2 Samuɛl 2 - EBƆRƐ BE KAWƆL

B ka buu Deevid Juda be kuwura be asheŋ

¹ Ade kikɛ be kaman nɛ Deevid bishi Enyɛnpe Ebɔrɛ le: “K daga fanɛ n yɔ Juda be ndeana ere be kuko to a?” Nɛ Enyɛnpe Ebɔrɛ shuli so ŋ kaŋɛ: “Mm!” Nɛ Deevid naŋ bishi le: “Kade mo e daga ŋ ka yɔ?” Nɛ Enyɛnpe Ebɔrɛ kaŋɛ: “Yɔ Hibrɔn!”

² Ndoŋ nna nɛ Deevid keta mbe beche anyɔ, Ahinɔam nɛ e shi Jizreel na nɛ ekulpoche Abigɛl nɛ e daa la Nabaal nɛ e shi kebeegboŋ nɛ baa tre Kaamɛl na be eche na n yɔ Hibrɔn.

³ Kumo be kaman nɛ e keta benyɛn nɛ b wɔ mo kutɔ na gba nɛ bumo be kanaŋ to ebi n ya chena Hibrɔn nɛ kumo be ndekarso.

⁴ Ndoŋ nna nɛ Juda be basa na ba Hibrɔn m ba duga ŋku n do Deevid be kumu so a ŋini fanɛ b buu mo Juda be kuwura. Deevid ka nu fanɛ Jabesh nɛ k wɔ Giliad na be basa e puli Sɔɔl,

⁵ nɛ e shuŋi benyɛn ko fanɛ b ta kubɔya ere n ya sa bumo: “Enyɛnpe Ebɔrɛ e nɛfa menyi ŋkpal men ka wora menyi be ewura kelela nseŋ puli mo so.

⁶ Enyɛnpe Ebɔrɛ be alelasheŋ nɛ mbe kagbene koŋwule so be asheŋ woraso e baa wɔ menyi so. Ma alɛ gba beeŋ keta menyi nɛnɛ ŋkpal kusɔ nɛ men wora ere so.

⁷ Men baa kɔ eleŋ nsaa kɔ kenyɛn! Menyi be ewura Sɔɔl wu, nɛ Juda be basa ta ma ŋ ki bumo be ewura.”

B ka buu Ishboshɛf Israɛl be kuwura be asheŋ

⁸ Neer pibi Abna nɛ e daa la Sɔɔl be benapo be enimu na daŋ ta Sɔɔl pibi Ishboshɛf nna n shile n dii Jɔɔdan be lɔr na n yɔ Mahanaim.

⁹ Ndoŋ nna nɛ Abna shin nɛ Ishboshɛf ki Giliad nɛ Ashɛr nɛ Jizreel nɛ Efrayim nɛ Bɛnjamin nɛ Israɛl be efuli so kikɛ be ewura.

¹⁰ Ishboshɛf daŋ ji nfɛ adena nna pɔɛŋ nseŋ ba ji Israɛl be kuwura nfɛ anyɔ. Loŋ be jemanɛ na, Juda be kanaŋ to ebi bre daŋ bugi kagbene nna a shuŋ Deevid fanɛ bumo be ewura.

¹¹ Hibrɔn to nɛ Deevid daŋ chena n ji Juda be efuli so be kuwura nfɛ ashunu nɛ bargato.

Israɛl nɛ Juda be kena be asheŋ

¹² Kachako nɛ Abna nɛ Ishboshɛf be benapo lar Mahanaim be kade to n yɔ Gibiɔn

¹³ nɛ Jɔab nɛ mo nio la Zeruwa na malɛ keta Deevid be benapo nɛ bumo nɛ bumo ya tu abar ashi Gibiɔn be kepa na ase. Abna nɛ mbe basa daŋ yɔ kepa na be kaba ko so nna nɛ Jɔab malɛ nɛ mbe basa dii n yɔ kumo be kaba ko so.

¹⁴ Nɛ Abna ponte ŋ kaŋɛ Jɔab le: “Men shin nɛ an lara anyi be benapo ere be bumo nɛ b kɔ eleŋ ga nɛ b kɔ abar nɛ an keni.” Nɛ Jɔab shuli so ŋ kaŋɛ le: “K nyalɛ.”

¹⁵ Amoso benyɛn kuduanyɔ e daŋ yili n sa Ishboshɛf nɛ e la Sɔɔl pibinyɛn nsɛŋ shi Bɛnjamin be kanaŋ to, n tu Deevid be benyɛn kuduanyɔ na ŋ kɔ.

¹⁶ Ndoŋ nna nɛ b to m pɛ abar be amu to n da abar nsaŋɛbi nɛ bumo basa adunyɔ nɛ ana na kikɛ wu. Ndoŋ nna nɛ b nase kaboŋ na ashi Gibiɔn fanɛ: “Etokobi be kasawule.”

¹⁷ Nɛ kolu gboŋgboŋi ko koso, nɛ Deevid be basa pɔɔ Abna nɛ mbe basa Israɛlebi na so.

¹⁸ Zeruwa gba be mbinyɛnbi asa daŋ ti bumo so. Bumo e daa la Jɔab nɛ Abishai nɛ Asahɛl. Ndoŋ nna nɛ Asahɛl nɛ e daa shile ga fanɛ chibir na,

¹⁹ ju m buu Abna so tinini nɛ e ya pɛ mo,

²⁰ nɛ Abna gbɛ ŋ keni n wu mo nseŋ kaŋɛ le: “Asahɛl, fo nde a?” Nɛ e shuli so ŋ kaŋɛ: “Mm, ma nna.”

²¹ Nɛ Abna kaŋɛ mo le: “Yige kebaaju a bɛ ma so! Shile m bɛ benapo ere be eko so n ya pɛ mo n sɔ kusɔ nɛ e kɔ.” Amo kikɛ nɛ Asahɛl kraŋ kini a ju a buu mo so.

²² Nɛ Abna naŋ laŋɛ ŋ kaŋɛ mo le: “Fo baa maŋ bɛta ma so, k beeŋ ki tintiŋ nna n sa ma fanɛ m mɔ fo! Nɛ loŋ malɛ wora, m maaŋ naŋ tiŋ ŋ keni fo da Jɔab be anishito.”

²³ Ama Asahɛl maŋ pɔ aba, amoso Abna daŋ ta mbe kekpa be kedibi nna n da Asahɛl be epun hale nɛ k futi n lar mbe kaman. Ndoŋ nna nɛ Asahɛl tɔr kasawule n wu. Ekama malɛ nɛ e bee choŋ nseŋ wu mo bee yili nna ŋ keni mo kakpa nɛ e wu a dese na.

²⁴ Ama epeŋi ka bee tɔr nɛ Jɔab nɛ Abishai shile n ju Abna n ya fo Ammaa be kebee nɛ k wɔ Giya be epeŋilarkpa be kaba so a yɔ ekpa nɛ k dese a yɔ Gibiɔn be kiyi to na.

²⁵ Nɛ Bɛnjamin be kanaŋ to ebi be benyɛn ko ba kulti Abna ashi kebee na be esoso nɛ b kɔ mo kena.

²⁶ Nɛ Abna ponte awɔrso ŋ kaŋɛ Jɔab le: “K daga fanɛ an baa wɔtɔ a kɔ abar mbaanaayɔ a? Fo maŋ nyi fanɛ kumo be lalaloge anyi maaŋ nya shɛŋ, ama kenyaŋɛto n wɔtɔ abar a? An la menyi be efuli so ebi nna, saŋɛ mo nɛ feeŋ kaŋɛ fo basa nɛ b yige kebaakɔ anyi?”

²⁷ Nɛ Jɔab kaŋɛ le: “Ebɔrɛ e la ma shɛdajipo. Nɛ fanɛ fo daa maŋ malga nna, dafanɛ ma basa ere kraa beeŋ ju m bɛ menyi so hale n ya fo echefo chipurso.”

²⁸ Kumo be kaman nɛ Jɔab foŋ kabel nɛ mbe basa yige kebaaju a bɛ Israɛlebi na so. Ndoŋ nna nɛ kolu na ku.

²⁹ Nɛ Abna nɛ mbe basa nite kanyɛso na kikɛ m bɔla Jɔɔdan be ketaŋɛ na to n ya dii Jɔɔdan be Lɔr na, nseŋ nite loŋ nɛ kare ya chɛ nɛ b ta n chuge so hale n ya Mahanaim.

³⁰ Jɔab ka yige bumo be keju na, nɛ e shin nɛ mbe basa kikɛ ba abar so, nɛ e karga bumo nseŋ pin fanɛ mbe basa kuduakpanu kikɛ e daŋ foe, n ta Asahɛl gba daŋ ti so.

³¹ Abna nɛ e shi Bɛnjamin be kanaŋ to na be basa alfa asa nɛ adeshe nɛ Deevid be basa daŋ mɔ.

³² Jɔab nɛ mbe basa daŋ ta Asahɛl be kebuni nna n ya puli bumo kanaŋ to be kejembu laŋ be nchaŋ to ashi Bɛtlɛhɛm. Kumo be kaman nɛ b nite kumo be kanyɛso na kikɛ n ya fo Hibrɔn kachipurdidi.