasaŋɛbi na mbe enɔ ko to. Ndoŋ nna nɛ Jɔab ta kasaŋɛbi na n da Amasa be epun hale nɛ mbe apumbi lar n tɔr kasawule nɛ e wu epul na to ndoŋ. Jɔab maŋ da mo kasaŋɛbi na ale anyɔ. Kumo be kaman nɛ Jɔab nɛ mo sipo Abishai bee ju Shɛba.

¹¹ Nɛ Jɔab be basa na be eko ba yili Amasa be kebuni na ase ŋ kaŋɛ awɔrso le: “Ekama nɛ e nyi fanɛ Jɔab nɛ Deevid nɛ e bɛso, kumo ere e bɛ Jɔab so!”

¹² Nɛ Amasa dese ŋklaŋ to ekpa na be nferinto. Jɔab be esa na ka wu fanɛ ekama nɛ e bee choŋ beeŋ yili ŋ keni mo, nɛ e gbeye kebuni na ekpa na to n ya nase kupuŋ to nseŋ ta keta m buu kumo so.

¹³ B ka lɔŋɛ kebuni na ekpa na to n nase na so, benapo na maŋ naŋ ba ka shir a yili. B daŋ baa bɛ Jɔab so nna a shile a ju Shɛba.

¹⁴ Shɛba daŋ bɔla Israɛl be nnaŋ na kikɛ be efuli so nna n yɔ Abel Bɛf Maaka. Ndoŋ nna nɛ Bikri be kanaŋ to ebi na malɛ ba abar so m bɛ mo so n luri kade to.

¹⁵ Jɔab be basa na ka nu fanɛ Shɛba wɔ kade na to na nɛ b yɔ n ya kulti kumo n wɔtɔ nseŋ gbare shishɛr n deŋi abar so egbal na be kaman nɛ benapo na e ba bɔla amoso a luri kade na to nseŋ fara n ta ndibi gbɛgbɛso a da egbal na nɛ b futi kumo n luri.

¹⁶ Kache nyiashempo ko malɛ daa wɔ kade na to nseŋ yili egbal na so a wora awɔr a kaŋɛ le: “Keni nfe; Kaŋɛ Jɔab nɛ e ba nfe, ŋkpal manɛ so mee sha k malga mo kutɔ nna.”

¹⁷ Jɔab ka yɔ nɛ kache na bishi mo le: “Fo e la Jɔab na a?” Nɛ Jɔab yɛ: “Mm, ma nna.” Ndoŋ nna nɛ kache na kaŋɛ mo le: “Nu kusɔ nɛ mee kaŋɛ fo ere!” Nɛ mo alɛ yɛ: “Mee nu.”

¹⁸ Nɛ kache na kaŋɛ le: “Dra na, b daa kaŋɛ nna fanɛ nɛ fee sha k wu fo asheŋ be anishi kumo ere fo yɔ Abel, loŋ malɛ gbagba na e naa wora na.

¹⁹ Kadegboŋ nɛ kagbenewushi be kade e la anyi be kade ere ashi Israɛl kikɛ nɛ feeŋ tiŋ n yirda kumo be basa. Amoso manɛ e ba nɛ menyee sha k jija kade nɛ k du fanɛ enio ashi Israɛl, ŋko menyee sha nna nɛ meeŋ mur kusɔ nɛ k la Enyɛnpe Ebɔrɛ peya?”

²⁰ Nɛ Jɔab kaŋɛ le: “Kaarɛ gba! Maa ba nɛ m bure ŋko m mur kade ere kikɛ!

²¹ Ŋkpal manɛ so, anyi ere maŋ kɔ loŋ be nfɛra. Bikri pibinyɛn Shɛba nɛ e shi kebee so be kade ko nɛ k wɔ Efrayim na e nyaŋɛto a kɔ ewura Deevid. Fo baŋ tiŋ n nya mo n sa ma bre, kumo ere ma alɛ maaŋ naŋ wora menyi be kade na shɛŋ.” Nɛ kache na yɛ: “Anyi beeŋ ta mbe kumu ŋ kpa egbal na be kaman n sa menyi.”

²² Ndoŋ nna nɛ e yɔ kade na be basa kutɔ nɛ mo nɛ bumo kre ŋkre nɛ b ku Shɛba be kumu n ta kumo ŋ kpa egbal na be kaman n sa Jɔab. Nɛ Jɔab foŋ kabel a ŋini fanɛ mbe benapo na e lar kade na to. Benapo na ka lar n choŋ epe nɛ Jɔab malɛ bɛta n yɔ ewura Deevid kutɔ ashi Jerusalɛm.

Deevid be benimu be asheŋ

²³ Jɔab e daa la Israɛl be benapo na kikɛ be enimu nɛ Jehowada pibinyɛn Bɛnaya malɛ daa la basa nɛ baa kuŋ Deevid na be enimu,

²⁴ Adoniram e daa la anya nɛ baa tintiŋ nɛ baa shuŋ na be enimu; Nɛ Ahilud pibinyɛn Jehoshafat malɛ daa la esa nɛ e bee sibɛ asheŋ a nase kawɔl to.

²⁵ Shiiva malɛ e daa la bumo be demujikpa be esibɛpo, Zadɔk nɛ Abiata e daa la bɔrɛmatapoana.

²⁶ Nɛ Ira nɛ e shi Jaari be kade to na daa la ewura Deevid be bɔrɛmatapo.