2 Kronikɛls 28 - EBƆRƐ BE KAWƆL

Juda be ewura Ahaz be asheŋ

¹ Nfɛ adunyɔ nɛ Ahaz daŋ ji pɔɛŋ nseŋ ki ewura, mo alɛ daŋ ji kuwura Jerusalɛm to nfɛ kuduashe nna. E daa maŋ bɛ kebaawɔtɔ lela nɛ mo nananyɛn ewura Deevid daa kɔ na so n wora kusɔ nɛ k bee par Enyɛnpe Ebɔrɛ na.

² E daŋ bɛ Israɛl be bewura be kebaawɔtɔ lubi so nna. E daŋ ta abɛlso nna n lɔŋɛ Baal be kegbir na be mpɔrduli.

³ E daa chɔɔ duwu ashi kepla nɛ baa tre Hinnɔm na so nna hale n ta mo gbagba be mbinyɛnsobi n lara sarga chɔɔso n sa agbir. Mo alɛ daa kute basa nɛ b daa wɔ Israɛl be efuli so nɛ Enyɛnpe Ebɔrɛ ju bumo saŋɛ so nɛ Israɛlebi daŋ ba kasawule na so sososo na be asheŋ woraso lubi nɛ Ebɔrɛ kishi ga na to nna.

⁴ Ewura Ahaz daa lara mbe esarga nsaa chɔɔ duwu, ashi nnyamase be mboŋ nɛ baa shuŋ bumo be agbir nɛ abee so nɛ ndibi be afito nna.

Siriya nɛ Israɛl be kena be asheŋ

^5-6 Ŋkpal ewura Ahaz ka wora kulubi nɛ Juda be basa malɛ kini Enyɛnpe bumo nananyɛnana be Ebɔrɛ na so, Ebɔrɛ shin nna nɛ Siriya be ewura kɔ m pɔɔ mo so nseŋ pɛ Judaebi be basa damta n yɔ kabuti to ashi Damaskɔs. Enyɛnpe Ebɔrɛ na daŋ naŋ shin nna nɛ Israɛl be ewura Pɛka nɛ e la Remaliya pibinyɛn na kɔ m pɔɔ ewura Ahaz so nseŋ mɔ Juda be benapo nɛ b kɔ kenyɛn ga na be ŋgboŋ kalfa nɛ adunyɔ kachɛ koŋwule be epeŋi to.

⁷ Loŋ be kena na to, nɛ Israɛl be enapo ko nɛ baa tre Zikri na mɔ benyɛn asa nɛ b kɔ eyilikpagboŋ ashi Juda be efuli so na. Bumo e la Mɛseya nɛ e la ewura na pibinyɛn nɛ Azrikam nɛ e bee keni ewura be laŋ so na nɛ Ɛlkana nɛ e la enimu a bɛ ewura na so na.

⁸ Kashenteŋ nna fanɛ Judaebi na nɛ Israɛlebi daa la bekurgepoana gbagba nna, ama Israɛlebi be benapo na daŋ pɛ Judaebi na be beche nɛ mbia ŋgboŋ alfa anyɔ nna nseŋ muu asɔ damta kena na to m bɛta n yɔ Samɛria.

Anebi Odɛd be asheŋ

⁹ Kede be kaman nɛ kanyɛn ko nɛ baa tre Odɛd nɛ e la Enyɛnpe Ebɔrɛ be anebi a wɔ Samɛria be kade to na lar n ya shɛr Israɛlebi be benapo nɛ b keta Juda b basa nɛ b pɛ kena to a ba Samɛria na to, saŋɛ so nɛ b daa shin nɛ b luri kade to na, nseŋ kaŋɛ bumo le: “Enyɛnpe men nananyɛnana be Ebɔrɛ na daŋ nya agbo nna n wɔtɔ Juda nseŋ shin nɛ men kɔ m pɔɔ bumo so, ama mo alɛ naŋ wu kananɛ men maŋ wu bumo kuwɔr nseŋ mɔ bumo alegaiso.

¹⁰ Naniere menyeeŋ sha keta Juda nɛ Jerusalɛm be benyɛn nɛ beche nna ŋ ki men be anya na. Menyi maŋ nyi fanɛ nɛ men wora loŋ menyi alɛ gba wora alubi ŋ gbiti Enyɛnpe men be Ebɔrɛ na nna ere a?

¹¹ Men nu nfe! Basa nɛ men pɛ ere la men siponyɛn nɛ men sipocheana nna, amoso men shin nɛ b bɛta a yɔ epe, nɛ mannɛ aloŋ, Enyɛnpe na b agbo beeŋ kaa, nɛ e gberge menyi kusoe.”

¹² Loŋ be saŋɛ na gbagba nɛ Azariya nɛ e la Jehohanan pibinyɛn na nɛ Bɛrekaya nɛ mo alɛ la Mɛshillemɔf pibinyɛn na nɛ Jehizkia nɛ e la Shallɔm pibinyɛn na nɛ Amasa nɛ mo alɛ la Hadlai pibinyɛn nɛ b la Israɛl be benimu ana na gba ba kaŋɛ fanɛ Israɛl be benapo na maŋ wora n nyalɛ.

¹³ B yɛ: “Men sa maŋ ta basa nɛ men pɛ kena to na m ba nfe! An tiŋ n wora alubi ŋ gbiti Enyɛnpe Ebɔrɛ na nseŋ wɔtɔ mo agbo to n daga mbe kasogberge. Naniere, menyee shin nɛ men wora kusɔ nɛ k beeŋ shin nɛ anyi be kulubi na e wora alegai nna na.”

¹⁴ Ndoŋ nna nɛ benapo na ta basa nɛ b pɛ na nɛ asɔ nɛ b muu kena to na n sa bumo be benimuana na ashi jimaŋ na be anishito,

¹⁵ nɛ benimuana na lara epiŋi ashi asɔ nɛ b muu na to n sa basa nɛ b pɛ kena to na b bumo nɛ b maŋ kɔ asɔbuuso na. Kumo be kaman nɛ b sa bumo kikɛ epiŋi nɛ asɛbta nɛ ajibi nɛ nchu nseŋ wora ɔlif be ŋku a wɔtɔ bumo be achuuana to. Kede be kaman nɛ b ta bumo bekama nɛ b maŋ kɔ eleŋ na n chena ekurma so nseŋ keta bumo n yɔ Jɛriko be kade nɛ baa tre abii be ndibi be kade na to. Kumo be kaman nɛ Israɛlebi na bɛta n yɔ bumo pe Samɛria.

^16-18 K maŋ chɛr ko nɛ Edɔmebi naŋ ya kɔ Judaebi kena nseŋ pɛ bumo be basa damta. Loŋ be saŋɛ na gbagba nɛ Filistiebi na ta kena n ya purgi epeŋitɔrkpa be kebeemase be nde na nɛ Juda be kelargato be kaseto be kaba so be nde. B daŋ kɔ nna n sɔ Bɛf Shimɛsh nɛ Aijalɔn nɛ Gɛdɛrɔf nɛ Soko be nde nɛ Timna nɛ Gimzo nɛ amo be ndewurbiana kikɛ nseŋ chena ndoŋ. Ndoŋ nna nɛ ewura Ahaz ya kule Tiglaf Pilesa nɛ e la Asiriya be efuli so be ewurgboŋ na fanɛ e wora bumo kechɛto.

¹⁹ Ŋkpal Juda be ewura Ahaz ka daŋ maŋ wora Enyɛnpe Ebɔrɛ na kasonu nseŋ yige mbe basa nɛ baa wora alubi so nɛ Enyɛnpe na daŋ bar le be etɔrɔ Juda be efuli so na.

²⁰ Asiriya be ewurgboŋ na ka beeŋ chɛ Ahaz to na, nɛ e naŋ kilgi a fin asheŋ a sa mo.

²¹ Amoso ewura Ahaz daŋ ta shuwa nna ashi bɔrɛlambu na to nɛ ewura be laŋ to nɛ bejuŋkparpoana na pe n ya sa Asiriya be ewura na, ama amo nɛ amo kikɛ ewura na daŋ maŋ chɛ mo to.

²² Ewura Ahaz ka luri etɔrɔ damta ere to be kaman, nɛ e naaŋ wora alubi ŋ gbiti Enyɛnpe Ebɔrɛ na ga a chɔ sososo na gba.

²³ E daŋ lara esarga nna n sa Siriyaebi nɛ b daŋ kɔ m pɔɔ mo so na be agbirana. Le nɛ e daŋ fɛ: “Siriya be agbirana na a chɛ Siriya be bewura to, amoso nɛ m baŋ lara sarga n sa amo, a beeŋ chɛ ma alɛ gba to.” Aloŋ so nɛ mo nɛ mbe efuli so ebi ji jɛrbi ga na.

²⁴ E daŋ muu bɔrɛlambu na to be asɔwurbiana nɛ b kɔ a shuŋ Ebɔrɛ na nna m bure to kpachɛrkpachɛrbi nseŋ ti kumo so. Kumo be kaman nɛ e yuu agbir be ebɔrɛsureana ashi Jerusalɛm to be kaplɛkama.

²⁵ E daŋ pɔr mboŋ nɛ baaŋ baa shuŋ agbir nɛ kakpa nɛ baaŋ baa chɔɔ duwu a sa efuli pɔtɛana so be agbir ashi ndegboŋ nɛ ndewurbi kikɛ nɛ a wɔ Juda be efuli so na nna. Kumo be loŋ e daŋ shin nɛ Enyɛnpe Ebɔrɛ nɛ e la mo nananyɛnana be Ebɔrɛ na be agbo ba mo so na.

²⁶ B daŋ sibɛ kusɔ nɛ ewura Ahaz wora saŋɛ so nɛ e ji kuwura na kikɛ be asheŋ nna n wɔtɔ Juda nɛ Israɛl be bewura be adrasheŋ be nwɔl to.

²⁷ Ewura Ahaz ka wu nɛ b puli mo Jerusalɛm to ama b daa maŋ puli mo kakpa nɛ baa puli bewura na. Mo pibinyɛn Hɛzekaya e daŋ sɔ mo so n ji kuwura.