2 Samuɛl 12 - EBƆRƐ BE KAWƆL

Neetan be baru nɛ Deevid be tuba be asheŋ

¹ Ebɔrɛ e daŋ shuŋi anebi Neetan Deevid kutɔ nɛ e ya kaŋɛ mo le: “Basa anyɔ ko e daa wɔ kade koŋwule ko to. Eko daa la damawura nna nɛ eko malɛ la etirpo.

² Damawura na daa kɔ ana nɛ mbolpɔ damta nna.

³ Ama etirpo na bre, kubɔlpobi cheso koŋwule nawule nɛ e daa kɔ, mo alɛ daŋ tɔ kubɔlpobi cheso na gba nna nseŋ daa bela kumo nɛ mbe mbia kikɛ laŋ to. E bee kaa barga mbe ajibi jiso gba be ako nna a sa kumo nsaa shin nɛ k bee nuu nchu mbe kawie nuu nchu to, nɛ e bee ta kumo a deŋi mbe aya so nɛ k bee di. E daŋ ta kumo nna fanɛ mo pibicheso.

⁴ Kachako nɛ efɔ ko ba suge damawura na be laŋ to, ama e daa maŋ sha k ta mbe kusɔbɔya ŋ keta efɔ na kufɔ. E daŋ pɛ etirpo na be kubɔlpobi cheso na nna m mɔ ŋ keta mo kufɔ.”

⁵ Ndoŋ nna nɛ agbo ji ewura Deevid ga ŋkpal kusɔ nɛ damawura na wora na so nɛ e kaŋɛ le: “Enyɛnpe Ebɔrɛ nɛ e la ma shɛdajipo na so, kanyɛn ere daga luwu nna ŋkpal kusɔ nɛ e wora ere so.

⁶ Ŋkpal le be kesheŋ lubi nɛ e wora n sa maŋ wu kuwɔr ere so a daga fanɛ e ka kusɔ nɛ e ta na be ntuŋ ana.”

⁷ Nɛ Neetan kaŋɛ ewura Deevid le: “Fo e la loŋ be esa na. Kusɔ nɛ Enyɛnpe, Israɛl be Ebɔrɛ na malɛ bee kaŋɛ nde: ‘Ma e lara fo fanɛ Israɛl be ewura nseŋ mɔlga fo ashi Ewura Sɔɔl be enɔ to.

⁸ Mbe kuwura nɛ mbe beche kikɛ nɛ n ta n sa fo, nseŋ lara fo fanɛ Israɛl nɛ Juda kikɛ be ewura, nɛ a daa maŋ kukwe fo gba n daa beeŋ naŋ tiŋ n sa fo ako n ti so.

⁹ Nɛ manɛ e ba nɛ fo kini kenu n sa ma nseŋ ŋaba ma le ere? Fo e shin nɛ Ammɔnebi na mɔ Yuriya ashi kena to nɛ fo ta mbe eche ŋ ki feya.

¹⁰ Amoso fo nanabiana nɛ baŋ koso kachako so na be beko beeŋ wu luwu nyaŋnyaŋso ŋkpal fo ka kini kenu n sa ma nseŋ wora le be kusɔ ŋ ŋaba ma so.

¹¹ Ma Enyɛnpe Ebɔrɛ e naa kaŋɛ fo na fanɛ meeŋ shin nɛ esa ko nɛ e shi fo kanaŋ to e kil asheŋ m ba sa fo. Ma alɛ beeŋ sɔ fo beche fo kutɔ n ta bumo n sa fo kanaŋ to be esa ko nɛ mo bumo e di keche nɛ kenyɛn kowushina kapiidi basa be anishito.

¹² Fo ere ŋana nna n wora kulubi ama ma ere beeŋ shin nɛ kusɔ nɛ meeŋ wora ere e dii efuli nɛ Israɛlebi kikɛ e wu kumo.’ ”

¹³ Ndoŋ nna nɛ ewura Deevid kaŋɛ Neetan le: “N wora kulubi ŋ gbiti Enyɛnpe Ebɔrɛ.” Nɛ Neetan kaŋɛ le: “Enyɛnpe Ebɔrɛ gba ta fo alubi m paŋ fo, amoso fo maaŋ wu.

¹⁴ Ama ŋkpal fo ka maŋ keni Enyɛnpe Ebɔrɛ m bɔlɔ kenishi nseŋ shin nɛ mo doŋana keni mo jiga so, fo pibinyɛn nɛ eche na kurge na beeŋ wu.”

¹⁵ Kumo be kaman nɛ Neetan yɔ laŋ to. Ndoŋ nna nɛ Enyɛnpe Ebɔrɛ shin nɛ kulɔ kpakpaso pɛ kebia nɛ ewura Deevid nɛ Yuriya be eche kurge na.

Deevid pibinyɛn ka wu be asheŋ

¹⁶ Nɛ ewura Deevid kule Ebɔrɛ a fin fanɛ kebia na e nya alenfia. E daa kishi nna a kule Ebɔrɛ nsaa dese kasawule kanyɛso kikɛ.

¹⁷ Mbe lambu to be benimuana na daa leŋ mo to nna fanɛ e baa niŋi to a chena, ama e daa maa shuli. Mo alɛ maaŋ naa tu bumo a ji shɛŋ gba.

¹⁸ Kumo be kaman nɛ kebia na wu, ama ewura Deevid be basa daa lɔ kufu nɛ b kaŋɛ mo loŋ be baru na nna. Le nɛ b daŋ kaŋɛ: “Kebia ere ka daa wɔ mbe ŋkpa to gba, kusɔ kama nɛ an kaŋɛ ewura Deevid e maaŋ tuge anyi. Nɛ nuso bre nɛ anyeeŋ wora ŋ kaŋɛ mo kebia ere be keeli naniere? E beeŋ tiŋ ŋkpal loŋ so n wora mbe kumu kesheŋ lubi ko!”

¹⁹ Ewura Deevid ka nu kananɛ baa kuli abar kutɔ na, nɛ e pin fanɛ kebia na wu. Ndoŋ nna nɛ e bishi bumo le: “Kebia na wu nna a?” Nɛ b shuli so ŋ kaŋɛ: “Mm, e wu nna.”

²⁰ Ndoŋ nna nɛ Deevid koso kasawule n ya bɛr m mɔ mbe emin to, n chɛrga mbe epiŋi nɛ e buu na nseŋ yɔ Enyɛnpe Ebɔrɛ be lambu to n ya bunyaŋ mo. E ka bɛta m ba ewurkpa, nɛ e shin nɛ b sa mo ajibi nɛ e ji amo epul na to.

²¹ Nɛ mbe nyɛrbi na kaŋɛ mo le: “Anyi ere maŋ pin kesheŋ ere to ŋkpal manɛ so, kebia na ka wɔ ŋkpa to fo daa shu nna nsaa kishi a sa mo ama e ka baŋ wu bre, epul to nɛ fo fin ajibi n ji!”

²² Nɛ ewura Deevid shuli so ŋ kaŋɛ le: “Mm, e ka daa wɔ ŋkpa to, n daa kishi nna nsaa shu, ŋkpal manɛ so n daŋ fɛ nna fanɛ Enyɛnpe Ebɔrɛ beeŋ wu ma kuwɔr nseŋ yige kebia na.

²³ Nɛ e ka wu naniere, wanɛ bre so nɛ n naa kishi? Meeŋ tiŋ n sa kebia na ŋkpa a? Kachako, ma ere beeŋ ya tu mo kakpa nɛ e wɔ, ama mo ere maaŋ naŋ bɛta m ba ŋ kutɔ kikɛ.”

B ka kurge Sɔlɔmɔn be asheŋ

²⁴ Ndoŋ nna nɛ ewura Deevid wushi mbe eche Bɛshiba kagbene nɛ mo nɛ mo di keche nɛ kenyɛn nɛ e kurge ebinyɛn nɛ ewura Deevid nase mbe ketre Sɔlɔmɔn. Enyɛnpe Ebɔrɛ daa sha Sɔlɔmɔn be asheŋ ga.

²⁵ Ŋkpal Enyɛnpe Ebɔrɛ ka bee sha Sɔlɔmɔn ga so, e daŋ shin nna nɛ anebi Neetan ya nase mo ketre Jedidaya. Kumo be kifito e la fanɛ Ebɔrɛ bee sha mo.

Deevid ka sɔ Raaba be asheŋ

²⁶ Loŋ be saŋɛ na nɛ Jɔab daa kɔ Raaba nɛ k la Ammɔn be kadegboŋ na nsaa sha kesɔ kumo.

²⁷ E daŋ shuŋi mbɔ Deevid kutɔ nna ŋ kaŋɛ mo le: “Ŋ kraa kɔ Raabaebi nna ama n sɔ bumo be mboŋ nɛ baa bɔla a sa basa nchu na kikɛ.

²⁸ Amoso naniere chala fo benapo nɛ b ka na kikɛ m ba kɔ n sɔ kade na fo gbagba, ŋkpal manɛ so, m maa sha kesɔ ketre n sa ma kumu.”

²⁹ Ndoŋ nna nɛ ewura Deevid chala benapo nɛ b ka na n ya ti so ŋ kɔ n sɔ Raaba.

³⁰ Shuwa be kuwurwuro ko nɛ kumo be egbɛ sa fanɛ kilo adesa nɛ anu daa buu Ammɔnebi be kegbir ko nɛ baa tre Mɔlɛk na be kumu so nna. Nɛ ewura Deevid deŋi kuwurwuro nɛ yawu kpakpaso be kejembu wɔ kumo to na m buu. Kumo be kaman nɛ e lara asɔ nɛ b ta kade na to na be adamta gba ŋ ki mo peya.

³¹ E daŋ shin nna nɛ kumo be basa ta ekapɛnta be nsaŋɛgboŋ nɛ baa tre sɛrdaa na nɛ abɛlso be ntekpa nɛ akpanfu a tintiŋ bumo nɛ b baa shuŋ a ku ebirkesi. Loŋ koŋwule na nɛ e daŋ wora ndewurbi nɛ a wɔ Ammɔn be efuli so na kikɛ. Kumo be kaman nɛ mo nɛ mbe benapo bɛta n yɔ Jerusalɛm.