2 Samuɛl 16 - EBƆRƐ BE KAWƆL

Deevid nɛ Ziba be asheŋ

¹ Deevid ka dii kebee na be kaba ko so n yɔ esoso nsaa gbelge to kumo be kaba nyɔsopo na a ba k maŋ chɛr ko nɛ e purgi Mifiboshɛf be kayɛrbi Ziba nɛ e kre ebodobodo alfa anyɔ nɛ greep be asɔrso wɔlso nɛ baa tre reezins na malɛ be asha kalfa nɛ figidibi be asɔrso kalfa nɛ asɔ nuuso be kasapuya bɔlɔ n deŋi mbe ekurma anyɔ so.

² Ndoŋ nna nɛ Deevid bishi mo le: “Manɛ nɛ fee sha nɛ fo wora asɔ ere kikɛ?” Nɛ Ziba yɛ: “Yiramu, ekurma ere bre la fo laŋ to ebi peya nna nɛ b baa dii. Ebodobodo ere nɛ asɔrso na malɛ la fo basa be kusɔ jiso nna. Nsa ere malɛ beeŋ chɛ bumo to saŋɛ nɛ b nite kiyi to ŋ gben na.”

³ Nɛ ewura na bishi mo le: “Nnɛ nɛ fo nyɛnpe Sɔɔl mo nanabi Mifiboshɛf wɔ?” Nɛ Ziba yɛ: “E wɔ Jerusalɛm to, ŋkpal e ka bee fɛ fanɛ Israɛlebi na beeŋ laŋɛ mo nananyɛn Sɔɔl be kuwura n sa mo so.”

⁴ Nɛ ewura na kaŋɛ Ziba le: “Mifiboshɛf be kusɔ kama nɛ e kɔ na ki feya nna naniere.” Nɛ Ziba malɛ yɛ le: “Yiramu! Ebɔrɛ e shin nɛ m baa wora fo aparsheŋ saŋkama, ŋkpal manɛ so n la fo kayɛrbi nna.”

Deevid nɛ Shimei be asheŋ

⁵ Ewura Deevid ka bee fo kade nɛ baa tre Bahurim na nɛ Sɔɔl mo kurgepo ko nɛ baa tre Shimei nɛ e la Gɛra pibinyɛn na bee shɛr mo to nsaa tege mo a sho mo kɔnɔ.

⁶ Deevid be bekumpo nɛ mbe benapo kikɛ daŋ kulti mo nna n wɔtɔ ama amo nɛ amo kikɛ Shimei daa kpa mo nɛ mbe benimuana nɛ mbe basa kikɛ ajembu nna.

⁷ Shimei daŋ sho mo kɔnɔ nna ŋ kaŋɛ le: “Fo emɔpo nɛ esa jiga ere! Baa yɔ ŋ ka anyi.

⁸ Sɔɔl be kuwura nɛ fo sɔ nseŋ mɔ mbe basa damta na so nɛ Enyɛnpe Ebɔrɛ bee gberge fo kusoe nseŋ ta fo kuwura n sa fo pibinyɛn Absalɔm nɛ fo asheŋ maŋ naa wu anishi na. Emɔpo e la fo.”

⁹ Kumo be kaman nɛ Zeruwa pibinyɛn Abishai kaŋɛ ewura na le: “Yiramu, manɛ nna nɛ fo shin nɛ esa fuloŋ fanɛ kujɔnɔmu ere bee sho fo kɔnɔ? Shin nɛ n yɔ n ya ku mbe kumu n lɛ!”

¹⁰ Nɛ ewura na kaŋɛ Abishai nɛ mo da Jɔab: “Nnɛ nɛ k nya menyi! Nɛ fanɛ Enyɛnpe Ebɔrɛ na e kaŋɛ mo fanɛ e sho ma kɔnɔ, wanɛ malɛ e wɔtɔ nɛ e tiŋ m bishi kusɔ nɛ k ba nɛ e wora loŋ?”

¹¹ Kede be kaman nɛ Deevid kaŋɛ Abishai nɛ mbe benimuana na le: “M pibinyɛn gbagba e naa fin ma nɛ e mɔ na, amoso men sa maŋ shin nɛ kusɔ nɛ Bɛnjamin be esa ere wora ere gba a tir menyi. Nɛ kashenteŋ nna fanɛ Enyɛnpe Ebɔrɛ na e kaŋɛ mo fanɛ e sho ma kɔnɔ, kumo ere fo yige mo nɛ e baa wora.

¹² Ashere Enyɛnpe Ebɔrɛ beeŋ wu kagbenejija nɛ k tɔr ma so ere nseŋ shin nɛ kɔnɔsho ere e ki nɛfa n sa ma.”

¹³ Deevid ka malga n loge nɛ mo nɛ mbe basa kilgi a yɔ, nɛ Shimei malɛ bɔ kebee na be kekil to a kuŋ bumo a sho bumo kɔnɔ a kpa bumo ajembu nsaa muu shishɛr a fari bumo.

¹⁴ Pɔɛŋ nɛ ewura na nɛ mbe basa e fo Jɔɔdan be Lɔr na ase nɛ bumo kikɛ chɛl, nseŋ chena n wushi n naŋ nya eleŋ.

Absalɔm ka ba Jerusalɛm be asheŋ

¹⁵ Le be jemanɛ ere nɛ Absalɔm nɛ mbe bebɛsopo, n ta Ahitofɛl gba n ti so ba Jerusalɛm to.

¹⁶ Deevid mo teri kpakpaso Hushai ka tu Absalɔm nɛ e ponte ŋ kaŋɛ le: “Yiramu, Ebɔrɛ e sa fo ŋkpa tenteŋ!”

¹⁷ Ndoŋ nna nɛ Absalɔm bishi Hushai le: “Le nɛ baa bugi kagbene a shuŋ eteri a? Nɛ manɛ e ba nɛ fo maŋ tu fo teri Deevid n yɔ?”

¹⁸ Nɛ Hushai kaŋɛ le: “M maaŋ tiŋ n yɔ, ŋkpal manɛ so, ekama nɛ Enyɛnpe Ebɔrɛ nɛ mbe basa Israɛlebi lara fanɛ ewura na nɛ malɛ gba bɛ so, nɛ m baa shuŋ mo.

¹⁹ Wanɛ bre nɛ meeŋ naŋ shuŋ n naŋ baŋ n nyɛnpe Deevid pibinyɛn so? Kananɛ m baŋ shuŋ n sa fo tuto na, loŋ koŋwule na nɛ meeŋ shuŋ n sa fo alɛ gba.”

²⁰ Kede be kaman nɛ Absalɔm kilgi m bishi Ahitofɛl le: “Manɛ be kasotoji nɛ fo kɔ nɛ fo sa anyi nfe naniere?”

²¹ Nɛ Ahitofɛl malɛ kaŋɛ mo le: “Yɔ nɛ fo nɛ fo tuto mo jipoana nɛ e yige kaman fanɛ b baa keni mbe laŋ so na e ya di keche nɛ kenyɛn, saŋɛ na so ekama nɛ e wɔ Israɛl to beeŋ pin fanɛ naniere bre fo doŋ gbagba e la fo tuto nɛ keleŋ basa nɛ b bɛ fo so na kikɛ to ga.”

²² Nɛ b yuu wajɛbu ewurkpa be kuchoŋi na be esoso nɛ basa nɛ b wɔ ndoŋ na wu Absalɔm ka luri kumo to nɛ e ya di mo tuto mo jipoana basa na kikɛ be anishito.

²³ Ŋkpal Deevid nɛ Absalɔm kikɛ ka daa fɛ fanɛ kusɔ kama nɛ Ahitofɛl daŋ baŋ kaŋɛ shi Ebɔrɛ kutɔ na so, kasotoji kama nɛ e daŋ baŋ sa bumo baa nu nna a sa mo.