2 Kronikɛls 7 - EBƆRƐ BE KAWƆL

Keta bɔrɛlambu na m bɔɔ Ebɔrɛ enɔ be asheŋ

¹ Ewura Sɔlɔmɔn ka kule Ebɔrɛ n loge, nɛ edɛ shi esoso m ba chɔɔ sarga nɛ b lara na. Ndoŋ nna nɛ Enyɛnpe Ebɔrɛ be kefulto nyaŋɛ n fulto bɔrɛlambu na kikɛ to.

² Bɔrɛmatapoana na daŋ maŋ tiŋ n luri bɔrɛlambu na to ŋkpal kefulto gboŋgboŋi nɛ k nyaŋɛ a wɔ kumo to na so.

³ Israɛlebi na kikɛ ka wu edɛ na ka shi esoso m ba sɔ bɔrɛlambu na kikɛ to na, nɛ b gbir m bunyaŋ Ebɔrɛ a di mo epaŋ ŋkpal mbe kelela nɛ mbe kasha nɛ k wɔtɔ mbaanaayɔ so.

⁴ Ndoŋ nna nɛ ewura Sɔlɔmɔn nɛ basa na kikɛ lara esarga n sa Enyɛnpe Ebɔrɛ.

⁵ Ewura Sɔlɔmɔn daŋ mɔ ana ŋgboŋ adunyɔ nɛ anyɔ nɛ mbolpɔ nɛ mboe malɛ ŋgboŋ kalfa nɛ adunyɔ nna n lara kɔnɔkoŋwuleso be sarga pɔɛŋ nɛ mo nɛ basa na kikɛ ta bɔrɛlambu na m bɔɔ Ebɔrɛ enɔ.

⁶ Israɛlebi na kikɛ daŋ niŋi to a yil nna. Bɔrɛmatapoana na daa yil kakpa nɛ b sa bumo na nna. Nɛ Livaiebi na malɛ yili ŋ kilgi anishito n shoŋi bumo nsaa laŋ alaŋsɔ nɛ ewura Deevid sa bumo na a maŋkura Enyɛnpe Ebɔrɛ a boŋ nshɛ a kaŋɛ: “Mbe kasha wɔtɔ nna mbaanaayɔ!” Bɔrɛmatapoana na malɛ daa foŋ mbel nna.

⁷ Ewura Sɔlɔmɔn daŋ ta kelɔnɛ na be nferinto a mata bɔrɛlambu na be anishito ase na nna m bɔɔ Ebɔrɛ enɔ nseŋ lara kechɔɔ m mur be esarga nɛ kɔnɔkoŋwuleso be asɔbɔya be esarga be nfɔ nɛ ajibi be sarga. E daŋ wora loŋ nna ŋkpal danyaŋ be bɔrɛsure nɛ e daŋ pɔr na ka daa maŋ shibi ga nɛ b baa lara esarga na kikɛ kumo so so.

⁸ Ewura Sɔlɔmɔn nɛ Israɛlebi na kikɛ daŋ ji abuu to be kebaawɔtɔ be kejigboŋ nchɛnshunu nna m bɛ abar so. Basa damta na be beko daŋ shi Hamaf Paas ashi kelargato be esoso be kaba so nna nɛ beko malɛ shi Israɛl nɛ Ijipt be kasawule be egbaŋ to ashi kelargato be kaseto be kaba so.

⁹ B daŋ ji nchɛnshunu nna ŋkpal bɔrɛsure na be keta m bɔɔ Ebɔrɛ enɔ so nseŋ naŋ ji nchɛ ashunu malɛ ŋkpal abuu to be kebaawɔ be kejigboŋ na so n ti so. Kumo be kaman nɛ b ta kachɛ koŋwule n ti so n shɛr m bunyaŋ Ebɔrɛ.

¹⁰ Kumo be ŋklade nɛ k la kufɔl shunusopo na be nchɛ adunyɔ nɛ asa na, nɛ ewura Sɔlɔmɔn shin nɛ basa na kikɛ yɔ bumo peana. Bumo be ŋgbene daŋ fuli bumo ga ŋkpal kananɛ Enyɛnpe Ebɔrɛ daŋ nɛfa mbe basa Israɛlebi, nɛ ewura Deevid nɛ ewura Sɔlɔmɔn so.

Ebɔrɛ ka naŋ lara mbe kumu ŋ ŋini ewura Sɔlɔmɔn be asheŋ

¹¹ Ewura Sɔlɔmɔn ka pɔr bɔrɛlambu na nɛ ewura be laŋ na n loge, nɛ kusɔ kama nɛ e kre n yili a yɔ amo be kaplɛa so na nite nɛnɛ,

¹² nɛ Enyɛnpe Ebɔrɛ lara mbe kumu ŋ ŋini mo edare to kanyɛso nseŋ kaŋɛ mo le: “N nu fo kabɔrɛkule nseŋ shuli fanɛ bɔrɛlambu ere to nɛ baaŋ baa lara esarga a sa ma.

¹³ Nɛ fanɛ m pɛ bɔrɛ ŋko n shin nɛ elotɔr ba ji menyi be adɔjibi ŋko n shin nɛ aleblawu ko ba ma basa so,

¹⁴ nɛ ma basa bar bumo be amu kaseto ŋ chɛrga bumo be nfɛra a laŋɛ alubi nɛ baa wora na be kaplɛa so nseŋ kule ma bre, meeŋ yili esoso n nu bumo be kekule nseŋ ta bumo be alubi m paŋ bumo nseŋ naŋ nɛfa bumo be kasawule n shin nɛ k baa wora adɔjibi nɛnɛ.

¹⁵ Meeŋ nu kekule kama nɛ b kule bɔrɛlambu ere to,

¹⁶ ŋkpal manɛ so k la meya nna. Baaŋ baa shuŋ ma ndoŋ hale mbaanaayɔ, ma alɛ maaŋ yige kumo be kekeni so kikɛ.

¹⁷ Fo tuto Deevid daa kɔ kasonu nna n sa ma amoso fo alɛ gba, Sɔlɔmɔn e baa wora loŋ. Baa bɛ ma mbra nɛ ma keŋini so,

¹⁸ saŋɛ na so ma kɔnɔ nɛ n nase n sa fo tuto fanɛ mbe kanaŋ to be esa e naŋ baa ji Israɛl be kuwura saŋkama na beeŋ bɔlɔ so.

¹⁹ Ama nɛ fanɛ fo ŋko Israɛl be basa ko kini kebɛ ma mbra so nsaa shuŋ efuli pɔtɛana so be agbir,

²⁰ kumo ere meeŋ lara menyi ashi kasawule nɛ n ta n sa menyi ere so nseŋ lar bɔrɛlambu nɛ n nɛfa ŋ kaŋɛ fanɛ meeŋ baa wɔ ndoŋ nɛ men baa bunyaŋ ma na to nɛ basa kikɛ e ta kumo fanɛ epel be kakpa nsaa keni kumo jiga.

²¹ Kashenteŋ nna fanɛ bɔrɛlambu na walɛ, ama nɛ kumo be loŋ kaŋ ba wora, k beeŋ chinchiŋ basa kama nɛ baa bɔla kumo ase a choŋ nɛ b baa bishi le: ‘Manɛ nna nɛ Enyɛnpe Ebɔrɛ wora mbe basa nɛ b wɔ mbe bɔrɛlambu to le?’

²² Nɛ basa e kaŋɛ bumo le: ‘Ŋkpal b ka kplaŋ Enyɛnpe bumo tutoana be ebɔrɛ nɛ e lara bumo ashi Ijipt be efuli so na so nseŋ ya kaa shuŋ agbir pɔtɛana so nɛ e shin nɛ le be aleblawu ba bumo so na.’ ”