2 Kronikɛls 23 - EBƆRƐ BE KAWƆL

Judaebi ka kini kenu n sa ewura Atalia be asheŋ

¹ Ahaziya pibinyɛn Jɔash ka ŋana bɔrɛlambu na to nfɛ ashe na, nɛ bɔrɛmatapo Jehowada wu fanɛ k daga e ka wora kusɔ ko. Ndoŋ nna nɛ e ya fin benapo be benimu nɛ baaŋ yili mo kaman. Bumo e daa la Joram pibinyɛn Azariya nɛ Jehohanan pibinyɛn Ishmaɛl nɛ Obɛd pibinyɛn Azariya nɛ Adaya pibinyɛn Maaseia nɛ Zikri pibinyɛn Elishafat.

² Basa ere kikɛ daŋ yɔ Juda be efuli so be nde kikɛ to nna n ya bar Livaiebi nɛ mbuna mbuna be bejuŋkparpoana na kikɛ ashi Jerusalɛm.

³ Bumo kikɛ daŋ ba shɛr bɔrɛlambu na to nna nɛ bumo nɛ ewura pibinyɛn Jɔash wora kɔnɔkoŋwule be ŋkre. Ndoŋ nna nɛ Jehowada kaŋɛ bumo le: “Ewura nɛ e wu na pibinyɛn nde. Mo e naŋ ki ewura naniere ŋkpal manɛ so Enyɛnpe Ebɔrɛ na nase kɔnɔ nna fanɛ ewura Deevid be kaman to ebi e naaŋ baa ji kuwura saŋkikɛ.

⁴ Ama kusɔ nɛ k daga an ka wora nde. Bɔrɛmatapoana nɛ Livaiebi na kaŋ ba kushuŋ to kewushiachɛ ere, kananɛ b barga bumo to ntuŋ asa so na be katuŋ koŋwule e naaŋ baa keni bɔrɛlambu na be mbunaana so,

⁵ nɛ katuŋ koŋwule malɛ e baa keni ewura be laŋ to so nɛ katuŋ koŋwule nɛ k ka na malɛ e baa keni kabuna nɛ baa tre Gbaltɔlase be kabuna na so. Nɛ menyi nɛ men ka na a yili a keni bɔrɛlambu na be kelɔnɛ na so.

⁶ Ekama maŋ kɔ ekpa nɛ e luri bɔrɛlambu na to ama bɔrɛmatapoana nɛ Livaiebi nɛ baa shuŋ kumo to kamɔnchɛ na nawule. Bumo ere beeŋ tiŋ ŋ luri ŋkpal b ka lara kulubi bumo be ŋgbene to nsaa du cheembi so. Ama menyi nɛ men ka ere bre daga fanɛ men bɛ Enyɛnpe Ebɔrɛ be keŋini so nseŋ yili kowushina.

⁷ Livaiebi na beeŋ keta bumo be etokobi n wora shiriya n yili a kuŋ ewura na. Kaplɛkama nɛ ewura na bee yɔ nɛ b bɛ mo so. Ekama malɛ nɛ e pɛl n luri bɔrɛlambu na to daga luwu.”

⁸ Livaiebi nɛ Juda be basa na kikɛ daŋ wora kusɔ nɛ Jehowada kaŋɛ na nna. B daa maŋ sa basa nɛ b shuŋ bumo b kushuŋ kewushiachɛ n loge na ekpa fanɛ b yɔ epe amoso bumo nɛ basa nɛ b ba nɛ b ba sɔ bumo so na kikɛ daa wɔ ndoŋ nna. Amoso benapo be benimu na daŋ gbargbar basa nɛ b koso kushuŋto nɛ bumo nɛ b ba nɛ b ba sɔ bumo so na kikɛ ndoŋ nna.

⁹ Ndoŋ nna nɛ Jehowada ta ekpa nɛ abɛlso be asɔkuŋso nɛ a daa la ewura Deevid peya nsaa yil bɔrɛlambu na to na n sa benapo be benimu na.

¹⁰ E daŋ shin nna nɛ bekumpo na ta bumo be etokobi ŋ keta n yili ŋ kulti bɔrɛsure na ashi bɔrɛlambu na be anishito a kuŋ ewura na.

¹¹ Ade kikɛ be kaman nɛ Jehowada nɛ mbe mbinyɛnsobi ya keta Jɔash n lar kowu nseŋ ta kuwurwuro m buu mo. Kumo be kaman nɛ b ta bewura be mbra be kawɔl n sa mo n ta mo ŋ ki ewura. Bɔrɛmatapo Jehowada nɛ mbe mbinyɛnsobi e daŋ duga ŋku n do Jɔash be kumu so n ta mo ŋ ki ewura, nɛ ekama cha awɔr ŋ kaŋɛ: “Ebɔrɛ e teŋi ewura be ŋkpa so!”

¹² Ewurche Atalia ka nu basa na ka bee dele ewura na, nɛ e nya manaŋ n yɔ kakpa nɛ jimaŋ na shɛr na ashi bɔrɛlambu na to.

¹³ E ka ya wu ewura popɔr na nɛ e yil eshabɔrɛ na ekpa ashi bɔrɛlambu na be kabuna be anishito be kakpa nɛ bewura bee chena na, nɛ benapo be benimu nɛ mbelfompoana yili ŋ kulti mo, nɛ basa na kikɛ bee cha awɔr kagbenefuliso nsaa foŋ mbel nɛ bɔrɛlambu to be beshɛbompoana bee juŋkpar kasheŋwora na kikɛ na, nɛ e kpɛa mbe asɔbuuso to kagbenejijaso nseŋ boŋto ŋ kaŋɛ le: “Menyi bedebɔrpo ere!”

¹⁴ Jehowada daa maa sha b ka mɔ ewurche Atalia bɔrɛlambu na ase, ŋkpal loŋ so, e daŋ tre benapo be benimuana na nna ŋ kaŋɛ bumo le: “Men ta mo m bɔla bekumpo na to n yɔ. Esa kama malɛ nɛ e kaŋ pɛl a sha k sɔ mo n yige, men mɔ amodoŋwura.”

¹⁵ Ndoŋ nna nɛ b pɛ mo n ta mo n yɔ ewura be laŋ to be kelɔnɛ so be kakpa nɛ baa tre Egbaŋɛ be Kabuna na, n ya mɔ mo ndoŋ.

Jehowada ka chɛrga asheŋ

¹⁶ Bɔrɛmatapo Jehowada daŋ shin nna nɛ mo nɛ ewura Jɔash nɛ basa na wora kɔnɔkoŋwule be ŋkre fanɛ baaŋ baa ji kashenteŋ a sa Enyɛnpe Ebɔrɛ.

¹⁷ Kumo be kaman nɛ b ya da Baal be lambu na n lɛ nseŋ bure kumo be ebɔrɛsure nɛ agbirana nɛ a wɔ ndoŋ na kikɛ nseŋ mɔ Maatan nɛ e la Baal be kegbirwura na ashi ebɔrɛsureana na ase gbagba.

¹⁸ Ewura Jehowada daŋ shin nna nɛ bɔrɛmatapoana nɛ Livaiebi na bee keni bɔrɛlambu na be kushuŋ so fanɛ kananɛ ewura Deevid yili n sa bumo na. Bumo be kushuŋ e la kebaachɔɔ esarga nɛ b lara n sa Enyɛnpe Ebɔrɛ na ashi Mosis be mbra be ekpa so, nɛ kebaajuŋkpar a boŋ nshɛ kasheŋwora kikɛ to.

¹⁹ Ewura Jehowada daŋ ta bekumpo nna nɛ baa keni bɔrɛlambu na be mbunaana so saŋɛ na so basa kama nɛ b kɔ eyurpi daŋkare be ekpa so na, maaŋ luri kumo to.

²⁰ Ade kikɛ be kaman nɛ benapo be benimuana nɛ Juda be kade to be benimuana nɛ ekrachiana nɛ basa nɛ b ka na kikɛ ba ewura Jehowada kutɔ nɛ b bɛ abar so n ya keta ewura na bɔrɛlambu na to m ba ewura be laŋ to. Kabunagboŋ na to nɛ b daŋ bɔla n luri laŋ na to nɛ ewura na ya chena mbe kuwurputi so.

²¹ Basa na kikɛ be ŋgbene daŋ fuli bumo nna ga nɛ kade na kikɛ wora shruum ŋkpal ewurche Atalia ka wu na so.