2 Kronikɛls 34 - EBƆRƐ BE KAWƆL

Juda be ewura Josaya be asheŋ

¹ Josaya daŋ ji nfɛ aburwa nna pɔɛŋ nseŋ ki Juda be ewura, mo alɛ daŋ ji kuwura Jerusalɛm to nfɛ adesa nɛ kako nna.

² E daa wora asheŋ nɛ a niŋi ashi Enyɛnpe Ebɔrɛ be anishito nna nsaa bɛ mo nananyɛn ewura Deevid be aya so nɛ Ebɔrɛ be mbra na kikɛ so dede.

³ Josaya ka ji kuwura be kafɛ burwasopo to, jemanɛ nɛ e kra la kabrantiɛfɔlbi na, nɛ e fara a bunyaŋ mo nananyɛn ewura Deevid be Ebɔrɛ na. Mbe kuwurji be kafɛ kuduanyɔsopo to, nɛ e fara a jija mboŋ nɛ nnyamase bee shuŋ bumo be agbir, nɛ kegbirche Ashira be mpɔrduli nɛ agbir nɛ b shɛl, nɛ amo nɛ b ŋalga asɔ n wora na kikɛ ashi Juda be efuli so nɛ Jerusalɛm to.

⁴ E daŋ shin nna nɛ b bure kegbir nɛ baa tre Baal na be ebɔrɛsure nɛ ebɔrɛsure nɛ baa chɔɔ duwu amo so na. Nseŋ shin nɛ b bɛa kegbirche Ashira be mpɔrduli nɛ agbir nɛ a ka na kikɛ to n lɛ basa nɛ b daa shuŋ amo na be nchaŋana so.

⁵ Kumo be kaman nɛ ewura Josaya shin nɛ b chɔɔ agbirwuraana na be awibi ashi ebɔrɛsure nɛ b daa shuŋ agbir na so. Nɛ kumo be loŋ shin nɛ Juda be efuli so ebi nɛ Jerusalɛm to ebi lar kagbirshuŋ be eyurpi to.

⁶ E daŋ wora loŋ koŋwule na nna ashi ndegboŋana nɛ ndewurbi nɛ a wɔ Manase be epeŋitɔrkpa be kaba so nɛ Efrayim nɛ Simiɔn be eyiri be nsawule so hale n ya fo Naftali be kelargato be esoso be kaba so kikɛ.

⁷ E daŋ bure ebɔrɛsure nɛ kegbirche Ashira be mpɔrduli nɛ a wɔ Israɛl be kelargato be esoso be kaba so be efuli so kikɛ nna nseŋ kɔr agbir na to nseŋ bɛa ebɔrɛsure nɛ baa chɔɔ eduwu amo so na to kpachɛrkpachɛrbi. E ka wora loŋ n loge nɛ e bɛta n yɔ Jerusalɛm.

⁸ Ewura Josaya ka ji kuwura be kafɛ kuduaburwasopo to saŋɛ so nɛ e lara asɔ lubi kikɛ ashi kasawule na so nɛ Enyɛnpe Ebɔrɛ be lambu to na, nɛ e shuŋi mbe benimuana asa fanɛ b ya shin nɛ b lɔŋɛ bɔrɛlambu na to. Benimu na e daa la Shafan nɛ e la Azaliya pibinyɛn na nɛ Gomena Maseya nɛ e shi Jerusalɛm na nɛ Jɔa nɛ e la Jɔahaz pibinyɛn nɛ e bee sibɛ gomena be asɔ a nase nwɔl to na.

⁹ Le be basa asa ere daŋ ta amansherbi nɛ Livaiebi nɛ baa keni bɔrɛlambu be mbunaana so na daŋ sɔ ashi Manase be epeŋitɔrkpa be kaba so be basa, nɛ Efrayim nɛ Israɛl be basa nɛ b ka na, nɛ bekama nɛ b wɔ Juda nɛ Bɛnjamin nɛ Jerusalɛm na, nna n ya sa bɔrɛmatapo nimuso Hilkiya.

¹⁰ Loŋ be amansherbi na nɛ b ta n sa benyɛn asa nɛ baa keni bɔrɛlambu na be kelɔnɛ be kushuŋ so na, nɛ bumo alɛ ta amo n sa

¹¹ ekapɛnta nɛ bepɔrpo na fanɛ b tɔ ajembu nɛ ndibi n lɔŋɛ ebu nɛ Juda be bewura na shin nɛ k jija na.

¹² Basa nɛ b daŋ shuŋ kushuŋ na daŋ ji kashenteŋ ga. Livai be basa ana e daa keni bumo so. Basa ana na e daa la Jahaf nɛ Obadaya nɛ b shi Mɛrari be kabuna na, nɛ Zakareya nɛ Meshulam nɛ b shi Kohaf be kabuna na. Livaiebi ko malɛ nɛ b nyi nshɛ be keboŋ ga na

¹³ e daa keni basa nɛ baa sulɔ ajembu nɛ ndibi nɛ b kɔ a pɔr na nɛ bumo nɛ baa shuŋ ashuŋ be yiri yiri na so, nɛ beko malɛ la besibɛpo nɛ beko malɛ bee keni mbunaana na so.

¹⁴ B ka lara amansherbi na ebu nɛ baa ta asɔ a wɔtɔ na to, nɛ bɔrɛmatapo Hilkiya wu Enyɛnpe Ebɔrɛ be mbra be kawɔl nɛ e ta n sa Mosis dra dra na ashi keshishɛrsawule na so na.

¹⁵ Hilkiya daŋ ta kawɔl na nna n sa Shafan nɛ e la esibɛpo ashi ewura be laŋ to na nseŋ kaŋɛ le: “N wu mbra be kawɔl ere bɔrɛlambu to nna.”

¹⁶ Ndoŋ nna nɛ Shafan ta kumo n ya sa ewura na nseŋ kaŋɛ mo le: “Yiramu, an wora kusɔ kama nɛ fo kaŋɛ anyi na kikɛ.

¹⁷ An ta amansherbi nɛ a wɔ bɔrɛlambu na to na n sa beshumpo na nɛ basa nɛ baa keni bumo so na kikɛ.”

¹⁸ Kumo be kaman nɛ e naŋ kaŋɛ le: “Bɔrɛmatapo Hilkiya e ta kawɔl ere n sa ma.” Nseŋ kraŋ kumo awɔrso n sa ewura na.

¹⁹ Ewura na ka nu kusɔ nɛ k wɔ mbra be kawɔl na to na, nɛ e kpɛa mbe epiŋi to kagbenejijaso,

²⁰ nseŋ tre Hilkiya nɛ Shafan nɛ Ahikam nɛ e la Shafan pibinyɛn na nɛ Abdɔn nɛ e la Maika pibinyɛn na n ta Asaya nɛ e la mo gbagba be kenya na m ba shɛr abar so epul na to nseŋ kaŋɛ le:

²¹ “Enyɛnpe Ebɔrɛ na be agbo beeŋ ba wɔ ma nɛ ma basa kama nɛ b kra wɔ Israɛl nɛ Juda na so ga ŋkpal an nananyɛnana ka maŋ nu n sa mo nseŋ kini kewora kusɔ nɛ kawɔl ere bee ŋini fanɛ b wora na so. Amoso men ya bishi n fin kusɔ nɛ Enyɛnpe Ebɔrɛ na bee sha fanɛ an wora.”

²² Ndoŋ nna nɛ Hilkiya nɛ basa nɛ ewura na shuŋi na yɔ anebiche nɛ baa tre Hulda nɛ e wɔ Jerusalɛm be kelargato be esoso be kaba so na kutɔ. Hulda mo kul Shallum nɛ e la Tikva pibinyɛn nsaa la Hahas mo nanabi na e daa keni bɔrɛlambu na be epiŋi so. B daŋ kaŋɛ anebi na kusɔ nɛ k wora kikɛ nna,

²³ nɛ e kaŋɛ bumo fanɛ b bɛta n yɔ ewura na kutɔ n ya kaŋɛ mo

²⁴ le be kubɔya nɛ k shi Enyɛnpe Ebɔrɛ kutɔ ere. E yɛ Ebɔrɛ yɛ: “Meeŋ gberge Juda be basa kikɛ kusoe fanɛ kananɛ b kraŋ kawɔl na to ashi Juda be ewura be anishito na.

²⁵ Ŋkpal b ka kini ma nsaa lara esarga a sa efuli pɔtɛana be agbirana so ma agbo kaa ga. Kusɔ nɛ b wora na so, ma agbo maaŋ wushi kikɛ.

²⁶ Ewura na bre, kusɔ nɛ ma Enyɛnpe Israɛl be Ebɔrɛ na kɔ nɛ ŋ kaŋɛ mo nde. Fo ere nu kusɔ nɛ b sibɛ n wɔtɔ kawɔl na to

²⁷ nseŋ chɛrga fo nfɛra m bar fo kumu kaseto ŋ kpɛa fo asɔbuuso to kagbenejijaso a shu ŋkpal ŋ ka kaŋɛ fanɛ meeŋ gberge Juda be basa kusoe so. N nu fo kabɔrɛkule,

²⁸ amoso kasogberge nɛ ŋ kɔ a ba Juda be basa so na maaŋ ba, ama fo wu kagbenewushiso nna pɔɛŋ.” Ndoŋ nna nɛ basa na ta kubɔya na m ba sa ewura Josaya.

Ewura Josaya ka kre kewora Enyɛnpe Ebɔrɛ kasonu be asheŋ

²⁹ Ndoŋ nna nɛ ewura Josaya tre Juda nɛ Jerusalɛm be bejuŋkparpo na kikɛ m ba abar so

³⁰ nɛ mo nɛ bumo nɛ bɔrɛmatapoana na nɛ Livaiebi na nɛ basa nɛ b ka na, damawuraana nɛ betirpo kikɛ, n yɔ bɔrɛlambu na to. B ka shɛr na nɛ ewura na kraŋ Ebɔrɛ be ŋkre be kawɔl nɛ b daŋ wu bɔrɛlambu na to na bumo kikɛ be anishito.

³¹ Kumo be kaman nɛ e yili shabɔrɛ na be kakpa nɛ bewura bee chena na n nase kɔnɔ n sa Enyɛnpe Ebɔrɛ na fanɛ e beeŋ bugi mbe kagbene kikɛ n wora kasonu n sa mo nseŋ bɛ mbe mbra nɛ asheŋ nɛ e yili n sa bumo na nɛ kɔnɔ naseso be ŋkre be asheŋ nɛ b sibɛ n wɔtɔ kawɔl na to na kikɛ so.

³² E daŋ shin nna nɛ Bɛnjamin be yiri to be basa nɛ bekama nɛ b daa wɔ bɔrɛlambu na to na kikɛ nase kɔnɔ fanɛ baaŋ baa bɛ kɔnɔ naseso be ŋkre na so. Amoso Juda be basa daa bɛ bumo nananyɛnana nɛ Ebɔrɛ be kɔnɔ naseso be ŋkre na so nna.

³³ Ewura Josaya daŋ mur agbir nɛ Ebɔrɛ kishi ga na nna ashi Israɛl be kasawule na so kikɛ. Mo alɛ ka daa wɔ ŋkpa to na, e daŋ shin nna nɛ basa na bee shuŋ Enyɛnpe bumo nananyɛnana be Ebɔrɛ na nna.