2 Samuɛl 1 - EBƆRƐ BE KAWƆL

Deevid ka nu Sɔɔl be luwu be asheŋ

¹ Israɛlebi be ewura Sɔɔl wu kena to nɛ Deevid kɔ m pɔɔ Amalɛkebi na so nseŋ bɛta m ba Ziklag.

² Kumo be nchɛ asa be kaman nɛ kabrantiɛbia ko shi ewura Sɔɔl be keeyi to m ba. E daŋ kpɛa mbe asɔbuuso to nna nseŋ wora shishɛr n wurge mbe kumu so a ŋini kagbenejija nɛ k tɔr mo so. Kumo be kaman nɛ e yɔ Deevid kutɔ n ya jɔŋɛ m bunyaŋ mo.

³ Nɛ Deevid bishi mo le: “Nnɛ nɛ fo shi?” Nɛ e kaŋɛ: “N shi Israɛlebi be keeyi to nna a shil a mɔlga ma kumu.”

⁴ Ndoŋ nna nɛ Deevid kaŋɛ mo le: “Kumo ere kaŋɛ ma kusɔ nɛ k wora.” Nɛ e kaŋɛ: “Anyi be benapo e kilgi a shile nɛ b mɔ bumo be bedamta, hale ewura Sɔɔl nɛ mo pibinyɛn Jonatan gba wu.”

⁵ Nɛ Deevid bishi mo: “Nuso nɛ fo wora m pin fanɛ Sɔɔl nɛ mo pibinyɛn Jonatan wu?”

⁶ Nɛ kabrantiɛbia na kaŋɛ le: “N daŋ bɔla kebeegboŋ nɛ baa tre Gilbɔa na so a choŋ nna nseŋ wu ewura Sɔɔl nɛ e yirgi mbe kekpa so nɛ mo doŋana be egbaŋɛturko nɛ amo bediipoana bee chambɔ mo a wɔtɔ.

⁷ Nɛ e gbɛ ŋ keni n wu ma, nseŋ tre ma nɛ n shuliso,

⁸ nɛ e bishi esa nɛ e la ma, nɛ ŋ kaŋɛ fanɛ Amalɛk be esa e la ma.”

⁹ Ndoŋ nna nɛ e kaŋɛ ma le: “Ba m ba mɔ ma, ŋkpal manɛ so, n doro ga; ma alɛ bee wu nna na.”

¹⁰ Nɛ n yɔ n ya mɔ mo, ŋkpal manɛ so, m baa nyi geeŋ fanɛ kananɛ e doro na so e beeŋ wu. Kumo be kaman nɛ n lara kuwurwuro na mbe kumu so nɛ mbe enɔ to be kepinibi nɛ m ba sa fo, n nyɛnpe!

¹¹ Deevid ka nu loŋ nɛ mo nɛ basa nɛ b wɔ mo kutɔ na kikɛ kpɛa bumo be asɔbuuso to kagbenejijaso.

¹² Nseŋ shu keeli ga ŋ kishi n ya fo kaaseso ŋkpal Ewura Sɔɔl nɛ mo pibi Jonatan nɛ Enyɛnpe Ebɔrɛ be basa Israɛlebi na be bedamta ka wu kena na to so.

¹³ Kumo be kaman nɛ Deevid bishi kabrantiɛbia nɛ e bar kubɔya na le: “Nnɛ ebi e la fo?” Nɛ e kaŋɛ: “N la Amalɛkebi be esa nna, nsaa wɔ fo efuli ere so.”

¹⁴ Nɛ Deevid kaŋɛ mo le: “Manɛ nna nɛ fo nya kagbene m mɔ Enyɛnpe Ebɔrɛ be ewura lara so?”

¹⁵ Kumo be kaman nɛ Deevid tre mbe basa na be eko ŋ kaŋɛ mo le: “Mɔ kanyɛn ere!” Nɛ kanyɛn na bri Amalɛk be esa na n doro mo ga, n nase.

¹⁶ Nɛ Deevid kaŋɛ Amalɛk be esa na le: “Fo e kil le be asheŋ n sa fo kumu na. Fo ka shuli so fanɛ fo e mɔ Enyɛnpe Ebɔrɛ be ewura laraso na so, nɛ le be luwu ere bee ba fo so na.” Kumo be kaman nɛ kabrantiɛbia na wu.

Deevid ka shu Sɔɔl nɛ Jonatan be keeli

¹⁷ Nɛ Deevid kpal Sɔɔl nɛ mo pibinyɛn Jonatan so n shu keeli ŋ karga awɔba.

¹⁸ Nseŋ yili kumo fanɛ a daga Juda be esa kikɛ ka koya kumo. Ketre nɛ e daŋ sa kashɛ na e la Keta be kashɛ. Nɛ b sibɛ kumo n wɔtɔ Jashɛr be kawɔl to.

¹⁹ Kashɛ na nde: O Israɛl, fo kemaŋkura nɛ fo be bejuŋkparpoana e wu a dese abee so na! Fo be benapo lempo kikɛ tɔr kena to. Benapo lempo na kikɛ wu!

²⁰ Sa maŋ ber kumo be kubomboŋ ashi Gaaf ŋko Ashkɛlɔn be abɔrbiana so. Nɛ mannɛ aloŋ, Filisti be nnyamaseche na be ŋgbene beeŋ fuli bumo nɛ b baa tɛto kagbenefuliso

²¹ Sa maŋ shin nɛ bɔrɛ ŋko bunyaŋ a ba Gilbɔa be abee so kikɛ. Sa maŋ shin nɛ kumo alɛ be ndɔana e naŋ wora ajibi. Benapo na be abɛlso kuŋso na kikɛ a dese kasawule a gbelti na. Nɛ Sɔɔl be kebɛlso kuŋso na gba ki kusɔ jiga.

²² Jonatan be keta daa maa to a paŋ. Nɛ Sɔɔl malɛ be tokobi daa maa wu kuwɔr. Bedoŋ lempo nɛ k daa mɔ.

²³ Kemaŋkura nɛ kasha nɛ basa daa kɔ n sa Sɔɔl nɛ Jonatan na daa shi ga. Bumo alɛ be ŋkpa nɛ luwu kikɛ malɛ to, b maŋ yige abar. B daa du manaŋ manaŋ a chɔ kajɔnɔkoso, nsaa kɔ eleŋ malɛ a chɔ ebuluŋ.

²⁴ “Israɛl be beche, men shu Sɔɔl be keeli! E sa menyi yawu kpakpaso be asɔbuuso nseŋ ta abitasɔ nɛ shuwa n ji menyi kebita.

²⁵ Anyi be benapo lempo tɔr kena to. Kena to nɛ b wu n dese. Jonatan wu a dese Gilbɔa be abee ase.

²⁶ N sipo Jonatan, fo shin nɛ kagbenejija gboŋgboŋi tɔr ma so; ŋkpal fo kasha nɛ fo kɔ n sa ma so; Fo daa sha ma a chɔ kananɛ eche bee sha mo kul.

²⁷ Anyi be benapo lempo wu, nɛ bumo be akɔsɔ kikɛ ki asɔ jiga.”