2 Kronikɛls 27 - EBƆRƐ BE KAWƆL

Juda be ewura Jotam be asheŋ

¹ Nfɛ adunyɔ nɛ anu nɛ Jotam daŋ ji pɔɛŋ nseŋ ji kuwura ashi Jerusalɛm to nfɛ kuduashe. Mo nio e daa la Zadɔk pibiche Jerusha.

² Kananɛ mo tuto ewura Uziya daŋ wora Enyɛnpe Ebɔrɛ be aparsheŋ na, gbagba na chap nɛ mo alɛ gba daŋ wora; ama mo ere daa maŋ wora kulubi n chɔɔ duwu bɔrɛlambu to. Basa na bre daa wɔtɔ nna a wora alubi a ti so saŋkama.

³ Ewura Jotam e daŋ pɔr Kabuna nɛ k wɔ bɔrɛlambu na be kelargato be esoso be kaba so na nseŋ lɔŋɛ Jerusalɛm be egbal nɛ baa tre Ɔfɛl na nɛnɛ ga n ti so.

⁴ E daŋ pɔr ndegboŋana nna ashi Juda be abee so nseŋ pɔr kumɔlga be mboŋ lempo nɛ atempreŋ jeŋgreŋ n yili kupo to.

⁵ E daŋ ya kɔ Ammɔn be ewura nɛ mbe benapo kena nna nseŋ pɔɔ bumo so n tintiŋ Ammɔnebi na nɛ baa ka lampo a sa mo kafɛ kafɛ kikɛ hale n ya fo nfɛ asa. Asɔ nɛ b daa ka a sa mo na e la, gbiti kilo ŋgboŋ asa nɛ alfa ana nɛ ayu ebɔtɛ ŋgboŋto be kagboŋ koŋwule nɛ ayu peper malɛ ebɔtɛ ŋgboŋto gboŋto be kagboŋ koŋwule.

⁶ Ewura Jotam daŋ ji eleŋ ga ŋkpal e kaa daa ji kashenteŋ nsaa bɛ Enyɛnpe mbe Ebɔrɛ na so so.

⁷ Kusɔ kama nɛ Jotam wora saŋɛ so nɛ e daa la ewura na nɛ ana nɛ e daŋ kɔ na kikɛ be asheŋ daa wɔ Israɛl nɛ Juda be bewura be adrasheŋ be nwɔl to nna.

⁸ Nfɛ adunyɔ nɛ anu nɛ Jotam daŋ ji pɔɛŋ m ba ki ewura, nseŋ ji kuwura ashi Jerusalɛm to nfɛ kuduashe.

⁹ E ka wu, ewura Deevid be kade to Jerusalɛm nɛ b daŋ puli mo nɛ mo pibinyɛn Ahaz sɔ mo so n ji kuwura.