2 Kronikɛls 21 - EBƆRƐ BE KAWƆL

¹ Ewura Jehoshafat ka wu, kakpa nɛ baa puli bewura ashi ewura Deevid be kade to Jerusalɛm na, nɛ b puli mo alɛ gba, nɛ mo pibinyɛn Jehoram sɔ mo so n ji kuwura.

Juda be ewura Jehoram be asheŋ

² Ewura Jehoshafat pibinyɛn Jehoram daa kɔ besipo nyɛnso ashe nna. Bumo e daa la Azariya nɛ Jehiɛl nɛ Zakareya nɛ Azariahu nɛ Maikel nɛ Shefatiya.

³ Bumo tuto, ewura Jehoshafat, daŋ ta shuwa nɛ gbiti damta nɛ asɔ lela ko gba n ti so n sa bumo nseŋ shin nɛ bumo be ekoŋwule kikɛ bee keni kade kama nɛ b pɔr egbal ŋ kulti kumo ashi Juda be efuli so so, ama Jehoram e daŋ sɔ mo tuto Jehoshafat so n ji kuwura ŋkpal e ka la mbe wurkoŋ so.

⁴ Jehoram be kuwurji ka nya eleŋ, nɛ e shin nɛ b mɔ mo sipoana na kikɛ nɛ Israɛl be benimuana na be beko.

⁵ Nfɛ adesa nɛ anyɔ nɛ Jehoram daŋ ji pɔɛŋ nseŋ ki ewura nseŋ chena Jerusalɛm to n ji kuwura nfɛ aburwa.

⁶ Ŋkpal ewura Jehoram ka ta ewura Ahab pibiche so e daa kɔ kumukpakpaso nna fanɛ ewura Ahab nɛ Israɛl be bewura ko nseŋ wora alubi ŋ gbiti Enyɛnpe Ebɔrɛ,

⁷ ama Enyɛnpe Ebɔrɛ na daa maa sha fanɛ e mur ewura Deevid be kaman to ebi na, ŋkpal mo nɛ ewura Deevid ka wora ŋkre nɛ e nase kɔnɔ fanɛ ewura Deevid be kaman to ebi e naaŋ baa ji kuwura mbaanaayɔ so.

⁸ Saŋɛ so nɛ Jehoram daa la ewura na, Edɔm be basa na daa kini kebaanu a sa Judaebi na nna nsaa lara bumo gbagba be bewura.

⁹ Ŋkpal loŋ so ewura Jehoram nɛ mbe benapo be benimuana na daŋ ta egbaŋɛturko nna n ya kɔ Edɔmebi na kena nɛ Edɔmebi na kulti bumo n wɔtɔ. Kanyɛ ka biri, nɛ Judaebi na ŋana n shile.

¹⁰ Yili loŋ be saŋɛ na, nɛ Edɔmebi sɔ bumo be amu ashi Judaebi be enɔ to. Kumo be saŋɛ nɛ Libna be kade to ebi gba kini kebaanu a sa ewura Jehoram ŋkpal e ka kini kebaanu a sa Enyɛnpe Ebɔrɛ nɛ e la mo nananyɛnana be Ebɔrɛ na so.

¹¹ Ewura Jehoram daŋ pɔr agbir be mboŋ ashi Juda be abee be efuli so nna nseŋ shin nɛ Juda nɛ Jerusalɛm be basa wora alubi ŋ gbiti Enyɛnpe Ebɔrɛ.

¹² Kachako nɛ Anebi Elaija sibɛ kawɔl n sa ewura Jehoram a kaŋɛ mo le: “Enyɛnpe Ebɔrɛ nɛ e la fo nananyɛn ewura Deevid be Ebɔrɛ na yɛ fo maŋ wora nɛnɛ ŋkpal fo ka maŋ bɛ fo tuto ewura Jehoshafat nɛ fo nananyɛn ewura Asa be ekpa so na so.

¹³ Fo bɛ Israɛl be bewura na be ekpa so nna nseŋ shin nɛ Juda nɛ Jerusalɛm be basa maŋ naa ji kashenteŋ a sa Ebɔrɛ fanɛ kananɛ Ahab nɛ mbe kaman to ebi daŋ shin nɛ Israɛl be efuli so ebi maŋ ji kashenteŋ n sa Ebɔrɛ na. Fo mɔ fo sipo nyɛnsoana nɛ b bɔ fo na.

¹⁴ Ŋkpal loŋ so, Enyɛnpe Ebɔrɛ na beeŋ gberge fo basa nɛ fo kanaŋ to ebi kikɛ kusoe nseŋ mur fo asɔ kikɛ gba n ti so.

¹⁵ Fo alɛ gbagba beeŋ nya epunto be kulɔ kpakpaso nɛ k tɔrɔ fo hale nɛ fo ya wu.”

¹⁶ Kede be kaman nɛ Enyɛnpe Ebɔrɛ na shin nɛ Filistiebi nɛ Nlɔrbu nɛ b chena m mata Itiopiaebi na ya kɔ Jehoram kena.

¹⁷ B daŋ kɔ nna n sɔ Juda nseŋ muu ewura be laŋ to be asɔ kikɛ, m pɛ mbe beche nɛ mbinyɛnsobi kikɛ n yɔ. Mbe pibinyɛn Ahaziya nɛ e la kaluge na nawule nɛ b daa maŋ pɛ.

¹⁸ Ade kikɛ be kaman, nɛ Enyɛnpe Ebɔrɛ shin nɛ epunto be ebesa tɔr ewura na so.

¹⁹ Kumo be nfɛ anyɔ be kefɛato, nɛ mbe kulɔ na nyaŋɛto nɛ e wu ebesa damta to. Mbe beyaasepo daa maŋ puga edɛgboŋ mbe keelibuna m maŋkura mo fanɛ kananɛ b wora n sa mo nananyɛnana na.

²⁰ Nfɛ adesa nɛ anyɔ nɛ Jehoram daŋ ji pɔɛŋ nseŋ ki ewura, ama e daŋ ji kuwura Jerusalɛm to nfɛ aburwa nna. E ka daŋ wu, k daa maŋ jija ekama be kagbene. Jerusalɛm nɛ k la ewura Deevid be kade to na nɛ b daŋ puli mo, ama b daa maŋ puli mo kakpa nɛ baa puli bewura na.