2 Samuɛl 14 - EBƆRƐ BE KAWƆL

Jɔab ka bela ase a jo Absalɔm be kebɛta m ba be asheŋ

¹ Jɔab daa nyi fanɛ Absalɔm be asheŋ wɔ ewura Deevid to ga.

² Amoso e daŋ shuŋi n tre kache nyiashempo ko nna ashi kade nɛ ba tre Tekua na nna. E ka ba nɛ e kaŋɛ mo le: “Wora fanɛ fo ka nya keeli na, nseŋ buu keeli to be ewajɛ, nsaa maŋ kaŋ m mɔ fo emin to. Wora fanɛ fo ka shu keeli na n chɛr ga na.”

³ Kumo be kaman nɛ Jɔab kaŋɛ kache na kusɔ nɛ e beeŋ ya kaŋɛ ewura na.

⁴ Ndoŋ nna nɛ kache na yɔ ewura Deevid kutɔ n ya gbir kasawule bunyaŋ so nseŋ kaŋɛ mo le: “Yiramu! Chɛ ma to!”

⁵ Nɛ ewura na malɛ bishi mo le: “Manɛ nɛ fee sha?” Nɛ kache na kaŋɛ le: “Ŋ kul wu ŋ ka ma nna.

⁶ Ma alɛ kɔ mbia anyɔ nɛ kachako nɛ kolu tɔr bumo so ashi kupuŋ to. Esa kama malɛ daa maŋ wɔtɔ nɛ e barga bumo to nɛ bumo eko mɔ mo barkasa.

⁷ Naniere ma kanaŋ to ebi kikɛ yuu ma kenishi nna nseŋ kaŋɛ fanɛ m bar ma kebia na nɛ b mɔ mo alɛ gba ŋkpal e ka mɔ mo sipo so. Nɛ b baaŋ wora loŋ, kumo ere ma ere maaŋ naa kɔ ebinyɛn kikɛ nna na. B baaŋ mɔ mo, kumo ere ma tama loge, ma kul malɛ be ketre beeŋ mur kuraa.”

⁸ Nɛ ewura Deevid kaŋɛ mo le: “Bɛta a yɔ laŋ to, meeŋ wora ŋ keni kesheŋ na to.”

⁹ Nɛ kache na kaŋɛ le: “Yiramu, kusɔ kama nɛ fo kaŋ yili be turju e baa bɛ ma nɛ ma kanaŋ mannɛ fo.”

¹⁰ Nɛ ewura na kaŋɛ mo le: “Esa kama nɛ e kaŋ baa tɔrɔ fo, fo bar mo ŋ kutɔ nɛ n shin nɛ e maaŋ naŋ wora loŋ kikɛ.”

¹¹ Nɛ kache na kaŋɛ le: “Yiramu, jande, kule Enyɛnpe nɛ fo Ebɔrɛ na saŋɛ na so ŋkurgepoana nɛ b sɔ ma pibinyɛn ere be luwu be asheŋ a shin nɛ b kɔ n tal to ere maaŋ mɔ ma pibinyɛn nɛ e ka ere malɛ n naaŋ bar asheŋ lubi ko n ti so.” Nɛ ewura Deevid kaŋɛ le: “Ŋkpal Ebɔrɛ ka la ma shɛdajipo so shɛŋ maaŋ tiŋ n tɔrɔ fo pibinyɛn ere kikɛ.”

¹² Ndoŋ nna nɛ kache na malɛ kaŋɛ le: “Yiramu, jande shin nɛ ŋ kule ŋ kaŋɛ kusɔ koŋwule n ti so.” Nɛ ewura Deevid yɛ: “Baa malga.”

¹³ Nɛ kache na kaŋɛ mo le: “Manɛ nna nɛ fo wora kulubi ŋ gbiti Ebɔrɛ be basa? Fo ju fo pibinyɛn gbagba ashi efuli ere so, ama ŋkpal fo ka ji n chɛ ma to ere so, fo alɛ gba e wora kusɔ ko a laŋɛ fo kebia na be kaplɛa so.

¹⁴ Anyi kikɛ nyam beeŋ wu, ŋkpal manɛ so an du fanɛ nchu nɛ b chulgi n lɛ kasawule nɛ a maŋ naa kɔ kemuu nna. Hale nɛ Ebɔrɛ maa shin nɛ bubuni bee bɛta e ba ŋkpa to gba, fo nɛ fo la ewura ere bre beeŋ tiŋ n shin nɛ esa nɛ e shile fo efuli so n yɔ kuko to e naŋ bɛta m ba.

¹⁵ Yiramu, naniere kusɔ nɛ k ba nɛ m ba nɛ m ba kaŋɛ fo na a la fanɛ, basa na daa funti ma nna, kumo so nɛ n fɛ fanɛ meeŋ malga fo kutɔ ŋ keni feeŋ tiŋ n chɛ ma to a?

¹⁶ Ma alɛ naa fɛ nna fanɛ feeŋ nu n sa ma nseŋ mɔlga ma nɛ ma pibinyɛn ashi basa nɛ baa sha kemɔ anyi n sɔ kasawule nɛ Ebɔrɛ ta n sa anyi na be enɔ to.

¹⁷ Naniere bre ma kagbene dese ŋkpal fo ka pin alubi nɛ alela be mbarga nseŋ nase ma kɔnɔ lela so. Ma kabɔrɛkule e la fanɛ Enyɛnpe fo Ebɔrɛ na e baa wɔ fo kaman.”

¹⁸ Nɛ ewura na kaŋɛ le: “Shin nɛ m bishi fo kesheŋ bishiso ere nɛ fo kaŋɛ ma kumo be kashenteŋ.” Nɛ kache na kaŋɛ le: “Yiramu, bishi ma kusɔ kama nɛ fee sha.”

¹⁹ Nɛ ewura na bishi mo le: “Fee tama fanɛ Jɔab be kɔnɔ maa ji asheŋ ere to a?” Nɛ kache na yɛ: “Yiramu, fo kuwura be eleŋ so m maŋ kɔ ekpa kikɛ nɛ ŋ kini kesa fo mbishi ere be atuwebi. Fo kayɛrbi Jɔab gbagba e kaŋɛ ma kusɔ nɛ meeŋ wora nɛ kusɔ nɛ meeŋ kaŋɛ kikɛ.

²⁰ Ama e wora loŋ nna nɛ e lɔŋɛ asheŋ ere kikɛ. Yiramu, fo nyi asheŋ nna fanɛ Ebɔrɛ be kabɔ. Fo nyi kusɔ kama malɛ nɛ k bee wora kikɛ.”

²¹ Kumo be kaman nɛ ewura na kaŋɛ Jɔab le: “Naniere bre meeŋ wora kusɔ nɛ fee sha na. Ya keta Absalɔm m bar ma nfe.”

²² Nɛ Jɔab dese ewura Deevid be anishito kasawule bunyanso n chɔrɔ mo ŋ kaŋɛ le: “Ebɔrɛ e nɛfa fo Yiramu! Naniere nɛ m pin fo kagbene ka fuli ma so ŋkpal fo ka wora kusɔ nɛ mee sha n sa ma so.”

²³ Kede be kaman nɛ Jɔab yɔ Geshur n ya keta Absalɔm m ba Jerusalɛm.

²⁴ Nɛ ewura na kaŋɛ fanɛ Absalɔm e sa maŋ kaŋ luri mbe laŋ to. E yɛ: “Maa sha kewu mo kenishiso.” Amoso Absalɔm daa wɔ mo gbagba be laŋ to nna, e maŋ ba ewura na kutɔ kikɛ.

Absalɔm nɛ Deevid ka lɔŋɛ abar be asheŋ

²⁵ Israɛl kikɛ, esa kama daa maŋ wɔtɔ nsaa walɛ keyɛrbi n fo Absalɔm so. Mbe kaplɛkama maŋ kɔ kulɔplɛ.

²⁶ Ŋkpal e ka daa kɔ emin ga so kafɛ kikɛ nɛ emin na baŋ daŋ ga e bee she amo nna. Amo alɛ be egbɛ beeŋ ba du fanɛ kilo anyɔ.

²⁷ Absalɔm daa kɔ mbinyɛnsobi asa nɛ ebiche lela kebita koŋwule nɛ baa tre mo Tamaa.

²⁸ Absalɔm malɛ daŋ chena Jerusalɛm to nfɛnyɔ kikɛ nɛ mo nɛ ewura na be kenishi maŋ wu abar.

²⁹ Ndoŋ nna nɛ e shuŋi n tre Jɔab nɛ e shuŋi mo nɛ e ya mata ewura na n sa mo, nɛ Jɔab kini keba. Nɛ Absalɔm naŋ lɔŋɛ n shuŋi kela nyɔsopo, nɛ Jɔab naŋ kini keba.

³⁰ Ndoŋ nna nɛ Absalɔm kaŋɛ mbe nyɛrbi le: “Men keni, Jɔab be aboyu be kudɔ baŋ mata meya nna. Men ya wɔtɔ kumo edɛ.” Ndoŋ nna nɛ b ya wɔtɔ kudɔ na kikɛ edɛ.

³¹ Nɛ Jɔab yɔ Absalɔm be laŋ to n ya bishi mo le: “Manɛ nna nɛ fo nyɛrbi ya wɔtɔ ma kudɔ edɛ?”

³² Nɛ Absalɔm kaŋɛ le: “N daa sha keshuŋi fo nna nɛ fo ya mata ewura n sa ma, ama ŋ ka shuŋi n tre fo, nɛ fo kini. Manɛ bre e lara ma Geshur m ba nfe? N daa wɔ ndoŋ gba nna k daa beeŋ baa bɔ ma so. Amoso wora ania n shin nɛ n wu ewura, nɛ k ba fanɛ ma e wora n jija, kumo ere fo shin nɛ ewura a mɔ ma.”

³³ Ndoŋ nna nɛ Jɔab yɔ ewura Deevid kutɔ n ya kaŋɛ mo kusɔ nɛ Absalɔm kaŋɛ kikɛ. Nɛ ewura shuŋi n tre Absalɔm nɛ e ba m ba jɔŋɛ mbe anishito, nɛ ewura na chɔrɔ mo kashaso.