2 Kronikɛls 9 - EBƆRƐ BE KAWƆL

Shɛba be ewurche ka ba bɔɔ ewura Sɔlɔmɔn so be asheŋ

¹ Shɛba be ewurche ka nu kananɛ Ewura Sɔlɔmɔn be ketre daŋ dii ga nna nɛ e keta mbe benimu damta nseŋ kre asɔ nɛ a kɔ efɛa belbelso nɛ shuwa damta ko n deŋi enyɔma so n yɔ Jerusalɛm nɛ e ya bishi ewura Sɔlɔmɔn mmalga kpakpaso. Mo nɛ ewura Sɔlɔmɔn ka tu abar nɛ e bishi mo asheŋ nɛ e wɔ mbe nfɛra to kikɛ.

² Ewura Sɔlɔmɔn daŋ sa mmalga na kikɛ be atuwebi nna. Asheŋ bishiso na be kekama daa maŋ du mo so kpakpa.

³ Shɛba be ewurche na daŋ nu ewura Sɔlɔmɔn be kanyiasheŋ be mmalga nseŋ wu ewura be laŋ nɛ e pɔr na gba.

⁴ E ka wu ajibi nɛ b chige n yili ewura Sɔlɔmɔn be teebɔl so na, nɛ ebuana nɛ mbe benimuana wɔtɔ na, nɛ kananɛ ewura be laŋ na be beshumpo be asheŋ bee bɛ abar so nɛnɛ nɛ epiŋi nɛ nyɛrbi nɛ baa chige ajibi kejigboŋ nɛ esarga be kelara be jemanɛ ashi bɔrɛlambu to na bee buu na, nɛ k chinchiŋ mo alegaiso.

⁵ Ndoŋ nna nɛ e kaŋɛ ewura Sɔlɔmɔn le: “Kusɔ nɛ n nu ma efuli so a laŋɛ fo kaplɛa so nɛ kanyiasheŋ nɛ fo kɔ kikɛ la kashenteŋ nna!

⁶ N daa maŋ yirda kumo be loŋ, ama ŋ gbagba ka ba wu kumo be kashenteŋ ere pɔɛŋ nɛ n yirda. M maŋ nu fo kanyiasheŋ ere be asheŋ be bargato gba. Fo kanyiasheŋ chɔ kananɛ n nu kumo be asheŋ basa kutɔ na ga.

⁷ Basa nɛ baa shuŋ fo nsaa wɔ fo kutɔ saŋkikɛ a nu fo kanyiasheŋ be mmalga na nu ebel pasaa!

⁸ Kemaŋkura e baa la Enyɛnpe fo Ebɔrɛ na peya. Mbe kagbene fuli fo so ga nna so nɛ e ta fo ŋ ki Israɛlebi be ewura nɛ fo baa ji bumo so eleŋ. Ŋkpal e ka bee sha mbe basa Israɛlebi nsaa sha kebaakuŋ bumo saŋkama nɛ so e ta fo ŋ ki bumo be ewura nɛ fo baa ji asheŋ nɛ amo be ekpa so nsaa wora asɔ nɛ a niŋi ekpa a sa bumo na.

⁹ Ewurche na daŋ ta shuwa kilo ŋgboŋ ana nɛ abitasɔ damta nɛ asɔ nɛ a kɔ efɛa belbelso nɛ amo be efɛa maŋ kɔ sara nna m ba sa ewura Sɔlɔmɔn. Asɔ nɛ a kɔ efɛa belbelso kikɛ daa maŋ walɛ n fo amo nɛ Shɛba be ewurche na ta m ba sa ewura Sɔlɔmɔn na so”.

¹⁰ Ewura Sɔlɔmɔn daŋ sa Shɛba be ewurche na kusɔ kama nɛ e daa sha nna. Asɔ nɛ ewura Sɔlɔmɔn daŋ sa mo na daa chɔ kakɛ nɛ ewurche na daŋ bar mo na. Ade be kaman nɛ Shɛba be ewurche na nɛ mbe basa bɛta n yɔ bumo be efuli so.

¹¹ Ewura Hiram nɛ ewura Sɔlɔmɔn be basa nɛ baa shuŋ nchu so na shi efuli nɛ baa tre Ɔfir na nna m bar ewura Sɔlɔmɔn shuwa nɛ ndibi nɛ baa tre junipa na nɛ abitasɔ.

¹² Ewura Sɔlɔmɔn daŋ ta ndibi na nna n lɔŋɛ bɔrɛlambu na nɛ ewura be laŋ be asɔ nɛ baa bɔla so a dii a luri amo to na nseŋ ta amo be ako n lɔŋɛ ejaŋjilaŋ nɛ ejirgo n sa beshɛbompoana. Loŋ be asheŋ maŋ naŋ wora ashi Juda be kasawule so kikɛ.

¹³ Ewura Sɔlɔmɔn daa nya shuwa kilo ŋgboŋ adunyɔ ashi lampo nɛ e bee sɔ to nna.

¹⁴ Ama eyawujipo nɛ benitepo be asɔ nɛ baa sa mo bre maŋ ti so. Areebia be efuli so be bewura nɛ Israɛl be efuli so be abonfu to be gomena be benimu gba daa sa mo gbiti nɛ shuwa nna.

¹⁵ Ewura Sɔlɔmɔn daŋ lɔŋɛ benapo be abɛlso be asɔkuŋso gboŋgboŋi alfa anyɔ nɛ b bɛa shuwa nɛ amo be egbɛ sa fanɛ kilo asa m mata amo be kekama so nna,

¹⁶ nseŋ wora amo be awurbi alfa asa nɛ b bɛa shuwa nɛ amo be egbɛ sa fanɛ kilo koŋwule nɛ bargato m mata amo alɛ be kekama so. E daŋ shin nna nɛ b ta asɔkuŋso na kikɛ n yili ewura be laŋ to be ebugboŋ nɛ baa tre Lebanɔn be kupo na to.

¹⁷ Kusɔlnyi nɛ b daŋ ta n lɔŋɛ mbe kuwurputi be echenakpa gboŋgboŋi nseŋ ta shuwa lela malɛ m mata m mata kumo kikɛ so.

¹⁸ Atemprembi ashe nɛ baa dii so a yɔ kuwurputi na be echenakpa. B daŋ ta shuwa nna mata kabɛ nɛ mbe aya bee yili so nɛ echenakpa na be kakpa nɛ enɔ bee deŋi so na kikɛ nna. Ebuluŋ be mpɔrduli malɛ daa yil kuwurputi na be bena nɛ jisoso kikɛ nna.

¹⁹ Ebuluŋ be mpɔrduli kuduanyɔ e daa yil atemprembi ashe na ase. Ketemprembi kama be kaba kama daa kɔ buluŋ be kapɔrduli nna m mata kumo. Loŋ be ewura be echenakpa na be kaduli maŋ wɔ efuli kikɛ so.

²⁰ Shuwa lela nɛ b daŋ ta n lɔŋɛ ewura Sɔlɔmɔn be asɔ nuu nchu nɛ laŋ to be asɔjito nɛ a wɔ mbe laŋ to be ebugboŋ nɛ baa tre Lebanɔn be kupo na to. Ewura Sɔlɔmɔn be jemanɛ so b daa maa keni gbiti a bɔlɔ kenishi ŋkpal shuwa ka daŋ chase kaplɛkama so.

²¹ Ewura Sɔlɔmɔn daa kɔ nchu so be ekuloŋgboŋ damta nɛ amo nɛ ewura Hiram be nchu so be ekuloŋgboŋ bee nite nchu so. Nfɛ asa kikɛ mbe nchu so be ekuloŋgboŋ na daa sulɔ shuwa nɛ gbiti nɛ asɔlnyii nɛ enyare nɛ efɛate nna a bɛta a ba.

²² Ewura Sɔlɔmɔn daa kɔ kedamaya nɛ kanyiasheŋ a chɔ ewura kikɛ durnya to.

²³ Bewura kikɛ daa ba mo kutɔ nna m baa kaa a nu mbe kanyiasheŋ be mmalga nɛ Ebɔrɛ ta n sa mo na.

²⁴ Bewura nɛ baa ba mo kutɔ na be ekama daa bar mo kakɛ nna. Beko daa bar mo gbiti nɛ shuwa nɛ epiŋi tenteŋ nɛ akɔsɔ nɛ asɔ nɛ a kɔ efɛa belbelso nɛ egbaŋɛ nɛ ekurma. Loŋ nɛ bekama nɛ baa ba mo kutɔ kafɛ kafɛ kikɛ na daa wora.

²⁵ Ewura Sɔlɔmɔn daa kɔ egbaŋɛturko nɛ egbaŋɛ be eyilikpa ŋgboŋ ana nna, nsaa kɔ egbaŋɛ nawule malɛ ŋgboŋ kuduanyɔ. E daŋ shin nna nɛ amo be ako wɔ Jerusalɛm nɛ ako malɛ wɔ mbe nde pɔtɛana to.

²⁶ Mo e daa ji bewura nɛ b wɔ Lɔrgboŋ nɛ baa tre Yufreetes na ashi kelargato be esoso n ya fo Filistiebi be efuli so ashi kelargato be kaseto n ta n ya fo Ijiptebi be kasawule be egbaŋ to kikɛ so eleŋ.

²⁷ Mbe jemanɛ so gbiti daŋ baŋ gbigi Jerusalɛm nna fanɛ ajembu na, nɛ ndibi nɛ baa tre sida na malɛ gba daŋ gbigi fanɛ ndibi nɛ baa tre sikamɔɔ nɛ e wɔ Juda be kebeemase na.

²⁸ Ijipt nɛ efuli pɔtɛana so nɛ ewura Sɔlɔmɔn daa tɔ mbe egbaŋɛ.

Ewura Sɔlɔmɔn be lalaloge be kamalga be asheŋ

²⁹ B daŋ sibɛ kusɔ kama nɛ ewura Sɔlɔmɔn naŋ wora saŋɛ nɛ e daa la ewura na nna n wɔtɔ anebi Neetan nɛ anebi Abija nɛ e shi Shilo na nɛ anebi Iduu nɛ e sibɛ Nebat pibinyɛn Jeroboam be asheŋ na be nwɔl to.

³⁰ Nfɛ adena nɛ Sɔlɔmɔn daŋ ji Israɛl be kasawule so kikɛ be kuwura ashi Jerusalɛm to.

³¹ E ka wu nɛ b ya puli mo Jerusalɛm nɛ baa tre Deevid be kade to na, nɛ mo pibinyɛn, Rehoboam, malɛ sɔ mo so ŋ ki ewura.