2 Kronikɛls 24 - EBƆRƐ BE KAWƆL

Juda be ewura Jɔash be asheŋ

¹ Jɔash ka ki Juda be efuli so be ewura nɛ e la nfɛ ashunu nna, nseŋ ji kuwura nfɛ adena ashi Jerusalɛm to. Mo nio e daa la Zibia nɛ e shi Bɛshiba be kade to na.

² E daa wora kusɔ nɛ k walɛ Enyɛnpe Ebɔrɛ be anishito saŋɛ so nɛ bɔrɛmatapo Jehowada daa wɔ ŋkpa to na nna.

³ Jehowada daŋ ta beche anyɔ nna n sa ewura Jɔash nɛ mo nɛ bumo kurge bibinyɛn nɛ bibiche.

⁴ Jɔash ka ji kuwura n ya fo saŋko na, nɛ e yili kumo fanɛ e beeŋ lɔŋɛ bɔrɛlambu na nɛnɛ.

⁵ E daŋ shin nna nɛ bɔrɛmatapoana nɛ Livaiebi na yɔ Juda be efuli so be nde to, n ya sɔ basa na kikɛ kafɛ kafɛ be lampo nɛ baa sɔ a lɔŋɛ bɔrɛlambu na. E kaŋɛ bumo nna fanɛ b wora kumo manaŋ ama Livaiebi na daa maŋ ta kumo to manaŋ.

⁶ Amoso e daŋ shuŋi nna n tre Jehowada nɛ e la bɔrɛmatapo nimuso na m bishi mo le: “Manɛ nna nɛ fo maŋ shin nɛ Livaiebi na sɔ lampo ashi Juda nɛ Jerusalɛm be basa na kutɔ fanɛ kananɛ Enyɛnpe Ebɔrɛ be kenya Mosis daŋ shin nɛ baa ka nɛ baa ta a chɛ Enyɛnpe be Nshɛr be wajɛbu na be kushuŋ to na?”

⁷ Ewurche Atalia nɛ e la kumu kpakpasowura na be mbinyɛnsobi e daŋ jija bɔrɛlambu na nseŋ ta kumo to be asɔ cheembi na a shuŋ kegbir nɛ baa tre Baal na.

⁸ Ewura na daŋ kaŋɛ Livaiebi na nna fanɛ b lɔŋɛ amansherbi be kadekabi, nɛ baaŋ ta n yili bɔrɛlambu na be kabuna to a sɔ etoto.

⁹ E daŋ sa ebɔl Jerusalɛm nɛ Juda kikɛ to nna fanɛ b ta bumo be etoto m ba bɔrɛlambu nɛ k wɔ Jerusalɛm na to fanɛ kananɛ Ebɔrɛ be kenya Mosis daŋ yili kumo kiyi to fanɛ b baa sɔ Israɛlebi na kutɔ a sa Enyɛnpe Ebɔrɛ na.

¹⁰ Nɛ benimuana na nɛ basa na kikɛ shuli kumo be loŋ nseŋ ta bumo be amansherbi m ba kaa wɔtɔ deka na to hale nɛ k ya bɔlɔ.

¹¹ Karechɛ kikɛ Livaiebi na bee ta deka na nna n yɔ ewura na be krachi nɛ esa nɛ e bɛ bɔrɛmatapo nimuso na so kutɔ nɛ b lara amansherbi na ŋ karga amo. Kumo be kaman nɛ b naŋ bɛta deka na n yɔ bɔrɛlambu na to. Ŋkpal b ka bee wora loŋ karechɛ kikɛ so, amansherbi damta nɛ b daŋ chala.

¹² Ewura na nɛ Jehowada e daa ta amansherbi na a sa basa nɛ baa keni bɔrɛlambu na be kelɔnɛ be kushuŋ so na, nɛ bumo alɛ e ta amo n haya bepɔrpo nɛ ekapɛnta nɛ ebɔyɛpo nɛ b ta abɛlso nɛ danyaŋ n lɔŋɛ asɔwurbi n wɔtɔ Enyɛnpe Ebɔrɛ be bɔrɛlambu na to.

¹³ Basa na daŋ shuŋ kenishipereso nna nseŋ lɔŋɛ bɔrɛlambu na fanɛ kananɛ k daa du sososo na gbagba, nɛ k naaŋ nya eleŋ ga n ti so.

¹⁴ B ka lɔŋɛ bɔrɛlambu na n loge na, nɛ b ta amansherbi nɛ a ka na m ba sa ewura na nɛ Jehowada. Loŋ be amansherbi nɛ a ka na malɛ nɛ b ta n lɔŋɛ asɔwurbi nɛ shuwa nɛ gbiti be ntishaŋ nɛ b kɔ a wora asheŋ ashi Enyɛnpe Ebɔrɛ be bɔrɛlambu na to. Bɔrɛmatapo Jehowada ka daa wɔ ŋkpa to na, b daa mɔ asɔbɔya nna a lara sarga chɔɔso bɔrɛlambu na to a sa Enyɛnpe Ebɔrɛ saŋkama.

¹⁵ Ewura Jehowada daŋ ji nfɛ kalfa nɛ adesa pɔɛŋ nseŋ wu.

¹⁶ Kakpa nɛ baa puli bewura ashi ewura Deevid be kade to Jerusalɛm na, nɛ b daŋ puli mo alɛ gba ŋkpal kushuŋ lela nɛ e daŋ wora n sa Israɛl be basa nɛ kushuŋ nɛ e shuŋ ashi Ebɔrɛ be bɔrɛlambu na to so.

¹⁷ Ewura Jehowada ka wu na be kaman nɛ Juda be bejuŋkparpoana na ya bunyaŋ ewura Jɔash nseŋ lɔlɔ mo nɛ e bee bɛ bumo be kasotoji so.

¹⁸ Basa na daa maŋ naa yɔ bɔrɛlambu na to n ya kaa bunyaŋ bumo nananyɛnana be Ebɔrɛ na. B daŋ naŋ fara nna a shuŋ agbir nɛ kegbirche Ashira be kegbir be kapɔrduli. Ŋkpal kulubi nɛ b wora ere so, Enyɛnpe Ebɔrɛ be agbo daŋ ba Juda nɛ Jerusalɛm be basa so nna.

¹⁹ Amo nɛ amo kikɛ Enyɛnpe Ebɔrɛ na daŋ shuŋi anebiana nna fanɛ b ya kpele bumo kusoe n shin nɛ b bɛta m ba mo kutɔ nɛ b kini kenu.

²⁰ Ndoŋ nna nɛ Ebɔrɛ be kiyoyu ba bɔrɛmatapo Jehowada pibinyɛn Zakareya so. Nɛ e yili kakpa nɛ basa na beeŋ wu mo ŋ kaŋɛ le: “Enyɛnpe Ebɔrɛ yɛ, manɛ nna nɛ men kini kebɛ mbe mbra so nsaa kil kasogberge a sa menyi be amu loŋ! Men ka kini mo na so nɛ mo alɛ gba kini menyi na.”

^21-22 Ewura Jɔash daŋ teŋ kelela nɛ Zakareya mo tuto Jehowada daŋ wora mo na so nna nseŋ ti bejuŋkparpo na so nɛ b kre fanɛ b mɔ Zakareya. Ewura na e daŋ sa ekpa nɛ b kpa Zakareya ajembu m mɔ ashi Enyɛnpe Ebɔrɛ be bɔrɛlambu na be kelɔnɛ so. Zakareya ka bee wu nɛ e kaŋɛ le: “Enyɛnpe Ebɔrɛ wu kusɔ nɛ fee wora ere kikɛ. Mo alɛ beeŋ gberge fo kusoe n tal to!”

Ewura Jɔash be kuwurji be lalaloge be asheŋ

²³ Kpanchali be jemanɛ ka fo, nɛ Siriya be benapo yɔ Juda nɛ Jerusalɛm n ya kɔ bumo kena m mɔ bumo be bejuŋkparpoana kikɛ nseŋ muu bumo be asɔ damta kena na to n ya sa bumo be ewura ashi Damaskɔs.

²⁴ Kashenteŋ nna fanɛ Siriya be benapo na daa maŋ shibi, ama Enyɛnpe Ebɔrɛ daŋ shin nna nɛ b kɔ m pɔɔ Juda be benapo damta na so ŋkpal b ka kini mo Enyɛnpe bumo nananyɛnana be Ebɔrɛ na so. Kananɛ Enyɛnpe na daŋ gberge ewura Jɔash kusoe nna na.

²⁵ Ewura Jɔash daŋ doro kena na to nna ga, ama bedoŋ na ka bɛta, nɛ mbe benimuana na be benyɔ ya mɔ mo ashi ebu nɛ e dese to na to m bishi kuwule ŋkpal e ka mɔ bɔrɛmatapo Jehowada pibinyɛn na so. Ewura Deevid be kade to nɛ b daŋ ta mo n ya puli, ama b daa maŋ puli mo kakpa nɛ baa puli bewura na.

²⁶ Basa nɛ b daŋ wora loŋ na, e daa la kache nɛ e shi Ammɔn be efuli so nɛ baa tre mo Shimish na pibinyɛn Zabad na nɛ Mowab be efuli so be kache nɛ baa tre mo Shimrif na pibinyɛn Jehozabad.

²⁷ Bewura be adrasheŋ gba bee malga Jɔash be mbinyɛnsobi be asheŋ nɛ kananɛ anebiana na malga mbe asheŋ nɛ kananɛ e lɔŋɛ bɔrɛlambu na nɛnɛ be asheŋ kikɛ. Jɔash ka wu, mo pibinyɛn Amaziya e sɔ mo so n ji kuwura.