2 Kronikɛls 2 - EBƆRƐ BE KAWƆL

Kebelase m pɔr bɔrɛlambu na be asheŋ

¹ Ewura Sɔlɔmɔn yili kumo nna fanɛ e beeŋ pɔr bɔrɛlambu nɛ baaŋ baa bunyaŋ Enyɛnpe Ebɔrɛ kumo to nseŋ pɔr ewura malɛ be laŋ n sa mo gbagba be kumu.

² E daŋ shin nna nɛ beshumpo ŋgboŋ adushunu bee sulɔ bɔrɛlambu na be asɔ nɛ b kɔ a pɔr kumo na nseŋ shin nɛ basa ŋgboŋ aduburwa malɛ bee bure ajembu to ashi abee be efuli na so. Benyɛn ŋgboŋ asa nɛ alfa ashe nɛ e daŋ ta nɛ baa keni kushuŋ na so nɛ k baa nite nɛnɛ.

³ Ewura Sɔlɔmɔn daŋ ta le be kubɔya ere nna n ya sa Tayɛ be Ewura Hiram: “Shin nɛ ma nɛ fo e baa ji yawu fanɛ kananɛ fo nɛ n tuto ewura Deevid daa ji yawu na, nɛ fo baa fa ndibi nɛ baa tre sida na a sa ma fanɛ kananɛ fo daŋ fa amo n sa mo nɛ e pɔr mbe ewura be laŋ na.

⁴ Mee pɔr lambu nna nɛ m maŋkura Enyɛnpe Ebɔrɛ. K beeŋ baa la kakpa cheembi nɛ ma nɛ ma basa beeŋ baa bunyaŋ Ebɔrɛ nsaa chɔɔ duwu nɛ a kɔ efɛa belbelso nsaa lara bodobodo cheembi be sarga a sa mo saŋkikɛ. Ndoŋ malɛ gba nɛ anyeeŋ baa lara sarga chɔɔso kachipurso nɛ kaaseso kikɛ nɛ kewushiachɛ kikɛ nɛ kufɔl popɔr to be kachɛ juŋkparso kikɛ nɛ ewushi be nchɛ a maŋkura an Enyɛnpe nɛ an be Ebɔrɛ na. Mo e kaŋɛ Israɛlebi kenishipereso fanɛ b baa wora loŋ mbaanaayɔ.

⁵ Mee sha kepɔr bɔrɛlambu nɛ k shibi ga nna, ŋkpal manɛ so, anyi be Ebɔrɛ na kɔ eleŋ a chɔ kegbir kikɛ.

⁶ Ama esa kama maŋ wɔtɔ nɛ e beeŋ tiŋ m pɔr lambu nɛ k beeŋ tiŋ n sɔ Ebɔrɛ, ŋkpal manɛ so, esoso kikɛ gba kra du fimbi nɛ k tiŋ n sɔ mo. Kakpa nɛ ma ere beeŋ tiŋ m pɔr e la lambu nɛ baaŋ baa chɔɔ duwu kumo to a sa Ebɔrɛ.

⁷ Lara esa nɛ e kɔ kenyi a tiŋ a wora asɔ a deŋi shuwa nɛ gbiti nɛ danyaŋ nɛ abɛlso be asɔ so nsaa kɔ ewajɛ buru nɛ apeper kunɔkunɔ nɛ apeper kpaw be kelue be kenyi nɛ mo nɛ basa nɛ b kɔ enɔ to be kushuŋ be kenyi nɛ n tuto Deevid lara nɛ b wɔ Juda nɛ Jerusalɛm na e baa kaa shuŋ.

⁸ N nyi fo basa nɛ baa ku ndibi na ka nyi bumo be kushuŋ nɛnɛ, amoso mee kule fo nna nɛ fo sa ma ndibi nɛ baa tre sida na nɛ ndibi nɛ baa tre seprɛs na nɛ ndibi nɛ baa tre junipa nɛ a wɔ Lebanɔn na be ndishaŋ. N wora shiriya nɛ n shuŋi ma basa nɛ b ba chɛ fo basa to

⁹ n fin ndibi nɛ b kɔ a wora ebu na be adamta m ba, ŋkpal manɛ so bɔrɛlambu nɛ mee sha kepɔr na beeŋ ba shibi nsaa walɛ ga.

¹⁰ Meeŋ sa fo beshumpo na ayu ebɔtɛ ŋgboŋ alfa anyɔ nɛ ayu peper be ebɔtɛ ŋgboŋ alfa anyɔ nɛ nsa edurɔm ŋgboŋ kalfa nɛ kudu nɛ ɔlif be ŋku be edurɔm ŋgboŋ kalfa nɛ kudu.”

¹¹ Ndoŋ nna nɛ ewura Hiram sibɛ kawɔl n sa ewura Sɔlɔmɔn ŋ kaŋɛ mo le: “Enyɛnpe Ebɔrɛ be kasha nɛ e kɔ n sa mbe basa so nɛ e ta fo ŋ ki bumo be ewura.

¹² Kemaŋkura e baa la Enyɛnpe Ebɔrɛ nɛ e la Israɛl be Ebɔrɛ nɛ esoso nɛ kasawule kikɛ be etopo na peya! Mo e sa ewura Deevid ebinyɛn nyiashempo nɛ e kɔ asheŋ be kepinto nɛ kasheŋwora be kenyi nsaa sha kepɔr bɔrɛlambu n sa Enyɛnpe Ebɔrɛ nɛ ewura be laŋ n sa mbe kumu.

¹³ Meeŋ shin nɛ esa nɛ e nyi asheŋ nsaa kɔ enɔ to be kushuŋ be kenyi nɛnɛ nɛ baa tre mo Huram na e ba fo kutɔ.

¹⁴ Mo nio shi Dan be yiri to nna nɛ mo tuto malɛ la Tayɛ be kadetobia. E nyi kananɛ baa ta shuwa nɛ gbiti nɛ danyaŋ nɛ abɛlso nɛ ajembu nɛ ndibi a lɔŋɛ asɔ damta. E beeŋ tiŋ n lue ewajɛ buru nɛ apeper kpaw nɛ apeper kunɔkunɔ nɛ ago. E kɔ kenyi a laŋɛ kebaachaŋ asɔ a deŋi asɔ so nsaa beeŋ tiŋ n wora ndulgi kama nɛ b ŋini mo fanɛ e wora. Shin nɛ e tu fo beshumpo nɛ b kɔ enɔ to be kushuŋ be kenyi ga na nɛ bumo nɛ b daa shuŋ a sa fo tuto ewura Deevid na a shuŋ.

¹⁵ Amoso wora ania n ta ayu nɛ ayu peper nɛ nsa nɛ ɔlif be ŋku nɛ fo nase kɔnɔ fanɛ feeŋ sa na n chise beshumpo na.

¹⁶ Anyeeŋ ku ndibi nɛ baa tre sida nɛ fee sha na ashi Lebanɔn be abee so nseŋ ta amo n yɔ teku be kɔnɔ ase n ya kre amo nɛ eyɔri to n ta amo m bɔla teku so n yɔ Jɔpa, nɛ fo ya ta amo ndoŋ n yɔ Jerusalɛm.”

B ka fara bɔrɛlambu na be kepɔr be asheŋ

¹⁷ Ewura Sɔlɔmɔn daŋ karga befɔ nɛ b wɔ Israɛl be kasawule so kikɛ na nna, fanɛ kananɛ mo tuto Deevid daŋ wora na. Befɔ na daa wɔ basa ŋgboŋ kalfa nɛ adunu nɛ asa nɛ alfa ashe.

¹⁸ E daŋ lara bumo be ŋgboŋ adushunu nna fanɛ b baa sulɔ asɔ nɛ b kɔ a pɔr bɔrɛlambu na, nseŋ lara basa ŋgboŋ aduburwa malɛ fanɛ b baa shɛl ajembu abee so, nseŋ lara basa ŋgboŋ asa nɛ alfa ashe malɛ fanɛ b baa keni ashuŋ na so.