2 Kronikɛls 33 - EBƆRƐ BE KAWƆL

Juda be ewura Manase be asheŋ

¹ Manase daŋ ji nfɛ kuduanyɔ nna pɔɛŋ nseŋ ki Juda be ewura, nseŋ ji kuwura Jerusalɛm to nfɛ adunu nɛ anu.

² E daŋ kini kenu n sa Enyɛnpe Ebɔrɛ nna nseŋ bɛ efuliana nɛ Enyɛnpe Ebɔrɛ ju kasawule na so, saŋɛ so nɛ mbe basa Israɛlebi bee ba kumo so sososo na be asheŋ nɛ Ebɔrɛ kishi ga na so.

³ E daŋ lɔŋɛ nna m pɔr efuli pɔtɛana so be agbir nɛ mo tuto ewura Hɛzekaya daŋ mur na nna, nɛ ebɔrɛsure n sa Baal be kegbir na, nseŋ yuu kegbirche Ashira be mpɔrduli, nsaa shuŋ achɛkpabi gba.

⁴ E daŋ pɔr agbir be ebɔrɛsure ashi bɔrɛlambu, nɛ Enyɛnpe Ebɔrɛ kaŋɛ fanɛ ndoŋ nɛ baaŋ ba shuŋ mo mbaanaayɔ na, to nna.

⁵ E daŋ pɔr ebɔrɛsure bɔrɛlambu na be alɔnɛ anyɔ na so nna a shuŋ achɛkpabi.

⁶ E daŋ ta mbe mbia nna n lara sarga chɔɔso ashi ketaŋɛ nɛ baa tre Hinnɔm na to. E daa wora kegbaya nɛ ŋkilgisheŋ nna nsaa yɔ belejipo kutɔ n ya ka kpal nsaa shuŋ bubuni gba a ti so. E daŋ wora alubi damta nna ŋ gbiti Enyɛnpe Ebɔrɛ n shin nɛ mbe agbo kaa ga.

⁷ E daŋ ta kegbir be kapɔrduli nna n yili bɔrɛlambu nɛ Ebɔrɛ kaŋɛ kumo be asheŋ le n sa ewura Deevid nɛ mo pibinyɛn ewura Sɔlɔmɔn na to. E yɛ: “Bɔrɛlambu ere to ashi Jerusalɛm nɛ n lara ashi Israɛl be efuli so kikɛ fanɛ b baa bunyaŋ ma kumo to mbaanaayɔ.

⁸ Nɛ ma basa Israɛlebi beeŋ bɛ ma mbra nɛ ma keŋini nɛ ma kayɛrbi Mosis ta n sa bumo dra dra na so bre, kumo ere maaŋ shin nɛ b ju bumo ashi kasawule nɛ n ta n sa bumo nananyɛnana na so.”

⁹ Ewura Manase daŋ shin nna nɛ Juda nɛ Jerusalɛm be basa wora alubi a chɔ amo nɛ efuliana nɛ Enyɛnpe Ebɔrɛ ju kasawule na so saŋɛ so nɛ mbe basa daa ba kumo so sososo na wora na.

¹⁰ Kashenteŋ nna fanɛ Enyɛnpe Ebɔrɛ na daŋ kpele ewura Manase nɛ mbe basa kusoe a laŋɛ bumo be alubi be kaplɛa so ama b daa maŋ nu n sa mo.

¹¹ Amoso Enyɛnpe Ebɔrɛ na daŋ shin nna nɛ Asiriya be benapo be benimuana ya kɔ n sɔ Juda be efuli na, nseŋ pɛ ewura Manase n ta kekɔltobi ŋ kɔl mbe kamuna to nseŋ ta ŋgbɛlɛbi ŋ kre mo n ta mo n yɔ Babilɔn.

¹² Ewura Manase ka wɔ kabuti to ashi Babilɔn na nɛ e bar mbe kumu kaseto n sa Enyɛnpe mbe Ebɔrɛ na nseŋ kule mo fanɛ e chɛ mo to.

¹³ Nɛ ewura Manase be asheŋ pɛ Ebɔrɛ kuwɔr nɛ e nu mbe kekule nseŋ shin nɛ e bɛta n yɔ Jerusalɛm n ya kaa ji mbe kuwura. Ndoŋ nɛ ewura Manase pin fanɛ Enyɛnpe na e la Ebɔrɛ.

¹⁴ Kede be kaman nɛ ewura Manase lɔŋɛ m pɔr ewura Deevid be kade be egbal nyɔsopo na n shin nɛ k dii n ti so. E daŋ fara kebuye nɛ k dese m mata Gihɔn be kaba so na nna m pɔr kumo n ya fo kelargato be esoso be kaba so be kabuna nɛ baa tre Kɔrɔtɔ be Kabuna na be kaba so a mata kade na be kaba nɛ baa tre Kebeegboŋ Ɔfɛl na. Mo alɛ daŋ naŋ shin nna nɛ benapo be benimu nɛ bumo be benapo chena Juda be nde nɛ b pɔr egbal ŋ kulti na be kekama to.

¹⁵ E daŋ lara efuli pɔtɛana so be agbirana nɛ kegbir be kapɔrduli nɛ e daŋ ta n yili bɔrɛsure na ase na nna ashi bɔrɛlambu na to. Nseŋ lara agbir be ebɔrɛsureana nɛ e pɔr n yili kebee nɛ b pɔr bɔrɛlambu na n yili so na nɛ Jerusalɛm be kade to kikɛ, n ta amo kikɛ n lar kade na be ekarso n ya lɛ.

¹⁶ E daŋ naŋ lɔŋɛ bɔrɛsure nɛ baa lara kɔnɔkoŋwuleso nɛ kechɔrɔ be esarga kumo so na nna n sa Enyɛnpe Ebɔrɛ, nseŋ kaŋɛ Juda be basa kikɛ fanɛ b baa shuŋ Enyɛnpe nɛ Ebɔrɛ na.

¹⁷ Nɛ basa na bɛ kusɔ nɛ ewura Manase kaŋɛ na so, ama b daŋ ya ka shuŋ Enyɛnpe Ebɔrɛ na nna ashi kakpa nɛ baa shuŋ bumo be agbirana na.

¹⁸ Kusɔ kama nɛ ewura Manase daŋ wora na, nɛ mbe kabɔrɛkule, nɛ abɔya kama nɛ Enyɛnpe Israɛl be Ebɔrɛ na daŋ bɔla anebiana so n sa mo na kikɛ be asheŋ wɔ Israɛl be bewura be adrasheŋ be nwɔl na to.

¹⁹ Ewura Manase be kabɔrɛkule nɛ kananɛ Ebɔrɛ nu mbe kekule, nɛ alubi nɛ e wora kikɛ pɔɛŋ nseŋ chɛrga, nɛ nnyamase be agbirana nɛ e shuŋ nɛ mboŋ nɛ e pɔr kegbirche Ashira nɛ agbirana be mpɔrduli, nɛ asheŋ nɛ e wora kikɛ be asheŋ wɔ anebiana be adrasheŋ be nwɔl to.

²⁰ Manase ka wu, ewura be laŋ to nɛ b daŋ puli mo, nɛ mo pibinyɛn Ammɔn sɔ mo so n ji kuwura.

Juda be ewura Ammɔn be asheŋ

²¹ Ammɔn daa la nfɛ adunyɔ nɛ anyɔ nna pɔɛŋ nseŋ ki Juda be ewura, mo alɛ nseŋ ji kuwura Jerusalɛm to nfɛ anyɔ.

²² E daŋ wora alubi nna ŋ gbiti Enyɛnpe Ebɔrɛ fanɛ kananɛ mo tuto ewura Manase daŋ wora na gbagba. Agbir nɛ mo tuto daŋ shuŋ na, amo nɛ mo alɛ gba daŋ shuŋ.

²³ Ammɔn bre daa maŋ chɛrga mbe nfɛra m bar mbe kumu ase n sa Enyɛnpe Ebɔrɛ fanɛ kananɛ mo tuto daŋ wora na. Mo ere be kulubi gba daa chɔ mo tuto peya ga.

²⁴ Ewura Ammɔn be benapo be benimuana daŋ we n wɔtɔ abar nna n ya mɔ mo ashi ewura be laŋ to.

²⁵ Ndoŋ nna nɛ Juda be basa mɔ basa nɛ b mɔ ewura Ammɔn na nseŋ ta mo pibinyɛn Josaya ŋ ki ewura.