2 Samuɛl 15 - EBƆRƐ BE KAWƆL

Absalɔm ka bee kre kena be asheŋ

¹ Ade kikɛ be kaman nɛ Absalɔm ya fin egbaŋɛturko nɛ amo be egbaŋɛ nɛ baŋ baa gberge amo n sa mbe kumo, nɛ basa adunu nɛ bumo alɛ beeŋ baa juŋkpar a kuŋ mo.

² Kachipurdidi kikɛ kade na be ekarso, kakpa nɛ benimu bee shɛr a to jina na be kubɔrbi so nɛ e daa lar n ya ka yili. Esa kama nɛ e baŋ nya kamalga nsaa yɔ ewura pe nɛ e ya lɔŋɛ kumo, Absalɔm bee tre mo nna m bishi mo kakpa nɛ e shi. Esa na baŋ kaŋɛ mo kakpa nɛ e shi nɛ yiri nɛ k la mo n loge,

³ nɛ Absalɔm e kaŋɛ mo le: “Keni, fo kamalga kɔ ekpa ama esa kama maŋ wɔtɔ nɛ e yili ewura be aya to n ji fo asheŋ n sa fo.”

⁴ Nseŋ kaŋɛ le: “N daa la demujipo nna k daa beeŋ par ma ga! Saŋɛ na so esa kama nɛ e kɔ asheŋ nsaa sha keji kumo, beeŋ tiŋ m ba ŋ kutɔ nɛ n ji asheŋ na nɛ amo be ekpa so n sa amodoŋwura.”

⁵ Esa kama nɛ e baŋ ba Absalɔm kutɔ nɛ e ba bunyaŋ mo, Absalɔm bee daŋ keshɛr mo to nna nseŋ chɔrɔ mo kashaso.

⁶ Loŋ nɛ Absalɔm daŋ wora Israɛl be basa kama nɛ b daa kɔ bumo be edemu a yɔ ewura kutɔ na. Ŋkpal loŋ so nɛ b daa sha Absalɔm nsaa bɛ mo so.

⁷ Kumo be nfɛ ana be kaman nɛ Absalɔm kaŋɛ ewura Deevid le: “Mee sha keyɔ Hibrɔn n ya tia ma kɔnɔ nɛ n nase Enyɛnpe Ebɔrɛ be anishito na.

⁸ Ŋkpal manɛ so saŋɛ so nɛ n daa wɔ Geshur ashi Siriya be efuli so na nɛ n nase kɔnɔ Enyɛnpe Ebɔrɛ be anishito fanɛ nɛ e baŋ shin nɛ n naŋ bɛta n yɔ Jerusalɛm, kumo ere ma alɛ beeŋ ya bunyaŋ mo ashi Hibrɔn.”

⁹ Nɛ ewura na kaŋɛ mo le: “Ebɔrɛ e yɛr fo nɛ alenfia.” Ndoŋ nna nɛ Absalɔm yɔ Hibrɔn,

¹⁰ nseŋ ya shuŋi mbɔ Israɛl be kanaŋ na be kekama to fanɛ b ya kaŋɛ bumo le: “Men kaŋ baŋ nu mbel ka bee shu, men baa ponte a kaŋɛ: ‘Absalɔm e ki Hibrɔn be ewura!’ ”

¹¹ Benyɛn alfa anyɔ e daŋ bɛ Absalɔm so n shi Jerusalɛm m ba Hibrɔn. B daa maŋ nyi ŋkre nɛ Absalɔm kre, ŋkpal manɛ so bumo ere daa maŋ kɔ nfɛra lubi kikɛ a bɛ mo so.

¹² Absalɔm ka bee lara sarga na, nɛ e shuŋi fanɛ b ya tre Ahitofɛl nɛ e bee ji ewura Deevid asoeto na ashi mbe kade to Gilo m ba. Bumo be ŋkre nɛ b daŋ kre nɛ b ju ewura Deevid na daa maŋ du kpakpa n sa bumo, ŋkpal manɛ so basa nɛ baa bɛ Absalɔm so na baa wora kishi nna a ti so.

Deevid ka shile Jerusalɛm be asheŋ

¹³ Le be baru nɛ kabɔ daŋ bar m ba sa Deevid: “Israɛlebi shuli so nna fanɛ Absalɔm nɛ bumo ere bee sha fanɛ e baa la bumo be ewura.”

¹⁴ Ndoŋ nna nɛ Deevid kaŋɛ mbe benimu nɛ mo nɛ bumo wɔ Jerusalɛm to na le: “Nɛ an baa maa sha Absalɔm ka pɛ anyi bre, kumo ere an wora manaŋ n lar, nɛ manɛ a loŋ, e beeŋ tu anyi nfe naniere kikɛ ŋ kɔ m pɔɔ anyi so nseŋ mɔ basa nɛ b wɔ kade ere to gba kikɛ n ti so!”

¹⁵ Nɛ b shuli so ŋ kaŋɛ le: “Mm, Yiramu, kusɔ kama nɛ fo kaŋɛ, anyeeŋ wora”

¹⁶ Ndoŋ nna nɛ ewura na nɛ mbe kanaŋ kikɛ nɛ mbe benimuana lar, nɛ e shin nɛ mo jipoana be kudu bre shir kaman a keni mbe laŋ so.

¹⁷ Ewura na nɛ mbe basa ka lar a yɔ anishito gbrɛbi, nɛ b ya yili ekpa to kade na be lalaloge.

¹⁸ Deevid ka yil na, nɛ e wu mbe benapo nɛ mbe bekumpo ka ba choŋ. Katuŋ nɛ b shir kaman m ba choŋ na e daa la benapo alfa ashe nɛ b daŋ bɛ mo so ashi Gaaf nɛ k wɔ Filisti be efuli so na. Ittai e daa la benapo na be enimu.

¹⁹ Nɛ ewura na bishi benapo be enimu Ittai na le: “Manɛ nna nɛ men bɛ anyi so a ba? Men bɛta a yɔ menyi be ewura popɔr Absalɔm kutɔ. Men la befɔ nɛ men shile kena ashi menyi be kade to nna.

²⁰ Menyi maŋ ba nfe n chɛr, amoso m maŋ tiŋ n shin nɛ men baa bɛ ma so loŋ. M maŋ nyi kakpa nɛ mee yɔ gba. Men bɛta n ya tu men kurgepoana, Enyɛnpe Ebɔrɛ be kelela nɛ mbe kashenteŋ e baa kra wɔ menyi so.”

²¹ Nɛ Ittai kaŋɛ ewura na le: “Yiramu, ŋkpal Enyɛnpe Ebɔrɛ nɛ e la ma shɛdajipo na so, kaplɛkama nɛ fee yɔ, hale nɛ k la luwu to nna gba, ma nɛ fo beeŋ yɔ.”

²² Nɛ Deevid kaŋɛ le: “K nyalɛ. An baa yɔ!” Ndoŋ nna nɛ Ittai nɛ mbe basa nɛ mbe kanaŋ kikɛ tu Deevid n yɔ.

²³ Deevid nɛ mbe basa ka bee yɔ na nɛ Jerusalɛmebi na shu ga. Ewura na nɛ mbe basa daŋ ya dii ketaŋɛ nɛ baa tre Kidrɔn na nna n sɔ kiyitokpɛato a yɔ.

²⁴ Bɔrɛmatapoana Zadɔk nɛ Abiata nɛ Livai be kanaŋ to be basa nɛ baa sulɔ Enyɛnpe Ebɔrɛ be ŋkre be deka cheembi na gba daŋ ti bumo so. B ka suge deka na n yili, b maŋ naŋ ta kumo kikɛ hale ewura Deevid nɛ mbe basa na kikɛ lar kade na to.

²⁵ Ndoŋ nna nɛ ewura na kaŋɛ Zadɔk le: “Men bɛta ŋkre be deka na n yɔ Jerusalɛm be kade to. Nɛ Ebɔrɛ shuli, e beeŋ shin nɛ m bɛta m ba wu kakpa nɛ k wɔ kachako.

²⁶ Ama nɛ fanɛ e maŋ shuli bre, kumo ere e beeŋ tiŋ n wora ma kusɔ kama nɛ e bee sha.”

²⁷ Nɛ ewura na naŋ laŋɛ ŋ kaŋɛ bɔrɛmatapo Zadɔk le: “Keta fo pibinyɛn Ahimaaz nɛ Abiata pibinyɛn Jonatan n yɔ kade na to kagbenewushiso.

²⁸ Ama meeŋ jo kiyi na to be kakpa nɛ baa bɔla a dii lɔr na n ya fo jemanɛ kama nɛ meeŋ nu kubɔya ashi menyi kutɔ.”

²⁹ Ndoŋ nna nɛ Zadɔk nɛ Abiata nɛ bumo be mbinyɛnsobi na ta ŋkre be deka na m bɛta n yɔ Jerusalɛm n ya ka wɔ ndoŋ.

³⁰ Nɛ Deevid ta asɔ m buu mbe kumu so nsaa nite aya fuloŋ a shu n yɔ kebeegboŋ nɛ baa tre Ɔlifs na ase a ŋini kagbenejija nɛ k tɔr mo so. Basa nɛ b daa bɛ mo so na gba daŋ ta asɔ nna m buu bumo be amu so a shu a bɛ mo so.

³¹ B ka kaŋɛ Deevid fanɛ Ahitofɛl gba ti Absalɔm so nna, nɛ e kule Ebɔrɛ le: “Enyɛnpe Ebɔrɛ, jande shin nɛ Ahitofɛl be nfɛra nɛ e beeŋ sa Absalɔm na e ki nfɛra fuloŋ!”

³² Deevid ka dii n yɔ kebee na be esoso be kakpa nɛ baa bunyaŋ Ebɔrɛ na, nɛ e ya tu Hushai nɛ e la Aki be esa na ndoŋ nɛ e buu epiŋi kpɛatoso nseŋ ta shishɛr n wurge mbe kumu so.

³³ Nɛ Deevid kaŋɛ mo le: “Sa maŋ kaŋ ba n kutɔ ŋkpal manɛ so fo maaŋ baa kɔ kechɛto kikɛ n sa ma nfe.

³⁴ Kechɛ to nɛ feeŋ tiŋ n sa ma e la fanɛ, fo bɛta n yɔ kade to n ya kaŋɛ Absalɔm fanɛ kananɛ fo shuŋ mo tuto nɛnɛ na gbagba nɛ feeŋ shuŋ mo alɛ gba. Ama wora ania fanɛ feeŋ chɛrga nfɛra kama nɛ Ahitofɛl bee sa Absalɔm.

³⁵ Bɔrɛmatapoana Zadɔk nɛ Abiata beeŋ baa wɔ ndoŋ, amoso wora ŋ kaŋɛ bumo kusɔ nɛ fo nu ashi ewura be lambu to na.

³⁶ Bumo be mbinyɛnbi Ahimaaz nɛ Jonatan kikɛ wɔ bumo kutɔ, fo alɛ beeŋ tiŋ ŋ kaŋɛ bumo baru kikɛ nɛ k wɔtɔ nɛ b ba kaŋɛ ma.”

³⁷ Deevid mo teri Hushai ka bɛta n yɔ Jerusalɛm k maŋ chɛr ko nɛ Absalɔm gba fo ndoŋ.