2 Samuɛl 17 - EBƆRƐ BE KAWƆL

Hushai ka fule Absalɔm be asheŋ

¹ K maŋ chɛr ko nɛ Ahitofɛl kaŋɛ Absalɔm le: “Meeŋ lara benapo ŋgboŋ kuduanyɔ n ju m bɛ Deevid so kanyɛ ere kikɛ.

² Saŋɛ so nɛ e gben nsaa maŋ naa kɔ eleŋ na nɛ meeŋ fara a kɔ mo. Keyeŋiyeŋi beeŋ tɔr mo so, nɛ mbe basa kikɛ e shile ŋ ka mo nɛ m mɔ mo nawule

³ nseŋ bɛta mbe basa na kikɛ m ba sa fo fanɛ kananɛ eche bee bɛta a ba mo kul pe na. Esa koŋwule nawule nɛ fee sha nɛ fo mɔ basa na kikɛ to nɛ bumo nɛ b ka na e nya bumo be amu.”

⁴ Nɛ Absalɔm nɛ Israɛl be bejuŋkparpoana na wu fanɛ kesheŋ nɛ e kaŋɛ na duli kasotoji lela nna n sa bumo.

⁵ Ndoŋ nna nɛ Absalɔm yɛ: “Men tre Hushai naniere nɛ e ba kaŋɛ anyi kusɔ nɛ mo alɛ kɔ.”

⁶ Hushai ka ba nɛ Absalɔm kaŋɛ mo kusɔ nɛ Ahitofɛl kaŋɛ na nseŋ bishi mo le: “An bɛ kumo so a, ŋko fo kɔ kusɔ ko nɛ fo kaŋɛ anyi?”

⁷ Nɛ Hushai kaŋɛ le: “Ahitofɛl be kasotoji nɛ e sa fo naniere bre maŋ walɛ.

⁸ Fo gbagba na nyi fo tuto Deevid nɛ mbe basa ka bee pere kenishi a kɔ kena ga, bumo alɛ nseŋ naŋ lubi a chɔ shishiri nɛ b mɔ kumo be mbia. Fo tuto nyi kena to nɛnɛ ga amoso e maaŋ tu mbe benapo n dese kakpa koŋwule kanyɛ ere.

⁹ Ashere e ŋana kebeelaŋ to ŋko kakpa ko naniere gba. Basa kama nɛ bumo alɛ baŋ nu fanɛ Deevid bee kɔ fo basa, beeŋ kaŋɛ fanɛ b pɔɔ fo basa so,

¹⁰ nɛ benapo kama nɛ b kɔ kenyɛn fanɛ ebuluŋ gba e fara a lɔ kufu, ŋkpal manɛ so Israɛl ebi kikɛ nyi fo tuto ka la enapogboŋ nɛ mbe basa malɛ bee kɔ kena ga.

¹¹ Ma kasotoji e la fanɛ fo yili Dan be kade to ashi kelargato be esoso be kaba so n chala Israɛl be benapo n ya fo Bɛshiba be kade to be kelargato be kaseto na saŋɛ na so feeŋ nya benapo, nɛ b baa shi fanɛ teku ase be leele na, nɛ fo Absalɔm gbagba e juŋkpar nɛ an ya kɔ Deevid kena.

¹² Loŋ beeŋ shin nɛ an tɔr mo nɛ mbe basa so fanɛ kananɛ bunyaŋ bee tɔr kasawule so na m mur bumo kikɛ ashi kaplɛkama nɛ b wɔ.

¹³ E kaŋ baŋ shile n yɔ kade nɛ k tase kebee so to, anyi be basa kikɛ beeŋ ta amamprɔŋ m ba chɛ kumo be egbal ŋ gberge kumo n ya lɛ ketaŋɛ to nɛ b maaŋ naŋ wu kumo be kejembu koŋwule gba ka dese.”

¹⁴ Ndoŋ nna nɛ Absalɔm nɛ mbe bebɛsopo na kaŋɛ le: “Hushai be kasotoji ere bɔ Ahitofɛl peya na, ŋkpal manɛ so, Enyɛnpe Ebɔrɛ na e yili kumo fanɛ b sa maŋ bɛ Ahitofɛl be kasotoji na so, saŋɛ na so Absalɔm beeŋ luri asheŋ to.

B ka fɛa Deevid so be asheŋ

¹⁵ Ndoŋ nna nɛ Hushai kaŋɛ bɔrɛmatapoana Zadɔk nɛ Abiata kasotoji nɛ e sa Absalɔm nɛ Israɛlebi be bejuŋkparpoana na nɛ kumo nɛ Ahitofɛl malɛ gba sa bumo.

¹⁶ Kumo be kaman nɛ e kaŋɛ bumo fanɛ b wora manaŋ n ya kaŋɛ Deevid fanɛ e sa maŋ kaŋ dese Jɔɔdan be lɔr na be kɔnɔ ase, ama e dii kumo manaŋ, saŋɛ na so b maaŋ nya mo nɛ mbe basa m mɔ.”

¹⁷ Abiata pibinyɛn Jonatan nɛ Zadɔk pibinyɛn Ahimaaz daa jo Ɛnrogɛl be kebuye na ase nna ashi Jerusalɛm be kade be ekarso ŋkpal manɛ so b daa maa sha b ka wu bumo nɛ baa luri kade na to. Kebichebi ko malɛ e naa kaa kaŋɛ bumo kusɔ nɛ k bee wora nɛ bumo alɛ e ta n ya kaŋɛ ewura Deevid.

¹⁸ Kachako nɛ kebinyɛnbi ko wu bumo, nseŋ ya kaŋɛ Absalɔm. Ndoŋ nna nɛ Ahimaaz nɛ Jonatan nya manaŋ n ya ŋana ketirbu ko nɛ k mata Bahurim be kanyɛn ko be laŋ to,

¹⁹ nɛ kanyɛn na be eche ta kusɔ ko m ba buu ketirbu na be kɔnɔ so nseŋ chulgi aboyu n fata kumo so, saŋɛ na so esa kama maaŋ pin kusɔ nɛ k wɔ kumo to.

²⁰ Ndoŋ nna nɛ Absalɔm be benapo ba laŋ na to m ba bishi kache na le: “Nnɛ nɛ Ahimaaz nɛ Jonatan wɔ?” Nɛ kache na kaŋɛ bumo le: “B dii Lɔr na n choŋ.” Ndoŋ nna nɛ basa na fin bumo ŋ gben nseŋ bɛta n yɔ Jerusalɛm.

²¹ B ka choŋ na be kaman nɛ Ahimaaz nɛ Jonatan lar ketirbu na to n ya kaŋɛ ewura Deevid kusɔ nɛ Ahitofɛl kre kikɛ nseŋ kaŋɛ mo fanɛ e wora manaŋ n dii Lɔr na.

²² Nɛ Deevid nɛ mbe basa fara e dii Jɔɔdan be Lɔr na, kare tea ya ka chɛ nɛ b dii n loge.

²³ Ahitofɛl ka wu fanɛ b maŋ bɛ mbe kasotoji na so na, nɛ e dii n chena mbe kurma so n yɔ mbe kade to Gilo. E ka koli mbe laŋ to be kusɔ kama abar so n loge, nɛ e ya chɛ efɔl. Kakpa nɛ b puli mo nananyɛnana na nɛ b daŋ puli mo alɛ gba.

²⁴ Pɔɛŋ nɛ Absalɔm nɛ Israɛlebi be benapo na dii Jɔɔdan be Lɔr na n loge na nɛ Deevid bre tea wɔ Mahanaim.

²⁵ Absalɔm daŋ ta Amasa nna n yili benapo na be enimu Jɔab be eyilikpa. Jɛta nɛ e la Ishmaɛl be kanaŋ to be esa na pibinyɛn e daa la Amasa. Nahaash be mbicheso e daa la Abigɛl, nɛ e la Amasa mo nio na nɛ Zeruwa nɛ mo alɛ la Jɔab mo nio na. Abigɛl mo sipo e daa la Zeruwa.

²⁶ Giliad be kasawule so nɛ Absalɔm nɛ mbe basa daŋ ya wora bumo be keeyi to n chena.

²⁷ Deevid ka ba Mahanaim na nɛ Nahaash pibinyɛn Shoobi e daŋ shi Raaba nɛ k wɔ Ammɔn na, nɛ Ammiɛl malɛ pibinyɛn Makiir nɛ e shi Lodiba na, nɛ Bazilai nɛ mo alɛ shi Rogeliim nɛ k wɔ Giliad be efuli so na m ba shɛr mo to.

^28-29 B daŋ bar ntishaŋ nɛ mpuliya nɛ b ta ebɔ m pɔr, nɛ asɔ deseso, nɛ ajibi nna m ba sa Deevid nɛ mbe basa. Ayu nɛ aboyu nɛ aboyutɔso nɛ chɛbɛ nɛ akuloŋku nɛ mushoŋ nɛ wagashi nɛ mbolpɔ gba daŋ ti so. Ŋkpal manɛ so b daa nyi geeŋ fanɛ akoŋ nɛ achukoŋ nɛ kegben beeŋ pɛ Deevid nɛ mbe basa ashi kiyi na to.