2 Kronikɛls 32 - EBƆRƐ BE KAWƆL

Asiriyaebi ka kre k kɔ Jerusalɛm be asheŋ

¹ Ewura Hɛzekaya ka wora kasonu n sa Enyɛnpe Ebɔrɛ n wora asheŋ ere kikɛ na be kaman nɛ Asiriya be ewurgboŋ Sennakerɛb ba kɔ Juda be efuli kena. Mbe benapo daŋ kulti Juda be nde nɛ b pɔr egbal ŋ kulti na nna n wɔtɔ, ŋ kaŋɛ fanɛ b bure nde na be egbalana na n luri.

² Hɛzekaya ka wu fanɛ ewura Sennakerɛb bee shin nɛ e kɔ Jerusalɛm gba kena,

^3-4 nɛ mo nɛ mbe benimuana yili kumo fanɛ baaŋ ti bumo be nchu nɛ a bee shile a yɔ kade na be ekarso na saŋɛ na so Asiriyaebi na kaŋ fo Jerusalɛm nɛ b ba kɔ bumo kena, b maaŋ nya nchu. Ndoŋ nna nɛ benimuana na juŋkpar basa damta nɛ b ya ti abuyeana na kikɛ nɛ a maŋ naa bul nchu.

⁵ Ewura Hɛzekaya daŋ shin nna nɛ b naŋ lɔŋɛ m pɔr kade na be egbal na nseŋ pɔr atempreŋ jeŋgreŋ n yili kumo so nseŋ naŋ pɔr egbal nyɔsopo kedra na be kaman. Ade kikɛ be kaman nɛ e shin nɛ b sulɔ asɔ n ti kemaŋ nɛ k wɔ Jerusalɛm be epeŋilarkpa be kaba so na nseŋ pɔr egbal n yili ndoŋ. E daŋ shin nna nɛ b lɔŋɛ ekpa nɛ abɛlso be asɔkuŋso damta gba.

⁶ Kumo be kaman nɛ e lara benapo be benimu nɛ baa keni basa na kikɛ so n shin nɛ bumo kikɛ shɛr kade na be kabunagboŋ na be kelɔnɛ so nɛ e kaŋɛ bumo le:

⁷ “Men ba kɔ eleŋ nsaa leŋ men be amu to. Men saa maa ŋana Asiriya be ewurgboŋ na nɛ mbe benapo nɛ e bee juŋkpar na. Eleŋ nɛ k wɔ anyi be kaba so na chɔ bumo peya na.

⁸ Dimɛdi be eleŋ nɛ mo ere kɔ, ama anyi ere kɔ Enyɛnpe anyi be Ebɔrɛ na nna nɛ e bee kɔ anyi be ana a sa anyi. Ndoŋ nna nɛ basa na nya keleŋto ŋkpal kusɔ nɛ ewura kaŋɛ na so.”

⁹ Jemanɛ nɛ ewura Sennakerɛb nɛ mbe benapo kraa wɔ Lakish na nɛ e ta le be kubɔya ere n sa ewura Hɛzekaya nɛ Juda be basa nɛ b wɔ Jerusalɛm to na:

¹⁰ “Ma Sennakerɛb nɛ n la Asiriya be ewurgboŋ na e naa bishi menyi kusɔ nɛ k ba nɛ men nya kagbene a wɔ Jerusalɛm to saŋɛ so nɛ benapo kulti menyi n wɔtɔ ere.

¹¹ Men be ewura Hɛzekaya bee kaŋɛ menyi fanɛ Enyɛnpe men be Ebɔrɛ na beeŋ mɔlga menyi ashi anyi be enɔ to, ama e bee fule menyi nna nɛ akoŋ nɛ achukoŋ e mɔ menyi.

¹² Mannɛ mo e daŋ bure agbir nɛ ebɔrɛsure na nseŋ kaŋɛ Juda nɛ Jerusalɛm be basa fanɛ b baa chɔɔ duwu ashi bɔrɛsure koŋwule so na a?

¹³ Men maŋ nyi kusɔ nɛ ma nɛ n nananyɛnana daŋ wora efuli pɔtɛ so ebi na a? Efuli pɔtɛ so be agbirana na be kumo a tiŋ m mɔlga bumo be basa ashi Asiriya be ewurgboŋ na be enɔ to?

¹⁴ Saŋɛ mo nɛ efuliana be agbirana daŋ mɔlga amo be basa ashi anyi be enɔ to? Amoso manɛ bre so nɛ menyee fɛ fanɛ menyi be Ebɔrɛ na beeŋ tiŋ m mɔlga menyi ashi ma enɔ to ere?

¹⁵ Men sa maŋ shin nɛ ewura Hɛzekaya e fule menyi nseŋ shin nɛ men foe akpa. Men sa maŋ yirda mo! Efuliana ere be kekama be kegbir maŋ naŋ tiŋ m mɔlga kumo be efuli be basa ashi Asiriya be ewurgboŋ na be enɔ to. Amoso menyi be Ebɔrɛ ere gba maaŋ tiŋ m mɔlga menyi!”

¹⁶ Asiriya be benimuana na gba daŋ malga asheŋ lubi dama ŋ gbiti Enyɛnpe Ebɔrɛ na nɛ mbe kayɛrbi Hɛzekaya.

¹⁷ Kede be kaman nɛ Asiriya be ewura sibɛ kawɔl a fɛl Enyɛnpe nɛ e la Israɛl be Ebɔrɛ na a kaŋɛ le: “Efuli pɔtɛana so be agbirana na gba maŋ tiŋ m mɔlga bumo ashi ma enɔ to, loŋ koŋwule na nɛ ewura Hɛzekaya gba be Ebɔrɛ na maaŋ tiŋ m mɔlga mbe basa ashi ma enɔ to.”

¹⁸ Asiriya be benimuana na daa ponte Hibruw be ŋgbar to nna a kaŋɛ kusɔ nɛ kawɔl na bee kaŋɛ na saŋɛ na so kufu beeŋ pɛ Jerusalɛm be basa nɛ b wɔ kade na be egbal na so na nɛ b pɔ aba nɛ b kɔ m pɔɔ bumo so.

¹⁹ Kananɛ b daŋ baa malga Jerusalɛm be Ebɔrɛ na be asheŋ du nna fanɛ kananɛ b daa malga basa pɔtɛana be agbir nɛ b ta bumo be enɔana n lɔŋɛ na be asheŋ na.

²⁰ Ndoŋ nna nɛ ewura Hɛzekaya nɛ Amɔz pibinyɛn, anebi Aizaaya kule Ebɔrɛ n shu n fin kechɛto mo kutɔ.

²¹ Nɛ Enyɛnpe Ebɔrɛ shuŋi malaika nɛ e ya mɔ Asiriya be benapo na nɛ bumo be benapo be benimuana na kikɛ. Nɛ ewurgboŋ na ta anishinyɔr m bɛta n yɔ epe. Kachako e ka wɔ mbe kegbir be lambu to nɛ mbe mbinyɛnsobi ko ta bumo be etokobi m ba mɔ mo.

²² Kananɛ Enyɛnpe Ebɔrɛ na mɔlga ewura Hɛzekaya nɛ Jerusalɛm be basa ashi Asiriya be ewurgboŋ Sennakerɛb nɛ bumo doŋana nɛ b ka na be enɔ to nna na. Kumo be kaman nɛ e shin nɛ kayurwushi ba bumo nɛ efuliana nɛ b chena m mata bumo na kikɛ to.

²³ Basa damta daŋ shi Jerusalɛm nna n ta bumo be esarga m ba sa Enyɛnpe Ebɔrɛ na nseŋ ta ŋkɛ malɛ m ba sa ewura Hɛzekaya. Yili loŋ be saŋɛ na efuliana kikɛ daa sa ewura Hɛzekaya bunyaŋ nna.

Ewura Hɛzekaya be kulɔ nɛ mbe kamoowu be asheŋ

²⁴ Jemanɛ ko ka ba fo nɛ kulɔ pɛ ewura Hɛzekaya nɛ e bee sha nɛ e wu. Ndoŋ nna nɛ e kule Ebɔrɛ nɛ Enyɛnpe Ebɔrɛ sa mo tɔɔnɛ fanɛ e beeŋ nya alenfia.

²⁵ Ama ewura Hɛzekaya daa wu mbe kumu na ga nseŋ kini keta kechɔrɔ n sa Enyɛnpe Ebɔrɛ a laŋɛ kusɔ nɛ e wora n sa mo na so. Ŋkpal loŋ so nɛ Enyɛnpe Ebɔrɛ na nya agbo nsaa shin nɛ e gberge ewura Hɛzekaya nɛ Juda nɛ Jerusalɛm be basa kusoe.

²⁶ Ade kikɛ be kaman nɛ ewura Hɛzekaya nɛ Jerusalɛm be basa na bar bumo be amu kaseto nseŋ kule Ebɔrɛ alubi be ketampaŋ nɛ Enyɛnpe Ebɔrɛ ta m paŋ bumo nseŋ maŋ naŋ gberge bumo kusoe n ya fo saŋɛ so nɛ Hɛzekaya wu pɔɛŋ.

Ewura Hɛzekaya be kedamaya nɛ mbe kela be asheŋ

²⁷ Ewura Hɛzekaya daŋ dii dama nna ga nɛ ekama daa sa mo bunyaŋ. E daŋ shin nna nɛ b pɔr asɔ be ebuana nɛ baa ta mbe shuwa nɛ gbiti nɛ yawukpakpaso be ajembu nɛ efɛa belbelso be asɔ nɛ abɛlso be asɔkuŋso nɛ asɔ lela kikɛ a wɔtɔ ndoŋ.

²⁸ Ade be kaman e daa kɔ asɔ be ebuana nɛ e bee ta mbe ayu nɛ asɔnuuso nɛ ɔlif be ŋku a wɔtɔ nsaa kɔ ana nɛ mbolpɔ be aluu be yiriyiri.

²⁹ Ebɔrɛ daŋ shin nna nɛ ewura Hɛzekaya dii dama ga n tɔ mbolpɔ nɛ mboe nɛ ana n ti so nseŋ pɔr nde damta.

³⁰ Ewura Hɛzekaya e daŋ wora nchu be kubɔr nɛ nchu bee shi Gihɔn be kebuye to a bɔla to a yɔ Jerusalɛm be kade to na. Ewura Hɛzekaya daŋ ji kɔŋkɔŋ kusɔ kama nɛ e bee wora to nna.

³¹ Babilɔn be bejuŋkparpoana ka shuŋi mbɔ fanɛ b ya bishi ewura Hɛzekaya etɔɔnɛsheŋ nɛ Ebɔrɛ sa mo na, Ebɔrɛ daŋ wora mo nna ŋ keni e bee ji kashenteŋ a sa mo nseŋ shin nɛ ewura Hɛzekaya sa bumo mo gbagba atuwebi.

Ewura Hɛzekaya be kuwura be lalaloge be asheŋ

³² B daŋ sibɛ kusɔ kama nɛ ewura Hɛzekaya daŋ wora nɛ kananɛ e ji kashenteŋ n sa Enyɛnpe Ebɔrɛ na nna n wɔtɔ Amɔz pibinyɛn Aizaaya be kewuŋkaŋɛ be nwɔl nɛ Juda nɛ Israɛl be bewura be adrasheŋ be nwɔl to.

³³ Ewura Hɛzekaya ka wu, kakpa nɛ baa puli bewura nɛ b kɔ bunyaŋ ga na nɛ b ya puli mo. Juda nɛ Jerusalɛm be basa kikɛ daŋ sa mbe keeliwora kemaŋkura ga. Mo pibinyɛn Manase e daŋ sɔ mo so n ji kuwura.