2 Kronikɛls 35 - EBƆRƐ BE KAWƆL

Ewura Josaya ka ji kebansonchoŋ be kejigboŋ na be asheŋ

¹ Ewura Josaya daŋ yili kumo nna fanɛ b ji kebansonchoŋ be kejigboŋ na ashi Jerusalɛm m maŋkura Enyɛnpe Ebɔrɛ na; nɛ b mɔ kejigboŋ na be kubɔlpo na kufɔl sososo na be nchɛ kuduana na.

² E daŋ sa bɔrɛmatapoana na kushuŋ nɛ k daga fanɛ b baa shuŋ bɔrɛlambu na to nna, nseŋ leŋ bumo to fanɛ b baa shuŋ kumo nɛnɛ.

³ Kusɔ nɛ e daŋ kaŋɛ Livaiebi nɛ b ta m bɔɔ Enyɛnpe Ebɔrɛ enɔ nɛ b la Israɛlebi be mbra ŋinipoana na nde: “Men maaŋ naa sulɔ Enyɛnpe Ebɔrɛ be ŋkre be deka cheembi na a nite a kilgi to, ŋkpal manɛ so k tea yil bɔrɛlambu nɛ ewura Sɔlɔmɔn nɛ e la ewura Deevid pibinyɛn na pɔr nɛ menyeeŋ baa shuŋ Enyɛnpe men be Ebɔrɛ na nɛ mbe basa Israɛlebi na to nna.

⁴ Men wora shiriya mbuna mbuna so n shuŋ kushuŋ nɛ ewura Deevid nɛ mo pibinyɛn ewura Sɔlɔmɔn sa menyi na,

⁵ nseŋ barga men be amu to, saŋɛ na so Israɛl be kanaŋ kikɛ beeŋ baa nya kechɛto men kutɔ ashi bɔrɛlambu na to.

⁶ Basa baŋ bar kebansonchoŋ be ekpakpafɔlbi nɛ mboe, menyi e daga fanɛ men mɔ amo n lɔŋɛ amo nseŋ fɔr menyi be amu so daŋkare be ekpa so pɔɛŋ n ta amo n lara sarga n sa Enyɛnpe Ebɔrɛ na, nseŋ shin nɛ Israɛlebi e bɛ keŋini nɛ Enyɛnpe Ebɔrɛ ta n sa Mosis na so n ji kejigboŋ na. Amoso men keta men be amu nɛnɛ, n sa maŋ wora kusɔ kama nɛ k beeŋ shin nɛ men wora eyurpi daŋkare be ekpa so.”

⁷ Mbɔlpo nɛ mboe ŋgboŋ adesa, nɛ egbolu malɛ ŋgboŋ asa nɛ ewura Josaya gbagba daŋ lara n sa fanɛ b ta n lara kebansonchoŋ be sarga na.

⁸ Mbe benimuana na gba daŋ lara asɔbɔya nna n sa basa na nɛ bɔrɛmatapoana nɛ Livaiebi na. Hilkiya nɛ Zakareya nɛ Jehiɛl nɛ baa keni bɔrɛlambu na so na gba daŋ ta ekpakpafɔlbi nɛ mboe ŋgboŋ anyɔ nɛ alfa ashe nɛ egbolu alfa asa nna n sa bɔrɛmatapoana na fanɛ b ta n lara sarga kebansonchoŋ be kejigboŋ na be kachɛ na.

⁹ Konaya nɛ Shemaya nɛ Natanɛl nɛ b la Konaya mo sipoana na, nɛ Hashabia nɛ Jeɛl nɛ Jozabad nɛ b la Livaiebi be benimu na gba daŋ bar ekpakpafɔlbi nɛ mboefɔlbi ŋgboŋ anu nɛ egbolu alfa anu nna m ba sa Livaiebi na fanɛ b ta n lara sarga.

¹⁰ B ka daŋ bela kusɔ kama ase n loge nsaa shin nɛ b ji kebansonchoŋ be kejigboŋ na, nɛ bɔrɛmatapoana na nɛ Livaiebi na ya yili bumo be eyilikpa nɛ ewura na daŋ sa bumo na.

¹¹ B ka mɔ ekpakpafɔlbi na nɛ mboe na n loge, nɛ Livaiebi na bɛ amo nɛ bɔrɛmatapoana na malɛ ta amo be ŋklaŋ ŋ ŋmenyaŋ bɔrɛsure na so.

¹² Ndoŋ nna nɛ b barga eblaŋ nɛ baaŋ ta n lara sarga chɔɔso na to n sa basa na kanaŋ kanaŋ nɛ ntuŋ ntuŋ so fanɛ kananɛ Mosis ŋini mbe mbra na to na gbagba chap. Loŋ koŋwule na nɛ b daŋ ta egbolu na gba n wora.

¹³ Livaiebi na daŋ tɔ kebansonchoŋ be kejigboŋ be esargablaŋ na edɛ to nna fanɛ kananɛ mbra na ŋini na gbagba chap, nseŋ chige amo manaŋ manaŋ n sa basa na. Mpuliya nɛ edadishani nɛ echeenshi nɛ b daŋ ta n daŋɛ eblaŋ nɛ a ka na bre.

¹⁴ Bɔrɛmatapoana na daŋ chɔɔ asɔbɔya nɛ baa chɔɔ kelelemuto na nna, nɛ asɔbɔya be eblaŋ lela nɛ baa chɔɔ a lara sarga na bɔrɛsure na so nna hale nɛ kanyɛ ya biri. B ka wora ade kikɛ n loge, nɛ Livaiebi na chige eblaŋ nɛ a ka na to n sa bumo be amu nɛ bɔrɛmatapoana nɛ b la Ɛɛrɔn be kaman to ebi na.

¹⁵ Livaiebi nɛ b la beshɛbompo nsaa shi Asaf be kabuna na bre daa wɔ kaboŋ nɛ ewura Deevid nɛ Asaf nɛ Heman nɛ Jedutum nɛ e la ewura Deevid be anebi na daŋ yili fanɛ b baa wɔ na nna. Bekumpo nɛ baa keni bɔrɛlambu na be mbuna so na gba daa maŋ yige bumo be ashuŋ, ŋkpal bumo braana Livaiebi na ka shuŋ kebansonchoŋ be kejigboŋ na be kushuŋ n sa bumo so.

¹⁶ Ewura Josaya daŋ shin nna nɛ b ji Kebansonchoŋ be kejigboŋ na, nseŋ chɔɔ esarga bɔrɛsure na so m bunyaŋ Enyɛnpe Ebɔrɛ na kananɛ b yili kumo dra dra na gbagba chap.

¹⁷ Ndoŋ nna nɛ Israɛl be basa na ta nchɛ ashunu m bɛ abar so n ji Kebansonchoŋ be kejigboŋ na. Kumo koŋwule nɛ baa tre Bodobodo nɛ a maŋ kɔ yiisi na be kejigboŋ na.

¹⁸ Baŋ yili anebi Samuɛl be jemanɛ so kikɛ, basa daŋ maŋ naŋ shɛr alegaiso n ji kebansonchoŋ be kejigboŋ loŋ kikɛ. Bewura nɛ b ji n choŋ na be ekama daŋ maŋ ji kebansonchoŋ be kejigboŋ fanɛ kananɛ ewura Josaya nɛ bɔrɛmatapoana nɛ Livaiebi nɛ Juda nɛ Israɛl nɛ Jerusalɛm be basa kikɛ chala n ji kumo na.

¹⁹ Ewura Josaya ka ji kuwura be kafɛ kuduaburwasopo to nɛ b daŋ ji le be kejigboŋ ere.

Ewura Josaya be kuwurji be lalaloge be asheŋ

²⁰ Ade kikɛ be kaman, saŋɛ nɛ ewura Josaya lɔŋɛ bɔrɛlambu na to n loge na, nɛ ewura Neeko nɛ e shi Ijipt be efuli so, juŋkpar mbe benapo n yɔ Kachimish nɛ k wɔ Yufreetes be lɔrgboŋ na ase na nɛ b ya kɔ kena. Nɛ ewura Josaya gba nɛ mbe benapo lar n yɔ nɛ b ya tu bumo ŋ kɔ,

²¹ nɛ ewura Neeko ta le be kubɔya ere n sa ewura Josaya. E yɛ: “Juda be ewura, fo kɔnɔ maŋ ti kena nɛ mee kɔ ere so. Mannɛ fo nɛ m ba nɛ m ba kɔ, ndoŋana nɛ m ba nɛ m ba kɔ nɛ Ebɔrɛ kaŋɛ ma fanɛ n wora loŋ manaŋ. Ebɔrɛ wɔ ma kaman, amoso sa maŋ kuŋ ma akpa, nɛ mannɛ aloŋ e beeŋ mur fo.”

²² Ama ewura Josaya bre daŋ baa yili kena na be kekɔ so nna. E daŋ kini kenu kusɔ nɛ Ebɔrɛ bɔla ewura Neeko so ŋ kaŋɛ na nna nseŋ chɛrga mbe asɔbuuso n yɔ Magido be kepla na so n ya kɔ ewura Neeko kena.

²³ Kena na to nɛ Ijipt be benapo ko to atanyembi n da ewura Josaya. Ndoŋ nna nɛ e kaŋɛ mbe nyɛrbi le: “Men keta ma n lar nfe, ŋkpal manɛ so n doro ga!”

²⁴ Ndoŋ nna nɛ b lara mo gbaŋɛturko nɛ e daa wɔtɔ na to n wɔtɔ mbe gbaŋɛturko pɔtɛ to n yɔ Jerusalɛm. E ka wu, nɛ b ya puli mo kakpa nɛ baa puli bewura na, nɛ Juda nɛ Jerusalɛm be basa kikɛ shu mbe keeli.

²⁵ Ndoŋ nna nɛ anebi Jɛremaya wora ewura Josaya be keeli be kashɛ. Israɛl be benyɛn nɛ beche kra boŋ kashɛ na a nyiŋi ewura Josaya be luwu saŋkama. Loŋ be kashɛ na wɔ Israɛlebi be nli be nshɛ be kawɔl to.

²⁶ Ewura Josaya be kananɛ e ta mbe kumu m bɔɔ Enyɛnpe Ebɔrɛ enɔ nɛ kananɛ e daa wora kasonu a sa Enyɛnpe be mbra na,

²⁷ nɛ mbe sososo nɛ lalaloge kikɛ be kusɔ nɛ e wora kikɛ wɔ Israɛl nɛ Juda be bewura be adrasheŋ be nwɔl to.