2 Samuɛl 19 - EBƆRƐ BE KAWƆL

Jɔab ka malga ŋ gbiti Deevid be asheŋ

¹ Ndoŋ nna nɛ b kaŋɛ Jɔab fanɛ ewura Deevid bee shu Absalɔm be keeli.

² Benapo na ka nu fanɛ Deevid bee shu mo pibinyɛn be keeli na nɛ bumo be kekɔmpɔɔso be kagbenefuli na kilgi kagbenejija kumo be kamɔnchɛ.

³ Ndoŋ nna nɛ benapo na bɛta boeŋ n yɔ kade to fanɛ benapo nɛ b ta anishinyɔr a shile kena na.

⁴ Ewura Deevid daŋ buu mbe anishi so nna a shu awɔrso a kaŋɛ le: “O m pibinyɛn! Absalɔm! Absalɔm, m pibinyɛn!”

⁵ Nɛ Jɔab yɔ ewura na be laŋ to n ya kaŋɛ mo le: “Kabre fo ta anishinyɔr m pɛ fo benapo nɛ b mɔlga fo nɛ fo mbinyɛnbi nɛ mbichebi nɛ fo beche nɛ fo jipoana be ŋkpa na ga.

⁶ Basa nɛ baa sha fo na nɛ fo kishi nsaa sha bumo nɛ b kishi fo na bre! Fo shin nɛ k dii efuli naniere fanɛ fo benapo nɛ bumo be benimuana na kikɛ maŋ la shɛŋ fo kutɔ. Nɛ Absalɔm daa wɔ ŋkpa to nɛ anyi ere kikɛ wu gba, fo kagbene daa beeŋ fuli fo.

⁷ Yɔ n ya leŋ fo basa na to naniere kikɛ. Enyɛnpe Ebɔrɛ na be ketre be eleŋto so, nɛ fo baa maŋ yɔ, ta a ba echefo chipurso saŋɛ ere esa koŋwule gba maŋ naŋ ka a bɛ fo so. Kumo alɛ be loŋ na beeŋ lubi a chɔ etɔrɔ kama nɛ a daŋ tu fo ŋ ku so na kikɛ.”

⁸ Ndoŋ nna nɛ ewura na koso n ya chena kade na be kabuna to. Mbe basa na ka nu fanɛ e wɔ ndoŋ nɛ bumo kikɛ yɔ mo kutɔ. Ama le be jemanɛ ere nɛ Absalɔm be bebɛsopo na bre shile n yɔ bumo peana.

Deevid ka bɛta m ba Jerusalɛm to be asheŋ

⁹ Nɛ Israɛl be basa na kikɛ fara a bile asheŋ a kaŋɛ abar le: “Ewura Deevid e mɔlga anyi ashi anyi doŋana kutɔ, nseŋ naŋ mɔlga anyi ashi Filistiebi kutɔ ama e shile n lar efuli ere so ŋkpal Absalɔm so.

¹⁰ Anyi e daŋ ta ŋku n wurge Absalɔm be kumu so fanɛ e ki anyi be ewura, ama e yɔ kena to n ya wu. Manɛ e ba nɛ anyi maaŋ naŋ ya keta Ewura Deevid m ba?”

¹¹ Ewura Deevid ka nu asheŋ nɛ Israɛlebi na kaŋɛ na kikɛ nɛ e shuŋi n ya kaŋɛ bɔrɛmatapoana Zadɔk nɛ Abiata fanɛ b ya bishi Juda be bejuŋkparpoana na le: “Manɛ nna nɛ k ba fanɛ menyi e shir kaman n fɛ ewura be kelaŋɛ m ba mbe laŋ to be asheŋ?

¹² Ŋ kurgepoana e la menyi nɛ ma nɛ menyi la eyur nɛ ŋklaŋ koŋwule, nɛ manɛ e ba nɛ men shir kaman m ba nɛ men ba kaŋɛ ma fanɛ m bɛta m ba?”

¹³ Kumo be kaman nɛ ewura Deevid naŋ kaŋɛ bumo fanɛ b kaŋɛ Amasa malɛ le: “Ŋkpal fo ka la ŋkurgepo so, yili kabre a yɔ, fo e naaŋ ki benapo nɛ Jɔab bee keniso na be enimu. Nɛ m baa maŋ wora loŋ, Ebɔrɛ e bishi ma!”

¹⁴ Ndoŋ nna nɛ Deevid be mmalga na shin nɛ Juda be basa na kikɛ be ŋgbene kilgi m bɛ mo so nɛ b shuŋi ŋ kaŋɛ fanɛ mo nɛ mbe benapo na kikɛ e bɛta m ba Jerusalɛm.

¹⁵ Ewura na ka bɛta a ba nɛ e ba tu Juda be basa ko ashi Gilgaal nɛ baa ba Jɔɔdan be lɔr na to nɛ b ba keta mo n dii.

¹⁶ Loŋ be saŋɛ na so gbagba nɛ Shemei nɛ e la Bɛnjamin be yiri to be esa nsaa la Gɛra nɛ e shi Bahurim na pibinyɛn nya manaŋ n ya tu Juda be basa na ashi Jɔɔdan be lɔr na to nɛ b ya shɛr ewura Deevid to.

¹⁷ Shemei daŋ keta basa kagboŋ nɛ b shi Bɛnjamin be yiri to nna, nɛ Ziba nɛ e daa la Sɔɔl be kanaŋ to be kayɛrbi na nɛ mbe mbinyɛnbi kuduanu nɛ mbe nyɛrbi adunyɔ e daŋ ba Jɔɔdan be lɔr na to nɛ b ba shɛr ewura Deevid to.

¹⁸ Ndoŋ nna nɛ b keta ewura na nɛ mbe laŋ to ebi m bɔla Lɔr na be kakpa nɛ k maŋ wɔ nchiŋ na n dii nseŋ wora mbe aparsheŋ kikɛ n sa mo. Shemei ka dii lɔr na, nɛ e dese kasawule m bunyaŋ ewura Deevid

Deevid ka wora Shemei kelela be asheŋ

¹⁹ nseŋ kaŋɛ mo le: “Yiramu! Jande, ta alubi nɛ n wora fo kachɛ nɛ fee lar Jerusalɛm to na m paŋ ma. Jande ta m paŋ ma nsaa maŋ naa nyiŋi amo.

²⁰ N nyi ŋ ka wora kulubi ŋ gbiti fo, amoso nɛ n juŋkpar ashi kelargato be esoso be kaba so be eyiri na kikɛ m ba nɛ m ba shɛr fo to kabre na Yiramu.”

²¹ Ndoŋ nna nɛ Zeruwa pibinyɛn Abishai kaŋɛ le: “A daga b ka mɔ Shemei ŋkpal e ka sho Enyɛnpe Ebɔrɛ be ewura lara so na kɔnɔ so.”

²² Ama Deevid daŋ kaŋɛ Abishai nɛ mo da Jɔab nna le: “Menyi e naa ŋini ma kusɔ nɛ meeŋ wora a? Ŋko asheŋ nɛ menyee sha nɛ men fin n sa ma a? Naniere bre, ma e la Israɛl kikɛ be ewura, ma alɛ maa sha fanɛ b mɔ Israɛl be esa kikɛ kabre.”

²³ Ndoŋ nna nɛ ewura na nase kɔnɔ n sa Shemei fanɛ e maaŋ mɔ mo.

Deevid ka wora Mifiboshɛf kelela be asheŋ

²⁴ Nɛ Sɔɔl mo nanabi Mifiboshɛf gba koso n lar n ya shɛr ewura Deevid to. Baŋ yili saŋɛ so nɛ ewura na lar Jerusalɛm to n naŋ ya bɛta m ba nɛ alenfia na kikɛ, Mifiboshɛf daa maŋ fɔr mbe aya gba so, e daa maŋ she mbe katɔl, mo alɛ daa maŋ naŋ fɔr mbe asɔbuuso gba.

²⁵ Mifiboshɛf ka shi Jerusalɛm n fo ewura na kutɔ nɛ e bishi mo le: “Mifiboshɛf manɛ nna nɛ fo daa maŋ bɛ ma so n yɔ?”

²⁶ Nɛ e kaŋɛ le: “Yiramu, fo nyi ŋ ka la bobi. Ma alɛ ka kaŋɛ ma kayɛrbi fanɛ e mɛa ma kurma to nɛ n dii n tu fo n yɔ nɛ e kini nseŋ shile ŋ ka ma.

²⁷ E daŋ ya ku efɛ nna deŋi ma n sa fo. Yiramu, ama ŋkpal fo ka du fanɛ Ebɔrɛ be kabɔ so, fo wora kusɔ kama nɛ k par fo.

²⁸ Fo Yiramu daŋ daga fo ka mɔ n tuto be kanaŋ to be basa kikɛ nna, ama fo wu ma ere kuwɔr hale nseŋ shin nɛ mee tu fo gba a ji. Amoso, a maŋ daga ŋ ka naŋ kule fo shɛŋ.”

²⁹ Ndoŋ nna nɛ ewura na kaŋɛ le: “Fo ere e sa maŋ naŋ malga shɛŋ. N tiŋ n yili kumo fanɛ fo nɛ Ziba e naaŋ barga Sɔɔl be kapetɛ to.”

³⁰ Nɛ Mifiboshɛf kaŋɛ le: “Shin nɛ Ziba e ta kapetɛ na kikɛ. Yiramu k wora ma ebel ga fo ka ba epe nɛ alenfia.”

Deevid ka wora Bazilai kelela be asheŋ

³¹ Bazilai nɛ e la Giliad be esa na gba daŋ shi Rogelim nna m ba nɛ e ba tu ewura na n dii Jɔɔdan be Lɔr na.

³² Bazilai daa la enyɛnnimu nna nseŋ ji fanɛ nfɛ aduburwa. E daa la damawura nna, nseŋ daa sa ewura na ajibi saŋɛ nɛ e daa wɔ Mahanaim na.

³³ Nɛ ewura na kaŋɛ mo le: “Shin nɛ an dii n yɔ Jerusalɛm nɛ fo ya chena ŋ kutɔ nɛ m ba keni fo so.”

³⁴ Nɛ Bazilai malɛ kaŋɛ le: “Yiramu! Nchɛ afanɛ bre nɛ meeŋ naaŋ ji nseŋ ya kaa chena fo kutɔ ashi Jerusalɛm?

³⁵ Yiramu! Ma nfɛ aduburwa nna na. Shɛŋ shɛŋ malɛ maŋ naa yɛlga ma. Ajibi ŋko asɔnuuso kikɛ maŋ naa wora ma ebel. Ma alɛ maŋ naa nu nshɛ gba be ebel, amoso maa sha keki esulɔ n sa fo.

³⁶ Le be kakɔka ere maŋ daga ma. Ama meeŋ shuŋi fo n ya dii Jɔɔdan be Lɔr na n yɔ anishito gbrɛbi.

³⁷ Kumo be kaman nɛ m bɛta n yɔ epe, saŋɛ na so ŋ kaŋ wu nɛ b ta ma n ya puli n tutoana be edesekpa. Ama ma kayɛrbi Chimham bre nde, n ta mo n sa fo. Ta mo a yɔ n ya wora mo kusɔ kama nɛ fee sha Yiramu!”

³⁸ Nɛ ewura Deevid kaŋɛ le: “Meeŋ ta mo a yɔ n ya wora kusɔ kama nɛ fee sha fanɛ n wora n sa mo. Kusɔ kama malɛ nɛ fo alɛ gba bee sha, meeŋ wora kumo n sa fo.”

³⁹ Ndoŋ nna nɛ Deevid be benapo na kikɛ dii Jɔɔdan be Lɔr na. Nɛ mo ere shir kaman n kela Bazilai kashaso nseŋ nɛfa mo nɛ Bazilai bɛta n yɔ epe. Kumo be kaman nɛ Deevid malɛ nɛ Chimham dii n ya tu benapo na.

Juda nɛ Israɛl ka bee ji emɔrɔ ŋkpal Deevid so be asheŋ

⁴⁰ Juda be benapo kikɛ nɛ Israɛl be benapo be bargato ka keta ewura Deevid n dii Lɔr na n yɔ kaba ndoŋ na nɛ e yɔ Gilgaal nɛ Chimham gba bɛ mo so n yɔ.

⁴¹ Ndoŋ nna nɛ Israɛl be benapo na kikɛ yɔ ewura Deevid kutɔ n ya bishi mo le: “Yiramu, manɛ nna nɛ an niopibiana Juda be basa bee fɛ fanɛ bumo e kɔ ekpa nseŋ keta fo nɛ fo kanaŋ nɛ fo benapo kikɛ n dii Jɔɔdan be Lɔr na?”

⁴² Nɛ Juda be basa na malɛ kaŋɛ le: “An wora loŋ nna ŋkpal manɛ so anyi nɛ ewura na la kukoŋwule nna. Manɛ nna nɛ men nya agbo ŋkpal le be kesheŋ ere so? E maŋ sa anyi ajibi, mo alɛ maŋ kɛ anyi shɛŋ malɛ gba.”

⁴³ Nɛ Israɛlebi na malɛ kaŋɛ le: “Hale nɛ menyi nɛ ewura Deevid la kukoŋwule gba, ŋkpal an ka la nnaŋ kudu so, an kɔ mo so eleŋ alɛ kudu a chɔ menyi. Amoso manɛ nna nɛ menyee keni anyi jiga? Men sa maŋ teŋ so fanɛ anyi e daŋ kenya nfɛra fanɛ anyeeŋ ya keta ewura na m ba!” Ama Juda be basa na daŋ nyaŋɛto na ga m malga m pɔɔ Israɛl be basa na so.