2 Samuɛl 18 - EBƆRƐ BE KAWƆL

Absalɔm be luwu be asheŋ

¹ Ewura Deevid daŋ shin nna nɛ mbe benapo ba abar so nɛ e barga bumo to basa kagboŋ kagboŋ nɛ basa kalfa be ntuŋ ntuŋ nseŋ sa katuŋ kama enimu nɛ e bee keni bumo so.

² Kumo be kaman nɛ e shin nɛ ntuŋ na kikɛ ba abar so nɛ e naŋ barga amo to ntuŋ asa nseŋ shin nɛ Jɔab bee keni katuŋ koŋwule so nɛ mo sipo Abishai malɛ bee keni katuŋ nyɔsopo so nɛ Ittai nɛ e shi Gaaf na malɛ bee keni katuŋ sasopo na so. Le nɛ ewura Deevid daŋ kaŋɛ mbe basa na: “Ma nɛ menyi e naŋ yɔ kena na to.”

³ Nɛ bumo alɛ kaŋɛ mo le: “Fo maaŋ bɛ anyi so n yɔ, ŋkpal manɛ so nɛ anyi doŋana baŋ pɔɔ anyi so nɛ anyee shile, ŋko nɛ b mɔ anyi be benapo ere be bargato gba, k bɔ fo ere ka ti anyi so n yɔ, ŋkpal manɛ so, fo asheŋ e tir a chɔ anyi basa ŋgboŋ kudu ere kikɛ. Amoso fo ere e shir a wɔ kade to a ta kechɛto kama nɛ fo kɔ a chise anyi.”

⁴ Nɛ ewura Deevid kaŋɛ le: “Meeŋ wora kusɔ kama nɛ menyee fɛ fanɛ k walɛ n sa menyi.” Ndoŋ nna nɛ e yili m mata kabunagboŋ na a keni mbe basa, nɛ b bɛ abar so a lar ŋgboŋto ŋgboŋto nɛ kalfa kalfa be ntuŋ so.

⁵ Nɛ e kaŋɛ Jɔab, Abishai nɛ Ittai le: “Men sa maŋ kpal ma so n wora Absalɔm kulubi kikɛ.” Nɛ benapo na kikɛ nu kusɔ nɛ ewura Deevid kaŋɛ bumo be benimuana na.

⁶ Kede be kaman nɛ Deevid be benapo na lar n yɔ kupo nɛ baa tre Efrayim na to n ya kɔ Absalɔm be benapo kena.

⁷ Deevid be basa na e daa kɔ a pɔɔ so nna. Benapo nɛ b daŋ wu kena na to kumo be kamɔnchɛ na daa wɔ basa ŋgboŋ adunyɔ.

⁸ Kena na daŋ salga to nna n yɔ kade na be kupuŋ to nɛ kupo na to kikɛ nɛ benapo nɛ b wu ŋkpal kupo na to be awurfoŋ so daa shi a chɔ bumo nɛ b mɔ kena na gbagba to.

⁹ Ndoŋ nna nɛ Absalɔm ba purgi Deevid be benapo ko. E daŋ dii kurma nna m bɔla kedibi gboŋgboŋi ko be kifito nɛ mbe kumu ya fɛga kumo be ayabi to nɛ kurma na shile ŋ ka mo n shiga kedibi na so.

¹⁰ Deevid be benapo na be ako ka wu mo nɛ e ya kaŋɛ Jɔab le: “N wu Absalɔm ka sha kedibi gboŋgboŋi ko so.”

¹¹ Nɛ Jɔab malɛ kaŋɛ mo le: “Nɛ fo ka wu mo, manɛ nna nɛ fo maŋ mɔ mo epul to ndoŋ? N daa beeŋ sa fo gbiti be ndarbi kudu nɛ benapo be kreso.”

¹² Nɛ kanyɛn na malɛ kaŋɛ le: “Hale fo sa ma gbiti be ndarbi kagboŋ gba, maa ba nɛ n teŋi keshilbi gba m beta ewura pibi. Anyi kikɛ nu ewura ka kaŋɛ Abishai nɛ Ittai kenishipereso fanɛ b sa maŋ kaŋ tɔrɔ Absalɔm ŋkpal mo so.

¹³ N daŋ kplaŋ ewura na be kɔnɔ so nseŋ mɔ Absalɔm, e daa beeŋ nu kumo, ŋkpal manɛ so asheŋ kikɛ maa wora a baŋ mo so. Fo alɛ daa maaŋ kuŋ ma.”

¹⁴ Nɛ Jɔab kaŋɛ le: “M maaŋ naŋ yili n jija saŋɛ.” Absalɔm ka sha kedibi gboŋ na so a maŋ naŋ wu na, nɛ Jɔab ta akpa asa m ber abar so n da Absalɔm be kagbene to.

¹⁵ Kumo be kaman nɛ Jɔab be benapo nɛ baa sulɔ mbe akɔsɔ na be kudu malɛ ya kulti mo nseŋ da mo nsaŋɛ m mɔ.

¹⁶ Ndoŋ nna nɛ Jɔab ponte ŋ kaŋɛ fanɛ b foŋ kabel nɛ kena na a ku, saŋɛ na so mbe benapo maaŋ naa shile a bɛ Absalɔm be bebɛsopo na so.

¹⁷ Kumo be kaman nɛ b ta Absalɔm b kebuni n ya lɛ kupo na to be kejamaŋ chiŋgeliŋ ko to nseŋ muu ajembu gboŋgboŋi damta n deŋi mo so kululu. Loŋ be jemanɛ na so nɛ Absalɔm be bebɛsopo na kikɛ pɛ ekpa n shile n yɔ bumo peana.

¹⁸ Jemanɛ nɛ Absalɔm daa wɔ ŋkpa to na, nɛ e yuu ndulgi be kejembu bewura be ketaŋɛ na to ŋkpal manɛ so e daa maŋ kɔ ebinyɛn nɛ e beeŋ baa wɔtɔ kanyiŋiso n sa mo. Amoso mbe ketre nɛ e daŋ ta n nase kejembu na. Hale m ba fo kabre baa tre ndoŋ nna Absalɔm be kapɔrduli be kakpa.

Deevid ka nu Absalɔm be luwu be asheŋ

¹⁹ Ndoŋ nna nɛ Zadɔk pibinyɛn Ahimaaz kaŋɛ Jɔab le: “Shin nɛ n shile n ya kaŋɛ ewura Deevid baru lela ere fanɛ Enyɛnpe Ebɔrɛ na mɔlga mo ashi mo doŋana be enɔ to.”

²⁰ Nɛ Jɔab kaŋɛ mo le: “Ayai! Ŋkpal ewura na pibinyɛn ka wu so, fo maaŋ yɛr baru kikɛ ndoŋ kabre. Ashere kachako nɛ feeŋ wora loŋ mannɛ kabre bre.”

²¹ Ndoŋ nna nɛ e kaŋɛ mbe kenya nɛ e la Itiopia be esa na le: “Yɔ n ya kaŋɛ ewura Deevid kusɔ nɛ fo wu.” Nɛ kenya na jɔŋɛ m bunyaŋ mo nseŋ shile n yɔ.

²² Nɛ Ahimaaz kra marso a kaŋɛ le: “Kusɔ kama nɛ k beeŋ wora gba, ma ere b shɛŋ maŋ wɔtɔ, amoso jande, shin nɛ ma alɛ e ya bɔ baru na.” Nɛ Jɔab bishi mo le: “M pibi, manɛ nna nɛ fee sha kewora loŋ? Fo keya kaŋɛ mo ere maaŋ lar tɔnɔ kikɛ n sa fo.”

²³ Nɛ Ahimaaz naŋ kaŋɛ le: “Kusɔ kama nɛ k la gba ma ere beeŋ yɔ.” Nɛ Jɔab kaŋɛ mo le: “Kumo ere baa yɔ.” Ndoŋ nna nɛ Ahimaaz shile m bɔla Jɔɔdan be ketaŋɛ na be ekpa to n ya baŋ kenya na so n choŋ.

²⁴ Kade na be mbunagboŋ anyɔ nɛ kuko la kakpa nɛ baa bɔla a luri nɛ kakpa nɛ baa bɔla a lar na be kefɛato nɛ Deevid daa tase. Ndoŋ be ekenipo na ka dii kabunagboŋ na be egbal na be ketempreŋ jeŋgreŋ na, nɛ e wu kanyɛn ko nawule ka shil a ba.

²⁵ Nɛ e tre ŋ kaŋɛ ewura na kusɔ nɛ e wu, nɛ ewura na kaŋɛ le: “Nɛ k baa la fanɛ mo nawule bre nna, kumo ere baru lela nɛ e kɔ a ba.” Ade kikɛ nɛ esa na malɛ pere kenishi e shile a taga bumo to.

²⁶ Ndoŋ nna nɛ ekenipo na naŋ wu esa ko malɛ nawule ka bee shile, nɛ e gbelge ŋ kaŋɛ kabuna akpa be ekenipo na le: “Keni! Esa ko malɛ gba e naa shile e ba na!” Nɛ ewura na kaŋɛ le: “Baru lela nɛ mo alɛ gba kɔ a ba na.”

²⁷ Nɛ ekenipo na kaŋɛ le: “K du fanɛ sososo be esa nɛ e shile a ba na duli Zadɔk pibinyɛn Ahimaaz nna.” Nɛ ewura na kaŋɛ le: “Esa lela e la mo nɛ e kɔ baru lela a bar anyi.”

²⁸ Ndoŋ nna nɛ Ahimaaz ponte ŋ kaŋɛ le: “An kɔ m pɔɔ so! An kɔ m pɔɔ so! Kapandi e ba la Enyɛnpe fo Ebɔrɛ nɛ e shin nɛ fo kɔ m pɔɔ basa nɛ b nyaŋɛto a kɔ fo na peya, Yiramu.” Nseŋ ya jɔŋɛ mbe anishito bunyaŋ so.

²⁹ Nɛ ewura na bishi le: “Absalɔm lar a?” Nɛ Ahimaaz yɛ: “Fo benapo be enimu Jɔab ka shuŋi ma na nɛ n nu kebagato be awɔr, ama ma alɛ maŋ pin kusɔ nɛ k la.”

³⁰ Nɛ ewura na kaŋɛ le: “Yɔ ndoŋ ere n ya yili.” Nɛ e yɔ ndoŋ n ya yili.

³¹ Ndoŋ nna nɛ Itiopia be kenya na malɛ ba ewura na kutɔ m ba kaŋɛ mo le: “Yiramu! Baru lela nɛ m bar nɛ m ba sa fo, Enyɛnpe Ebɔrɛ na shin nɛ fo kɔ m pɔɔ basa nɛ b nyaŋɛto a kɔ fo na so kabre!”

³² Nɛ ewura na bishi le: “Absalɔm lar a? E beeŋ pete a?” Nɛ kenya na yɛ: “Kusɔ nɛ k nya mo ere daŋ nya fo doŋana nɛ bekama nɛ b nyaŋɛto a kɔ fo na nna, n dafanɛ k daa beeŋ par ma ga.”

³³ Ndoŋ nna nɛ kagbenejija tɔr ewura na so, nɛ e fara e chicha nseŋ dii n yɔ ebu nɛ k wɔ kabunagboŋ na be esoso na to n ya shu ga. Le nɛ e daa shu a kaŋɛ a yɔ: “O m pibinyɛn! M pibinyɛn Absalɔm! Absalɔm, m pibinyɛn! Nɛ k daa la fanɛ ma e wu gba, k daa bɔ fo ka wu ere.”