2 Kronikɛls 22 - EBƆRƐ BE KAWƆL

Juda be ewura Ahaziya be asheŋ

¹ Nlɔrbu na ka daŋ ta kena n ya purgi Juda na nɛ b mɔ ewura Jehoram be mbinyɛnsobi kikɛ ŋ ka Ahaziya nɛ e la mbe kaluge na nawule. Amoso Jerusalɛm be basa daŋ shin nna nɛ Ahaziya sɔ mo tuto so n ji kuwura.

^2-3 Ahaziya daa la nfɛ adunyɔ nɛ anyɔ nna pɔɛŋ nseŋ ki ewura. Mo alɛ daŋ ji kuwura Jerusalɛm to kafɛ koŋwule nna. Ahaziya gba daŋ bɛ ewura Ahab be kanaŋ to ebi be ekpa so nna n wora alubi ŋkpal mo nio Atalia nɛ e la Israɛl be ewura Ahab pibiche nsaa la Omri mo nanabi na ka ji mo asoeto lubi so.

⁴ Ahaziya mo tuto ka wu na be kaman, e daŋ wora kulubi nna ŋ gbiti Enyɛnpe Ebɔrɛ ŋkpal e ka daŋ lara Ahab be kanaŋ na to be basa ko ŋ ki mbe asoetojipoana so. Bumo be kasotoji na malɛ e shin nɛ e tɔr.

⁵ E daŋ bɛ bumo be kasotoji so nna n tu Israɛl be ewura Joram n yɔ nɛ b ya kɔ Siriya be ewura Haziɛl kena. Ramɔf nɛ k wɔ Giliad na nɛ b daŋ tu abar ŋ kɔ kena na nɛ b doro Joram ashi kena na to.

⁶ E ka doro na, nɛ e bɛta n yɔ Jezreel be kade to nɛ e ya chɛ mbe doro na, nɛ Ahaziya yɔ ndoŋ nɛ e ya bɔ mo so.

⁷ Ahaziya be keya bɔɔ Joram so na, e daŋ da mo n lɛ. E ka ba Joram kutɔ na, nɛ mo nɛ Joram ya tu Nimshi pibinyɛn Jehu nɛ Enyɛnpe Ebɔrɛ lara fanɛ e mur Ahab be kuwurji na.

⁸ Jehu ka bee wora kusɔ nɛ Ebɔrɛ kaŋɛ mo na, nɛ e wu Juda be bejuŋkparpoana nɛ Ahaziya mo wɔpabiana nɛ b daŋ tu mo m ba nɛ b ba bɔ Joram so na. Nɛ Jehu mɔ Ahaziya mo wɔpabiana na nɛ benimuana na be beko

⁹ nseŋ kaŋɛ fanɛ b ya fin Ahaziya malɛ, nɛ b ya wu mo nɛ e ŋana Samɛria. Ndoŋ nna nɛ b pɛ mo n yɔ ewura Jehu kutɔ n ya mɔ. B daŋ puli Ahaziya nna ŋkpal b ka daa sa mo nananyɛn wura Jehoshafat bunyaŋ ŋkpal e ka daŋ wora ania n shuŋ Enyɛnpe Ebɔrɛ nɛnɛ so. Esa kikɛ malɛ daa maŋ naŋ ka Ahaziya be kanaŋ to nsaa kɔ eleŋ nɛ e tiŋ n ji kuwura na.

Juda be ewurche Atalia be asheŋ

¹⁰ Juda be Ewura Ahaziya mo nio Atalia ka nu fanɛ mo pibinyɛn wu nna, nɛ e kaŋɛ fanɛ b mɔ basa nɛ b shi Juda be ewura be kanaŋ to na kikɛ.

¹¹ Ahaziya daa kɔ esipoche nɛ baa tre mo Jehosheba nɛ e daa kil bɔrɛmatapo ko nɛ baa tre mo Jehowada. Mo e daŋ mɔlga Ahaziya pibinyɛn Jɔash nɛ e la Ahaziya be mbinyɛnsobi nɛ b daa sha kemɔ na be eko. E daŋ ta mo nna ŋ ŋana Enyɛnpe be bɔrɛlambuna be ebu deseto to. Ŋkpal loŋ so, Atalia daa maŋ nya mo m mɔ.

¹² Nfɛ ashe nɛ Jɔash ŋana bɔrɛlambu na to. Loŋ be jemanɛ na nɛ Atalia malɛ bee ji kuwurche ashi efuli na so.