2 Samuɛl 11 - EBƆRƐ BE KAWƆL

Deevid nɛ Bɛshiba be asheŋ

¹ Dɔchubɔrɛso, saŋɛ nɛ bewura bee lar a yɔ kena to na, nɛ Deevid daŋ shin nɛ Jɔab juŋkpar Israɛlebi be benapo na kikɛ, nɛ b ya kɔ m pɔɔ Ammɔnebi na so nseŋ kulti bumo be kadegboŋ nɛ baa tre Raaba na n wɔtɔ. Ama Deevid bre gbagba daa wɔ Jerusalɛm to nna.

² Kachako kaaseso Deevid ka di ŋ koso nseŋ dii mbe kuchoŋi so e nite a kulti nseŋ keni kaseto n wu kache lela kebita ko ka bee bɛr.

³ Ndoŋ nna nɛ Deevid shuŋi kabɔ fanɛ e ya bishi to m pin eche nɛ e la mo. Nɛ kanyɛn na ba kaŋɛ le: “Eliam pibiche Bɛshiba nɛ e la Yuriya nɛ mo alɛ la Hiti be esa na be eche nna.”

⁴ Nɛ Deevid shuŋi fanɛ b ya tre mo m ba. B ka ya bar mo, nɛ e keta mo n ya di nɛ kache na bɛta n yɔ epe. Kumo be jemanɛ so malɛ nɛ e baŋ wora eyurpi n loge.

⁵ K maŋ chɛr ko nɛ keche na pin fanɛ e di kedampo nseŋ shuŋi nɛ b ya kaŋɛ Deevid.

⁶ Ndoŋ nna nɛ Deevid sa ebɔl fanɛ b ya kaŋɛ Jɔab le: “Shin nɛ Yuriya nɛ e la Hiti be esa na e ba wu ma.” Nɛ Jɔab shin nɛ Yuriya yɔ.

⁷ Yuriya ka ba ketre na to nɛ ewura Deevid bishi mo kananɛ Jɔab nɛ benapo na nɛ kena na be asheŋ du.

⁸ Kumo be kaman nɛ e kaŋɛ Yuriya le: “Kumo ere fo yɔ epe n ya wushi gbrɛbi.” Yuriya ka yɔ epe nɛ Deevid ta kakɛ n shuŋi m bɛ so fanɛ b ya sa mo ashi mbe laŋ to.

⁹ Ama Yuriya malɛ daa maŋ yɔ laŋ to. Mo nɛ ewura be bekumpo na e daŋ dese ewurkpa be kabunagboŋ na akpa.

¹⁰ Deevid ka nu fanɛ Yuriya maŋ yɔ laŋ to nɛ e tre mo m bishi le: “Fo ka lar laŋ to n chɛr le, manɛ nna nɛ fo maŋ yɔ laŋ to?”

¹¹ Nɛ Yuriya kaŋɛ Deevid le: “Israɛl nɛ Juda be basa kikɛ lar n choŋ kena to nɛ ŋkre be deka na malɛ gba wɔ bumo kutɔ, hale benapo be ejuŋkparpo Jɔab nɛ benimu nɛ b bɛ mo so na kikɛ dese kowushina, nuso nɛ ma ere bee dese laŋ to a ji a nuu, nɛ ma nɛ ma eche e baa di? M maaŋ wora loŋ kikɛ!”

¹² Nɛ Deevid kaŋɛ mo le: “Kumo ere fo naŋ dese kabre nɛ n shin nɛ fo bɛta a yɔ echefo.” Nɛ Yuriya naŋ laŋɛ n chena Jerusalɛm to kamɔnchɛ na nɛ kumo be ŋklade kikɛ.

¹³ Kumo be kaman nɛ ewura Deevid kaŋɛ mo fanɛ e ba tu mo n ji kanyɛso. E ka ba na nɛ e sa mo nsa nɛ e nuu m boo. Ama amo nɛ amo kikɛ Yuriya daa maŋ yɔ laŋ to, mo alɛ gba daŋ nase mbe kelaŋ ewurkpa be kabunagboŋ na be bekumpo na kutɔ nna n dese ndoŋ.

¹⁴ Kumo be ŋklade kachipurso nɛ ewura Deevid sibɛ kawɔl n sa Yuriya fanɛ e ta n ya sa Jɔab.

¹⁵ Le nɛ e daŋ sibɛ kumo: “Shin nɛ Yuriya e juŋkpar kakpa nɛ kena na bee kɔ ga na nseŋ shin nɛ benapo nɛ b wɔ mo kutɔ na e ba tu a lar kaman nɛ b nya mo m mɔ.”

¹⁶ Amoso Jɔab ka bee kɔ a kulti kade na nɛ e shin nɛ Yuriya yɔ kakpa nɛ bedoŋ be benapo lempo wɔ na.

¹⁷ Bumo doŋana na ka lar kade na to m ba ka kɔ Jɔab nɛ mbe benapo na, nɛ b mɔ ewura Deevid be benapo ko n ta Yuriya gba n ti so.

¹⁸ Ndoŋ nna nɛ Jɔab sa ewura Deevid ebɔl a kaŋɛ mo kananɛ kena na daa du kikɛ,

¹⁹ nseŋ kaŋɛ kabɔ na le: “Fo baŋ kaŋɛ ewura kena ere be asheŋ n loge,

²⁰ e beeŋ nya agbo n wɔtɔ fo nseŋ bishi fo le: ‘Manɛ nna nɛ men taga kade na to ga nsaa kɔ? Menyi maŋ nyi fanɛ baaŋ tiŋ n yili egbal na so n to menyi atanyembi a?

²¹ Menyi maŋ nyiŋi kananɛ b mɔ Gidiɔn pibinyɛn Abimelɛk na be asheŋ nna a? Kache ko ashi Tibez e daŋ yili egbal so n ta kuboo n lɛ to nɛ k ŋmɛa mo m mɔ. Manɛ e ba nɛ men bee nite a kra egbal na loŋ?’ Nɛ ewura kaŋ bishi fo loŋ, fo kaŋɛ mo fanɛ b mɔ fo enimu Yuriya gba.”

²² Ndoŋ nna nɛ kabɔ na ya kaŋɛ Deevid kusɔ kama nɛ Jɔab kaŋɛ mo kenishipereso fanɛ e ba kaŋɛ mo na.

²³ E yɛ: “Anyi doŋana nɛ b lar kade na to nɛ b ba kɔ anyi na daa kɔ eleŋ nna a chɔ anyi, ama an tiŋ n ju bumo nɛ b bɛta n yɔ kade na be kabunagboŋ na akpa.

²⁴ Nɛ b yili egbal na so n to anyi atanyembi nseŋ mɔ fo basa na be beko n ta Yuriya gba n ti so.”

²⁵ Nɛ ewura Deevid kaŋɛ kabɔ na le: “Ya kaŋɛ Jɔab fanɛ e sa maa pɔ aba ŋko n shin nɛ mbe kagbene e baa jija mo, ŋkpal manɛ so, esa kama maŋ nyi esa nɛ e bee wu kena to. Kaŋɛ mo nɛ e laŋɛ ŋ kre mbe ntua nɛnɛ nseŋ kɔ n sɔ kade na.”

²⁶ Bɛshiba ka nu fanɛ mo kul wu, nɛ e shu mbe keeli ga.

²⁷ B ka wora keeli n loge, nɛ ewura Deevid shuŋi nɛ b ya keta mo m ba ewurkpa nɛ e ta mo ŋ ki mbe eche hale nɛ e kurge ebinyɛn n sa mo. Ama kusɔ nɛ Deevid wora na daa maŋ par Enyɛnpe Ebɔrɛ.