2 Kronikɛls 3 - EBƆRƐ BE KAWƆL

¹ Ewura Deevid nɛ e la Sɔlɔmɔn mo tuto na daŋ lɔŋɛ bɔrɛlambu na be kakpa nna ashi Jerusalɛm be kebeegboŋ nɛ baa tre Moriya na so. Ndoŋ nɛ Enyɛnpe Ebɔrɛ daŋ lara mbe kumu ŋ ŋini mo ashi kugooro nɛ Aruna nɛ e la Jerusalɛm be esa na daa bri mbe ayu so na.

² Ewura Sɔlɔmɔn malɛ e fara bɔrɛlambu na be kepɔr saŋɛ nɛ e ji kuwura na be kafɛ nasopo be kufɔl nyɔsopo na be kachɛ nyɔsopo na.

³ Bɔrɛlambu nɛ Ewura Sɔlɔmɔn pɔr na be nteŋ daa la ayadra adekpanu nna nɛ kumo be mpar malɛ daa la ayadra adesa.

⁴ Bɔrɛlambu na be anishito daa kɔ kedɛdɛ nɛ baa bɔla to a luri kumo to nna, nɛ kedɛdɛ na be mpar la ayadra adesa nɛ kumo be jeŋgreŋ malɛ la ayadra adesa. B daŋ ta shuwa nna m mata kedɛdɛ na be epunto be egbal kikɛ so.

⁵ B daŋ ta sida be ndibi nna m mata ebugboŋ na be egbal so ŋ kulti n ta shuwa lela m mata m mata amo so nseŋ wora abii be ndibi nɛ ŋgbɛlɛbi be efoto n deŋi amo so.

⁶ Ewura na daŋ ta ajembu nɛ amo be yawu du kpakpa nna nɛ shuwa nɛ b tɔ ashi Parvaim be kasawule so na nna n ji bɔrɛlambu na kebita.

⁷ E daŋ ta shuwa na nna m mata m mata bɔrɛlambu na be egbal so nɛ kumo be eyɔri so nɛ kabuna to nɛ kumo be akuloŋ so. Beshumpo na malɛ daŋ wora asɔ anyɔ ko nɛ a du fanɛ emalaika nɛ baa tre amo chɛrubim be ndulgi nna n deŋi egbal na so.

⁸ Ebu nɛ baa tre acheembiana to be kakpa cheembi na be nteŋ daa la ayadra adesa nna nɛ kumo be mparto malɛ gba daa la ayadra adesa. Shuwa nɛ amo be egbɛ sa fanɛ kilo ŋgboŋ adunyɔ nɛ anu nɛ b daŋ ta m mata m mata acheembiana to be kakpa cheembi na be egbalana so.

⁹ Shuwa nɛ amo be egbɛ sa fanɛ kilo be bargato nɛ b ta n lɔŋɛ kumo be anyembi nseŋ ta shuwa m mata m mata kumo be esoso be ebuana na be egbalana so.

¹⁰ Ewura Sɔlɔmɔn daŋ kaŋɛ mbe beshumpo nna fanɛ b ta kebɛlso n lɔŋɛ emalaika anyɔ be mpɔrduli nseŋ ta shuwa m mata m mata amo so n ta amo n yili acheembiana to be kakpa cheembi na to

^11-13 nɛ b yili ŋ karga abar so, nɛ bumo be anishito e baa keni kabuna to be kaba so. Amo be kekama daa kɔ aba anyɔ nyɔ nna nɛ aba na be kekama be nteŋ daa sa fanɛ ayadra ashunu nɛ bargato. Amo be kekama parga aba to nna nɛ keba ko bee chute ebu na be kaba ko be egbal nɛ kuko malɛ bee chute kumo barkasa be keba ashi ebu nɛ kumo be nteŋ la ayadra adesa na be nferinto.

¹⁴ Ago be kechɛbi nɛ achɛbi ko nɛ b nyɔ amo buru nɛ apeper kpaw nɛ apeper kunɔkunɔ nɛ b jɔ emalaika be ndulgi n deŋi so na nɛ b ta n lɔŋɛ patisa ŋ kuŋ acheembiana be kakpa cheembi na be kabuna to.

Danyaŋ be eshabɔrɛ anyɔ na be asheŋ

¹⁵ Ewura Sɔlɔmɔn daŋ shin nna nɛ b yuu eshabɔrɛ anyɔ ashi bɔrɛlambu na be anishito nna nɛ amo be kekama be nteŋ daa sa fanɛ ayadra adunu nɛ anyɔ. Amo be kekama malɛ daa kɔ kuwuro nɛ kumo be nteŋ la ayadra ashunu nɛ bargato nna.

¹⁶ B daŋ wora ŋgbɛlɛbi nɛ a mɛa abar be ndulgi nɛ asɔ kulkulbi ko nɛ a du fanɛ asɔrso nɛ baa tre pomegranates na be kalfa kalfa nna n deŋi n deŋi eshabɔrɛ na be kekama be esoso n ji amo kebita.

¹⁷ B daŋ yuu eshabɔrɛ na be kuko bɔrɛlambu na be kelargato be kaseto be kaba so nɛ baa tre kumo Jakin na nna, nseŋ yuu kuko malɛ kumo be kelargato be esoso be kaba so nɛ baa tre kumo alɛ Boaz.