2 Samuɛl 13 - EBƆRƐ BE KAWƆL

Amnɔn nɛ Tamaa be asheŋ

¹ Deevid pibinyɛn Absalɔm daa kɔ mo sipoche lela kebita ko nɛ baa tre mo Tamaa. Deevid pibinyɛn ko malɛ nɛ baa tre Amnɔn na daa sha Tamaa na nna.

² Ŋkpal Tamaa ka daa maŋ nyi enyɛn nɛ k daa du kpakpa n sa Amnɔn nɛ e nya mo n di keche nɛ kenyɛn na so k daŋ ki mo kulɔ nna.

³ Deevid mo sipo Shamma pibinyɛn nɛ baa tre Jonadab na e daa la mo teri. Jonadab malɛ daa la enyiashempo nna nsaa kɔ kananɛ baa wora asheŋ manaŋ manaŋ be nfɛra ga.

⁴ Amoso le nɛ Jonadab daŋ kaŋɛ Amnɔn: “Ewura pibi e la fo, ama mee wu fo saŋkama fanɛ fo maŋ kɔ kagbenefuli. Manɛ e kɔ fo?” Nɛ Amnɔn kaŋɛ le: “N da Absalɔm mo sipoche Tamaa nɛ mee sha.”

⁵ Nɛ Jonadab kaŋɛ mo le: “Wora fanɛ fo ka bee lɔ na nseŋ ya dese fo gedo so. Fo tuto kaŋ ba nɛ fo kaŋɛ mo le: ‘Jande shin nɛ ma sipoche Tamaa a daŋɛ ajibi m bar ma. E ba ma kutɔ nɛ m baa keni mo nɛ e ba daŋɛ, saŋɛ na so e kaŋ daŋɛ n loge, e beeŋ baa ku amo a wɔtɔ ma kɔnɔ to.’ ”

⁶ Ndoŋ nna nɛ Amnɔn wora fanɛ e ka bee lɔ na nseŋ ya dese mbe gedo so. Ewura Deevid ka yɔ nɛ e ya wu mo nɛ Amnɔn kaŋɛ mo le: “Jande shin nɛ Tamaa e ba daŋɛ ajibi lela ko n sa ma nfe nsaa ku amo a sa ma nɛ m baa ji.”

⁷ Ndoŋ nna nɛ Deevid ta ebɔl n sa Tamaa ashi ewurkpa ŋ kaŋɛ mo le: “Yɔ Amnɔn be laŋ to n ya fin kusɔ ko n sa mo nɛ e ji.”

⁸ Tamaa ka yɔ, nɛ e ya wu Amnɔn nɛ e dese gedo so. Ndoŋ nna nɛ Tamaa ta nyifu n yili kakpa nɛ Amnɔn beeŋ baa wu mo na nseŋ gbiti bodobodo na n tɔ amo.

⁹ E ka loge nɛ e ku ajibi na n wɔtɔ katishaŋ to n sa mo fanɛ e ji, nɛ e kini nseŋ kaŋɛ mo le: “Shin nɛ mbita na e lar kowu.” Nɛ bumo kikɛ lar.

¹⁰ Nɛ e kaŋɛ Tamaa le: “Fo gbagba e ta bodobodo na m ba ma gedo ase m ba sa ma.” Nɛ e ta bodobodo na n ya ka sa mo.

¹¹ E ka ta n sa mo n loge nɛ e to m pɛ mo to nseŋ kaŋɛ mo le: “Ba tu ma n dese!”

¹² Nɛ Tamaa yɛ: “M-m, sa maŋ tintiŋ ma n wɔtɔ le be anishinyɔr ere to! Le be kesheŋ maŋ daga kewora Israɛl be efuli so!

¹³ Nuso gba nɛ meeŋ naŋ wora n luri basa to? Anishinyɔr e naŋ mɔ fo alɛ ashi Israɛl to. Ama wora ania n ya malga n sa ewura, ma ere wora yirda fanɛ e beeŋ shin nɛ an ta abar.”

¹⁴ Ama Amnɔn daŋ maŋ nu n sa kusɔ nɛ Tamaa bee kaŋɛ na nseŋ tintiŋ m pur mo.

¹⁵ Kumo be kaman nɛ Tamaa be asheŋ fara a nu Amnɔn agbo nɛ e kishi mo ga. Kekishi na daa chɔ kasha nɛ e daa kɔ n sa mo sososo na. Kumo be kaman nɛ Amnɔn ponte ŋ kaŋɛ mo le: “Koso n lar kowu!”

¹⁶ Nɛ Tamaa ma alɛ yɛ: “M-m! M maaŋ yɔ. Kananɛ fee ju ma ere lubi gba a chɔ kusɔ nɛ fo wora ma na!” Ama Amnɔn daa maŋ tuge mo,

¹⁷ nseŋ kaŋɛ mbe kayɛrbi le: “Shin nɛ kebichebi ere a foe ma anishito! Gberge mo n lar kowu nseŋ ber kukuloŋ na so!”

¹⁸ Nɛ kayɛrbi na gberge mo n lar nseŋ ti kukuloŋ na. Kale tenteŋ nɛ k kɔ aba tenteŋ nɛ b ta ejese be yiri yiri n jɔ kumo nɛ Tamaa daŋ buu, ŋkpal manɛ so, loŋ be nle nɛ bewura be mbichesobi nɛ b maŋ naŋ pin benyɛn bee buu loŋ be jemanɛ na.

¹⁹ Ndoŋ nna nɛ Tamaa muu nsunɔ n wurge mbe kumu so, nseŋ kpɛa mbe kale to n ta mbe enɔana m buu mbe anishi so a shu a yɔ.

²⁰ Mo da Absalɔm ka wu mo nɛ e bishi mo le: “Amnɔn pur fo nna a? Jande esipoche, sa maŋ shin nɛ kesheŋ ere e tɔrɔ fo, fo alɛ e sa maŋ kaŋɛ esa kama kumo, ŋkpal manɛ so, fo da nna.” Ndoŋ nna nɛ Tamaa ta kagbenejija nɛ kenawule a wɔ mo da Absalɔm be laŋ to.

²¹ Ewura Deevid ka nu kusɔ nɛ k wora Tamaa na nɛ e nya agbo ga.

²² Absalɔm daa maŋ tuge Amnɔn shɛŋ ama e daŋ kishi mo nna, ŋkpal e ka pur mo sipoche Tamaa so so.

Absalɔm ka mɔ Amnɔn be asheŋ

²³ Kumo be nfɛ anyɔ nɛ Absalɔm yɛr mbe mbolpɔ Baal Hazɔɔ nɛ k mata Efrayim be kade to na nɛ e ya kuya bumo be afuibi so, nseŋ tre ewura be mbinyɛnbi na kikɛ nɛ b ba shɛr ndoŋ.

²⁴ E daŋ yɔ ewura Deevid kutɔ nna n ya kaŋɛ mo le: “Yiramu, ma nyɛrbi bee she ma mbolpɔ be afuibi kabre nna! Fo nɛ fo benimu beeŋ tiŋ m ba ti anyi so a?”

²⁵ Nɛ ewura Deevid kaŋɛ: “M-m, m pibi, nɛ an kikɛ baŋ yɔ ndoŋ, k beeŋ baa la tɔrɔ damta nna n sa fo.” Nɛ Absalɔm kini nseŋ kraa mata mo so, ama ewura Deevid kini keyɔ nseŋ kaŋɛ: “Baa yɔ Ebɔrɛ e chɛ fo to.”

²⁶ Nɛ Absalɔm naŋ kaŋɛ le: “Nɛ fo ere maaŋ yɔ gba kumo ere, fo shin nɛ n sipo Amnɔn e ba tu ma n yɔ.” Nɛ Ewura kaŋɛ le: “Manɛ nna nɛ fee sha Amnɔn ka tu fo n yɔ?”

²⁷ Absalɔm daŋ mata so loŋ nna, nɛ ewura Deevid shin nɛ Amnɔn nɛ mo braana nɛ b ka na kikɛ tu Absalɔm n yɔ. B ka fo kakpa nɛ baa kuya mbolpɔ be afuibi so na nɛ Absalɔm wora kejigboŋ fanɛ ewura peya na n sa bumo.

²⁸ B ka bee ji na nɛ Absalɔm kaŋɛ mbe nyɛrbi le: “Men shin nɛ men be lakal e ba wɔ Amnɔn so a keni saŋɛ so nɛ e beeŋ boo, a wora chilchil be asheŋ na. Loŋ be saŋɛ na nɛ men mɔ mo. Men sa maaŋ kaa lɔ kufu, ŋkpal manɛ so, meeŋ sɔ kumo be turju kikɛ n deŋi ma kumu so!”

²⁹ Ndoŋ nna nɛ nyɛrbi na bɛ kusɔ nɛ Absalɔm kaŋɛ bumo na so nseŋ mɔ Amnɔn. Nɛ ewura na be mbinyɛnbi nɛ Absalɔm tre na kikɛ ta bumo be ekurma nɛ enyɔma n shile n choŋ ŋ ka mo ndoŋ.

³⁰ B kraa wɔ ekpa to nna a yɔ nɛ kubɔya ya tu ewura Deevid fanɛ Absalɔm mɔ mbe mbinyɛnsobi na kikɛ, hale ekoŋwule gba maŋ ka!

³¹ Nɛ ewura Deevid kpa n niŋi to, nseŋ kpɛa mbe epiŋi to kagbenejijaso nseŋ dese kasawule. Mbe nyɛrbi nɛ b daa wɔ mo kutɔ na gba daŋ kpɛa bumo be epiŋi to nna.

³² Ama le nɛ ewura Deevid mo da Shamaa pibinyɛn Jonadab daŋ kaŋɛ mo: “Yiramu, fo mbinyɛnsobi na kikɛ maŋ wu, Amnɔn nawule e wu. Yili saŋɛ nɛ Amnɔn pur Tamaa na kikɛ nɛ feeŋ pin ŋkre nɛ Absalɔm kɔ a yɔ loŋ be asheŋ be kaplɛa so.

³³ Amoso sa maŋ kaŋ yirda fanɛ fo mbinyɛnsobi na kikɛ e wu, Amnɔn nawule e wu.”

³⁴ Le be saŋɛ malɛ nɛ Absalɔm shile. Epul to nɛ enapo ko nɛ e la bumo nɛ baa yili a keni kade so na b eko wu basa damta ko ka shi Horoneem be kubɔrbi so a gbelge kebee so a yɔ. Nɛ e ya kaŋɛ ewura Deevid kusɔ nɛ e wu.

³⁵ Ndoŋ nna nɛ Jonadab kaŋɛ le: “Yiramu! M maŋ kaŋɛ fanɛ fo mbinyɛnsobi na kikɛ maŋ wu a? Keni! Bumo e naa ba na.”

³⁶ E maŋ naŋ malga n loge gba nɛ Deevid be mbinyɛnsobi na shu m ba luri laŋ to nɛ ewura Deevid nɛ mbe benimu shu ga.

^37-38 Absalɔm ka shile na nɛ e yɔ Amihuud pibinyɛn Talmai nɛ e la Gɛshur be ewura na kutɔ, n ya ji nfɛ asa ndoŋ. Nɛ ewura Deevid ta nchɛ damta n shu mo pibinyɛn Amnɔn be keeli.

³⁹ E ka shu Amnɔn be keeli n loge, nɛ mo pibinyɛn Absalɔm malɛ be asheŋ fara e ba mo to ga.