2 Kronikɛls 31 - EBƆRƐ BE KAWƆL

Hɛzekaya ka naŋ lɔŋɛ kabɔrɛshuŋ n yili to be asheŋ

¹ Kejigboŋ na ka loge, nɛ Israɛlebi na yɔ Juda be efuli so be kade kikɛ to, n ya bure ndoŋ be ajembu be eshabɔrɛ nɛ kegbirche Ashira be mpɔrduli be ndibi n lɛ nseŋ mur ndoŋ be ebɔrɛsure nɛ kakpa nɛ nnyamase bee shuŋ bumo be agbirana na kikɛ. B daŋ wora loŋ nna ashi Juda be efuli so kikɛ nɛ Bɛnjamin nɛ Efrayim nɛ Manase be kaba so kikɛ. Kumo be kaman nɛ b bɛta n yɔ epe.

² Ewura Hɛzekaya daŋ naŋ lɔŋɛ nna n yili bɔrɛmatapoana nɛ Livaiebi na be ntuŋ nɛ ashuŋ nɛ baa shuŋ. Ashuŋ na be ako e la kebaalara esarga chɔɔso nɛ kɔnɔkoŋwule be esarga nɛ kebaabunyaŋ Ebɔrɛ nɛ kebaadi Ebɔrɛ epaŋ nsaa juŋkpar kabɔrɛchɔrɔ ashi bɔrɛlambu na to.

³ Ewura na daa lara mo gbagba be mbolpɔ nɛ ana nna a sa nɛ baa lara sarga chɔɔso kachipurso nɛ kaaseso kikɛ, nɛ kewushiachɛ be sarga nɛ kufɔl popɔr be kejigboŋ nɛ kabɔrɛshuŋ kikɛ be kejigboŋ be esarga nɛ Enyɛnpe Ebɔrɛ be mbra ŋini fanɛ b baa lara na.

⁴ E daŋ kaŋɛ Jerusalɛm be basa nna fanɛ b baa ta esarga nɛ baa lara a sa bɔrɛmatapoana nɛ Livaiebi na n sa bumo, saŋɛ na so baaŋ nya saŋɛ nɛnɛ a shuŋ Enyɛnpe Ebɔrɛ be kushuŋ na.

⁵ Israɛlebi na ka baŋ nu loŋ, epul to nɛ b ta ayu nɛ asɔnuuso nɛ ɔlif be ŋku nɛ mushoŋ nɛ sososo be adɔjibiana be ŋkɛana nɛ bumo be kudukudusopo m ba.

⁶ Basa nɛ b daa wɔ Juda be nde nɛ a ka na to gba daŋ ta bumo be ana nɛ mbolpɔ be kudukudusopo nɛ ŋkɛ damta ko nna m ba sa Enyɛnpe bumo be Ebɔrɛ na.

⁷ Kafɛ to be kufɔl sasopo na to nɛ basa na fara a bar bumo be ŋkɛana nseŋ kɛ le hale afɔl ana kikɛ nɛ baa koli bumo be ŋkɛ abar so.

⁸ Ewura Hɛzekaya nɛ mbe benimuana ka wu kananɛ basa na sa na, nɛ b di Enyɛnpe Ebɔrɛ epaŋ nseŋ chɔrɔ Israɛlebi gba.

⁹ Ndoŋ nna nɛ ewura na bishi bɔrɛmatapoana na nɛ Livaiebi na ŋkɛ na be asheŋ

¹⁰ nɛ bɔrɛmatapo nimuso Azariya nɛ e la Zadɔk be kaman to ebi be esa na kaŋɛ mo le: “Baŋ yili saŋɛ so nɛ basa na fara a bar bumo be ŋkɛ bɔrɛlambu to na, an bee nya ajibi nna a ji yɛlyɛla so. An daa nya amo kikɛ nna ŋkpal Enyɛnpe Ebɔrɛ na ka nɛfa mbe basa so. Keni amo be amo nɛ a ka.”

¹¹ Nɛ ewura na shin nɛ b pɔr ebuana nɛ baaŋ ba ta asɔ a yili to ashi bɔrɛlambu na be kelɔnɛ na be ekarso,

¹² nsaa ta ŋkɛ na nɛ kudukudusopo na n yili ndoŋ, saŋɛ na so shɛŋ shɛŋ maaŋ tiŋ n ta amo. B daŋ ta Livainyɛn nɛ baa tre Konaniya na nna fanɛ e baa keni amo so nseŋ ta mo sipo Shimei malɛ m bɛ mo so.

¹³ Ewura Hɛzekaya nɛ bɔrɛmatapo nimuso Azariya daŋ lara Livaiebi kudu malɛ nna fanɛ b baa chɛ bumo to a shuŋ. Bumo e la Jehiɛl nɛ Azariya nɛ Nahaf nɛ Asahɛl nɛ Jerimɔf nɛ Jozabad nɛ Elliɛl nɛ Ismakaya nɛ Mahaf nɛ Bɛnaya.

¹⁴ Imna pibinyɛn Kɔr nɛ e la Livai be esa nsaa keni bɔrɛlambu na be epeŋilarkpa be kaba so be kabuna na so na e daa sɔ ŋkɛ nɛ baa bar Enyɛnpe Ebɔrɛ na nsaa barga amo to a sa Livaiebi na nɛ bɔrɛmatapoana na.

¹⁵ Nde kama nɛ bɔrɛmatapoana daa wɔ na, Livaiebi ko e daŋ bugi ŋgbene a chɛ mo to. Bumo e la, Edɛn nɛ Miniamin nɛ Joshuwa nɛ Shemaya nɛ Amariya nɛ Shekanaya. B daa yili kananɛ bumo braana Livaiebi be kushuŋ du so nna a chige ajibi na to dede a sa bumo.

¹⁶ B daa maa chige amo mbuna mbuna so. B daa yili ekama be kare chɛ kikɛ be kushuŋ nɛ e bee shuŋ bɔrɛlambu na to so nna a chige amo a sa bumo be benyɛn nɛ b fo nfɛ adesa m baŋ so na.

¹⁷ Mbuna mbuna so nɛ b daŋ yili m barga kushuŋ na to n sa bɔrɛmatapoana na, ama Livaiebi nɛ b fo nfɛ adunyɔ m baŋ so na bre, ntuŋ ntuŋ so nɛ b daŋ yili m barga kushuŋ na to n sa bumo.

¹⁸ B daŋ sibɛ bumo nɛ bumo be beche nɛ mbia nɛ basa kama nɛ b wɔ bumo kutɔ kikɛ be atre nna nase, ŋkpal manɛ so bumo alɛ gba daga fanɛ b baa du cheembi nna nsaa beeŋ tiŋ n shuŋ loŋ be kushuŋ na saŋkikɛ.

¹⁹ Bɔrɛmatapoana nɛ b daa wɔ nde nɛ b ta n sa Ɛɛrɔn be kaman to ebi ŋko nde na be asɔbɔya be ejikpa be mboŋ na, benyɛn ko nɛ baa tiŋ a keta bumo be amu daa wɔ loŋ be nde nɛ bɔrɛmatapoana nɛ b la Ɛɛrɔn be kaman to ebi wɔ ndoŋ a chige ajibi a sa benyɛn nɛ b wɔ kebɔrɛmata be kanaŋ to na nna nɛ beko malɛ ti Livaiebi be kabuna ebi na so.

²⁰ Ewura Hɛzekaya daŋ wora kusɔ nɛ k daga nsaa par Enyɛnpe mbe Ebɔrɛ na nna ashi Juda be efuli so kikɛ.

²¹ Kusɔ kama nɛ e bee wora daa yɔ anishito nna ŋkpal bɔrɛlambu na to be kusɔ kama nɛ e wora ka daa walɛ nɛ mo alɛ naa kɔ kasonu n sa Enyɛnpe Ebɔrɛ be mbra na so.