2 Kronikɛls 6 - EBƆRƐ BE KAWƆL

Ewura Sɔlɔmɔn ka malga n sa basa na be asheŋ

¹ Ade be kaman nɛ ewura Sɔlɔmɔn kule Ebɔrɛ le: “Enyɛnpe Ebɔrɛ, fo e kaŋɛ fanɛ feeŋ baa wɔ awɔlpa lembir ere to.

² Naniere bre, m pɔr kemaŋkura be bɔrɛlambu nɛ feeŋ baa wɔ ndoŋ mbaanaayɔ.”

³ Israɛlebi na kikɛ daŋ shɛr abar so a yil ndoŋ nna nɛ ewura Sɔlɔmɔn na kilgi mbe anishito n shoŋi bumo nseŋ nɛfa bumo.

⁴ Le nɛ e daŋ kaŋɛ: “Kapandi e baa la Enyɛnpe Ebɔrɛ nɛ e la Israɛl be Ebɔrɛ na peya! Mo e daŋ shin nɛ mbe nnɔ naseso bɔlɔ so n sa n tuto ewura Deevid nseŋ kaŋɛ mo fanɛ,

⁵ yili saŋɛ so nɛ n lara ma basa ashi Ijipt be efuli so na hale m ba fo kabre, maŋ lara kade kama ashi Israɛl be kasawule so fanɛ k baa la kakpa nɛ baaŋ pɔr bɔrɛlambu nsaa bunyaŋ ma ndoŋ, ma alɛ maŋ lara esa kama fanɛ e baa juŋkpar ma basa Israɛlebi.

⁶ Naniere bre Jerusalɛm nɛ n lara fanɛ k baa la kade nɛ baaŋ baa bunyaŋ ma kumo to, nɛ fo alɛ Deevid e baa juŋkpar ma basa.”

⁷ Kumo be kaman nɛ ewura Sɔlɔmɔn kaŋɛ le: “N tuto ewura Deevid e daŋ yili kumo fanɛ e beeŋ pɔr bɔrɛlambu nɛ b baa bunyaŋ Enyɛnpe nɛ e la Israɛl be Ebɔrɛ na ndoŋ,

⁸ ama le nɛ Enyɛnpe Ebɔrɛ na daŋ kaŋɛ mo: ‘Fo ka yɛ feeŋ pɔr bɔrɛlambu n sa ma ere, k kɔ ekpa ga,

⁹ ama mannɛ fo e naaŋ pɔr kumo, fo pibinyɛn nɛ e la fo gbagba be ŋklaŋ na e naaŋ ba pɔr ma bɔrɛlambu na n sa ma.’

¹⁰ Enyɛnpe Ebɔrɛ be kɔnɔ nɛ e nase na bɔlɔ so naniere bre. Ma e sɔ n tuto so n ji Israɛl be kuwura, ma alɛ e pɔr bɔrɛlambu nɛ baaŋ ba bunyaŋ Enyɛnpe Israɛl be Ebɔrɛ na kumo to na.

¹¹ N ta Enyɛnpe Ebɔrɛ be ŋkre be deka na n yili bɔrɛlambu na to, nseŋ ta ajembu paŋgelambi anyɔ nɛ b sibɛ ŋkre n deŋi so nɛ Enyɛnpe Ebɔrɛ na nɛ an nananyɛnana kre saŋɛ nɛ e lara bumo ashi Ijipt be efuli so dra dra na n wɔtɔ kumo to.”

Ewura Sɔlɔmɔn be kabɔrɛkule be asheŋ

¹² Ndoŋ nna nɛ ewura Sɔlɔmɔn yili bɔrɛsure na be anishito Israɛlebi na kikɛ be anishito m maaŋ mbe enɔana so ŋ kule Ebɔrɛ.

¹³ Sɔlɔmɔn daŋ wora danyaŋ be ketempreŋ nɛ kumo be nteŋ la ayadra ashunu nɛ bargato nɛ kumo be mparto gba la ayadra ashunu nɛ bargato nɛ kumo be jeŋgreŋ la ayadra anu nna n yili kelɔnɛ na be kowushina be nferinto. E daŋ yuu kusɔ jeŋgreŋ ere nna nseŋ gbir kumo so m maŋ mbe enɔana so esoso, kakpa nɛ ekama beeŋ baa wu mo,

¹⁴ ŋ kule Ebɔrɛ le: “Enyɛnpe nɛ fo la Israɛl be Ebɔrɛ na, Ebɔrɛ kikɛ maŋ naa wɔtɔ fanɛ fo ashi esoso nɛ kasawule kikɛ. Fo maa teŋ ŋkre nɛ fo nɛ fo basa nase n sa abar na so kikɛ. Fo alɛ bee ŋini bumo fo kasha saŋɛ so nɛ b ta bumo be ŋgbene kikɛ a wora kasonu a sa fo na nna.

¹⁵ Fo shin nɛ fo kɔnɔ nɛ fo nase n sa n tuto ewura Deevid na bɔlɔ so kabre.

¹⁶ Naniere, Enyɛnpe nɛ fo la Israɛl be Ebɔrɛ, shin nɛ fo kɔnɔ nɛ fo nase n sa n tuto ewura Deevid fanɛ nɛ mbe kaman to ebi baa wora fo kasonu bre, bumo e naŋ baa ji Israɛl be kuwura na e bɔlɔ so.

¹⁷ Enyɛnpe nɛ fo la Israɛl be Ebɔrɛ na, shin nɛ kusɔ kama nɛ fo nase kumo be kɔnɔ n sa fo kenya ewura Deevid na a bɔlɔ so.

¹⁸ Fo Ebɔrɛ beeŋ tiŋ a wɔ edimɛdi to durnya ere to a? Esoso kikɛ gba maaŋ tiŋ n sɔ fo. Nɛ nuso nɛ bɔrɛlambu nɛ m pɔr ere bre beeŋ tiŋ n sɔ fo?

¹⁹ N nyɛnpe Ebɔrɛ, n la fo kayɛrbi nna, nu ma kabɔrɛkule ere nseŋ wora kusɔ nɛ mee kule ere n sa ma.

²⁰ Ba keni bɔrɛlambu ere so kapa nɛ kanyɛ. Fo nase kɔnɔ n sa ma fanɛ, ndoŋ nɛ baaŋ ba bunyaŋ fo. Amoso saŋkama nɛ m baŋ kilgi anishito n shoŋi bɔrɛlambu ere ŋ kule fo, fo nu ma kekule.

²¹ Saŋkama nɛ ma nɛ fo basa Israɛlebi baŋ kilgi anishito n shoŋi kakpa ere a kule fo Ebɔrɛ, fo yili fo pe ebɔrɛso n nu n sa anyi nseŋ ta anyi be alubi m paŋ anyi.

²² Nɛ fanɛ b ku asheŋ nna n deŋi esa fanɛ e wora mo barkasa kulubi nseŋ bar mo bɔrɛsure ase ashi fo bɔrɛlambu ere to m ba kaŋɛ fanɛ e bɔ ntaŋ fanɛ e maŋ wora shɛŋ,

²³ kumo ere Enyɛnpe Ebɔrɛ, fo yili esoso n ji fo nyɛrbi demu nseŋ gberge esa nɛ e ji n tɔr na kusoe nseŋ yige emo nɛ e maŋ ji n tɔr na.

²⁴ Nɛ bedoŋ baaŋ kɔ m pɔɔ fo basa Israɛlebi so ŋkpal b ka wora alubi ŋ gbiti fo so, nɛ b baaŋ chɛrga bumo be nfɛra nseŋ ba fo kutɔ bɔrɛlambu ere to m ba kule fo alubi be ketampaŋ,

²⁵ kumo ere fo yili esoso n nu bumo be kekule nseŋ ta bumo be alubi m paŋ bumo nseŋ bɛta bumo m ba kasawule nɛ fo ta n sa bumo nɛ bumo nananyɛnana na so.

²⁶ Fo baaŋ pɛ bɔrɛ ŋ keta ŋkpal fo basa ka wora kulubi ŋ gbiti fo so nɛ b baaŋ tuba nseŋ kilgi bumo be anishito n shoŋi bɔrɛlambu m bar bumo be amu ase ŋ kule fo,

²⁷ kumo ere, Enyɛnpe Ebɔrɛ yili esoso n nu bumo be kekule nseŋ ta fo basa Israɛlebi be alubi m paŋ bumo nseŋ ŋini bumo kusɔ nɛ k daga nseŋ shin nɛ bɔrɛ e ba fo kasawule nɛ fo ta n sa fo basa fanɛ bumo be kapetɛ mbaanaayɔ ere so.

²⁸ Nɛ akoŋ baŋ tɔr kasawule ere so, ŋko aleblawu ko e ba ŋko afugboŋ tushiso ŋko elotɔr e ba jija bumo be adɔjibi, ŋko bedoŋ ko e ba kaa kɔ bumo kena ŋko kayurnyaŋ ŋko kulɔ ko e ba luri bumo to,

²⁹ kumo ere fo nu bumo be kekule. Nɛ fo basa Israɛlebi baŋ ta kagbenejija n teŋi bumo be enɔana kabɔrɛkule to n shoŋi bɔrɛlambu ere,

³⁰ fo yili esoso n nu bumo be kekule nseŋ ta bumo be alubi m paŋ bumo. Fo nawule e nyi dimɛdi be kagbene to. Shin nɛ ekama e nya mbe asheŋ woraso be kakɔka,

³¹ saŋɛ na so fo basa beeŋ baa bunyaŋ fo nsaa nu a sa fo ashi kasawule nɛ fo ta n sa an nananyɛnana ere so.

³² Befɔ nɛ b shi kufɔ na kaŋ nu eleŋ nɛ fo kɔ nɛ kananɛ fee teŋi fo enɔ lempo na a wora asheŋ na, kaŋ baŋ ba bɔrɛlambu ere to m ba kule fo,

³³ kumo ere fo yili esoso n nu bumo be kekule nseŋ wora kusɔ nɛ baa sha n sa bumo saŋɛ na so durnya be basa kikɛ beeŋ pin fo nsaa nu a sa fo fanɛ kananɛ fo basa Israɛlebi bee nu a sa fo na. Loŋ nɛ baaŋ pin fanɛ bɔrɛlambu nɛ m pɔr ere e la kakpa nɛ k daga fanɛ b baa bunyaŋ fo na.

³⁴ Fo kaŋ kaŋɛ fo basa kenishipereso fanɛ b ya kɔ bumo doŋana kena nɛ b yili kaplɛkama ŋ kilgi bumo be anishito n shoŋi kade nɛ fo lara nɛ bɔrɛlambu nɛ m pɔr n sa fo ere ŋ kule fo,

³⁵ kumo ere fo yili esoso n nu bumo be kekule n shin nɛ b kɔ m pɔɔ so.

³⁶ Ekama bee wora alubi, amoso hale nɛ fo basa wora alubi ŋ gbiti fo nɛ fo nya agbo n wɔtɔ bumo nseŋ ta bumo m bɔɔ bumo doŋana enɔ nɛ b pɛ bumo n yɔ efuli pɔtɛ nɛ k wɔ kufɔ so gba,

³⁷ fo nu fo basa be kabɔrɛkule. Nɛ fanɛ b chɛrga bumo be nfɛra nseŋ kule fo a bugi to e kaŋɛ bumo be alubi kananɛ b la basa lubi nɛ kananɛ b la amu kpakpasowuraana ashi efuli na so, kumo ere Enyɛnpe Ebɔrɛ, fo nu bumo be kekule.

³⁸ Nɛ fanɛ b chɛrga bumo be nfɛra kashenteŋto nna ashi efuli na so bre nseŋ kilgi bumo be anishito n shoŋi kasawule nɛ fo ta n sa an nananyɛnana na nɛ kade nɛ fo lara ere nɛ bɔrɛlambu nɛ m pɔr n sa fo ere nseŋ kule fo,

³⁹ kumo ere fo yili esoso n nu bumo be kekule nseŋ wu bumo kuwɔr n ta fo basa be alubi kikɛ m paŋ bumo.

⁴⁰ O Ebɔrɛ, keni anyi so nseŋ nu anyi be kabɔrɛkule nɛ anyee kule nfe ere.

⁴¹ Enyɛnpe Ebɔrɛ, koso m bɔla ŋkre be deka nɛ k yili a sa eleŋ nɛ fo kɔ na so n luri bɔrɛlambu ere to, nsaa wɔ ndoŋ mbaanaayɔ. Nɛfa fo bɔrɛmatapoana ashi kusɔ kama nɛ baa wora to nseŋ shin nɛ fo basa malɛ kikɛ be ŋgbene e fuli bumo ŋkpal fo kelela nɛ fee wora a sa bumo so.

⁴² Enyɛnpe Ebɔrɛ, sa maŋ kini ewura nɛ fo lara na n lɛ. Baa nyiŋi kasha nɛ fo kɔ n sa fo kayɛrbi ewura Deevid na.”