2 Kronikɛls 25 - EBƆRƐ BE KAWƆL

Juda be ewura Amaziya be asheŋ

¹ Amaziya ka ki ewura, nɛ e la nfɛ adunyɔ nɛ anu nna nseŋ ji kuwura Jerusalɛm to nfɛ adunyɔ nɛ akpanu. Mo nio be ketre e daa la Jehɔadin nɛ e shi Jerusalɛm na.

² Amaziya daŋ wora kusɔ nɛ k par Ebɔrɛ, ama mo alɛ daa maŋ wora kumo nɛ kagbene koŋwule.

³ Mbe kuwurji ka baŋ yili to nɛnɛ, nɛ e mɔ benimu nɛ b mɔ mo tuto ewura Jɔash na epul to.

⁴ E daa maŋ mɔ bumo be mbia bre, ŋkpal manɛ so e daŋ bɛ kusɔ nɛ Enyɛnpe Ebɔrɛ kaŋɛ ashi Mosis be mbra to na so nna. E yɛ: “B sa maŋ kaŋ mɔ ekurgepo ŋkpal kulubi nɛ bumo be mbia wora so. Loŋ koŋwule nɛ a maŋ daga b ka mɔ mbia ŋkpal kulubi nɛ bumo kurgepoana wora so. Ekama nɛ e wora kulubi, mo e daga kumo be kasogberge.”

⁵ Ewura Amaziya daŋ shuŋi nna n tre Juda nɛ Bɛnjamin be eyiriana to be benyɛn nɛ b fo nfɛ adunyɔ m baŋ so na n shin nɛ b barga to n yili mbuna mbuna so, nɛ e lara benapo be benimu nɛ baaŋ baa keni basa kagboŋ kagboŋ be ntuŋ so nɛ basa kalfa kalfa be ntuŋ so n sa bumo. Benyɛn nɛ b daŋ fo ekpa nɛ abɛlso be asɔkuŋso be keta ŋ kɔ kena na kikɛ daa la basa ŋgboŋ alfa asa nna.

⁶ E daŋ ta gbiti nɛ amo be egbɛ sa fanɛ kilo ŋgboŋ asa nɛ alfa ana nna n haya benapo ŋgboŋ kalfa ashi Israɛl be efuli so n ti bumo so.

⁷ Ama Ebɔrɛ be anebi daŋ yɔ ewura na kutɔ nna n ya kaŋɛ mo le: “Yiramu, sa maŋ shin nɛ Israɛl be benapo ere e bɛ fo so n yɔ kena to, ŋkpal manɛ so, Enyɛnpe Ebɔrɛ maŋ wɔ bekama nɛ b shi Israɛl be efuli so be kelargato be esoso be kaba so na be kaman.

⁸ Menyee fɛ nna fanɛ bumo e naŋ shin nɛ men baa kɔ eleŋ, ama Ebɔrɛ na e naa shin nɛ basa bee kɔ a pɔɔ so. Nɛ men shin nɛ b bɛ menyi so e beeŋ shin nɛ men doŋana e kɔ m pɔɔ menyi so.”

⁹ Nɛ ewura Amaziya bishi anebi na le: “Nɛ gbiti nɛ n teŋ ta n sa bumo fanɛ bumo be kakɔka na malɛ a?” Nɛ anebi na malɛ kaŋɛ le: “Enyɛnpe Ebɔrɛ na beeŋ tiŋ n sa fo kusɔ nɛ k chɔ loŋ!”

¹⁰ Ndoŋ nna nɛ ewura Amaziya shin nɛ benapo nɛ b haya na kikɛ bɛta n yɔ bumo peana. Ama pɔɛŋ nɛ b yɔ na b daŋ nya agbo nna ga n wɔtɔ Juda be basa.

¹¹ Ndoŋ nna nɛ ewura Amaziya leŋ mbe kumu to nseŋ juŋkpar mbe benapo n yɔ Nfɔl be Ketaŋɛ na to n ya kɔ kena m mɔ Edɔm be efuli so be benapo ŋgboŋ kudu kikɛ,

¹² nseŋ naŋ pɛ basa ŋgboŋ kudu malɛ gba. B daŋ ta bumo nna n yɔ kade nɛ baa tre Sɛla na be kebeegboŋ na be kakpa chulgiso n ya da bumo n lɛ to nɛ b tɔr afalta so kaseto n wu.

¹³ Loŋ be jemanɛ na Israɛlebi be benapo nɛ ewura Amaziya daa maŋ shuli nɛ b tu mo n yɔ kena na to na, ya kɔ Juda be nde nɛ a wɔ Samɛria nɛ Bɛf Hɔrɔn be kefɛato na nna nseŋ mɔ basa ŋgboŋ asa m muu bumo be asɔ damta kena na to.

¹⁴ Ewura Amaziya ka ya kɔ m pɔɔ Edɔmebi na so na nɛ e ta bumo be agbir m ba yili ŋ ki mbe agbir nsaa shuŋ amo a lara sarga a sa amo.

¹⁵ Ndoŋ nna nɛ Enyɛnpe Ebɔrɛ nya agbo ga ŋkpal le be asheŋ ere so nseŋ shuŋi anebi ewura Amaziya kutɔ n ya bishi mo le: “Manɛ nna nɛ fee shuŋ efuli pɔtɛana so be agbir nɛ a maŋ tiŋ m mɔlga amo gbagba be basa ashi fo enɔ to ere?”

¹⁶ Nɛ ewura Amaziya ku mbe kamalga na to ŋ kaŋɛ le: “Saŋɛ mo nɛ an ta fo ŋ ki ewura be asoetojipo? Lo fo kɔnɔ na pɔɛŋ nɛ n shin nɛ b ba mɔ fo ndoŋ!” Anebi na ka jo nɛ e malga n loge, nɛ mo alɛ kaŋɛ le: “Naniere nɛ m pin fanɛ Ebɔrɛ bee sha kemur fo nna ŋkpal fo ka kplaŋ ma kasotoji so nseŋ wora asheŋ ere kikɛ so.”

B ka kɔ Israɛl kena be asheŋ

¹⁷ Juda be ewura Amaziya nɛ mbe besoetojipoana daŋ kre nɛ b ya kɔ Israɛl kena nna, nseŋ ta kubɔya n ya sa Israɛl be ewura Jehɔash nɛ e la Jehowahaz pibinyɛn nsaa la Jehu mo nanabi na, a to mo emaŋ fanɛ b kɔ kena.

¹⁸ Ndoŋ nna nɛ ewura Jehɔash malɛ ta le be kubɔya ere n sa ewura Amaziya. E yɛ: “Kachako nɛ Lebanɔn be abee so be ewidibi ko ta kubɔya n sa kedibi nɛ baa tre Sida na fanɛ e ta mo pibiche n sa mo pibinyɛn nɛ e kil. Ndoŋ nna nɛ kupuŋ to be kusɔbɔya ko ba fefɛa ewidibi na to n lɛ.

¹⁹ Naniere Amaziya fee wu fo kumu nna, ŋkpal fo ka pɔɔ Edɔmebi so so, ama mee kaŋɛ fo nna fanɛ fo shir a wɔ laŋ to. Sa maŋ kil asheŋ nɛ a beeŋ bar jɛrbi m ba sa fo nɛ fo basa.”

²⁰ Ama ewura Amaziya daŋ kini kenu nna ŋkpal manɛ so Ebɔrɛ e daa sha fanɛ b kɔ m pɔɔ mo so ŋkpal e ka daa shuŋ Edɔmebi be agbir so.

²¹ Amoso Israɛl be ewura Jehɔash nɛ Juda be ewura Amaziya daŋ ya kɔ abar kena nna. Bɛf Shɛmɛsh ashi Juda be efuli so nɛ b daŋ ya kɔ kena na.

²² Israɛlebi na daŋ kɔ m pɔɔ Juda be efuli so be benapo na so nna nɛ b shile n yɔ bumo pe ana.

²³ Ndoŋ nna nɛ Jehɔash pɛ Amaziya ŋ keta mo n yɔ Jerusalɛm n ya yili Efrayim be kabuna na ekpa m bure Jerusalɛm be egbal na fanɛ ayadra alfa ashe n ya fo kukɔlɔbi to be kabuna na ase.

²⁴ E daŋ muu bɔrɛlambu na to be shuwa nɛ gbiti nɛ kumo to be asɔwurbi kikɛ nɛ ewura be laŋ to be ekpanjawu nɛ Obɛd Edɔm be kaman to ebi daa keniso na kikɛ nna, nseŋ pɛ basa gba n ti so m bɛta n yɔ Samɛria.

²⁵ Israɛl be ewura Jehɔash ka wu be kaman nɛ Juda be ewura Amaziya naŋ ji nfɛ kuduanu n ti so.

²⁶ Asɔ kama nɛ Amaziya wora saŋɛ so nɛ e daa la ewura na hale m ba wu na kikɛ be asheŋ wɔ Juda nɛ Israɛl be bewura be nwɔl to.

²⁷ Baŋ yili saŋɛ so nɛ ewura Amaziya kini kebaanu a sa Enyɛnpe Ebɔrɛ na, nɛ b fara a fin mo nɛ kulubi ashi Jerusalɛm. Ade kikɛ be kaman nɛ e shile n yɔ Lakish nɛ mo doŋana malɛ bɛ mo so n yɔ ndoŋ n ya mɔ mo.

²⁸ B daŋ ta mbe kebuni nna n deŋi gbaŋɛ so m ba puli kakpa nɛ baa puli bewura na ashi Deevid be kade to Jerusalɛm.