2 Kronikɛls 19 - EBƆRƐ BE KAWƆL

Anebi ka kpele ewura Jehoshafat kusoe be asheŋ

¹ Juda be ewura Jehoshafat bɛta n yɔ mbe kuwura laŋ to ashi Jerusalɛm nɛ shɛŋ shɛŋ maŋ wora mo.

² Nɛ anebi Jehu nɛ e la Hanani pibinyɛn na yɔ mo kutɔ n ya kaŋɛ mo le: “Fee fɛ fanɛ fo ka chɛ ewura Ahab esa lubi nɛ e kishi Enyɛnpe Ebɔrɛ to ere walɛ a? Kusɔ nɛ fo wora ere shin nɛ Enyɛnpe Ebɔrɛ nya agbo n wɔtɔ fo ga.

³ Ama amo nɛ amo kikɛ asheŋ lela ko wɔ fo to. Fo jija kegbirche Ashira be mpɔrduli nɛ basa bee shuŋ na kikɛ, fo alɛ gbagba nsaa wora ania a bɛ Ebɔrɛ be ekpa so.”

⁴ Kashenteŋ nna fanɛ ewura Jehoshafat daa wɔ Jerusalɛm nna, ama e daa yili Bɛshiba nɛ k wɔ kelargato be kaseto be kaba so na nna a nite a bɔɔ basa na so n ya ka fo Efrayim be kebee be efuli na be kelargato be esoso be kaba so be ekarso saŋkama a leŋ bumo to fanɛ b naŋ bɛta a shuŋ bumo nananyɛnana be Ebɔrɛ na.

⁵ E daŋ lara demujipoana nna n wɔtɔ nde nɛ b pɔr egbal ŋ kulti amo ashi Juda be efuli so na be kekama to

⁶ nseŋ kaŋɛ bumo le: “Men ba de so kananɛ menyee ji basa demu, ŋkpal manɛ so mannɛ dimɛdi be eleŋ so nɛ menyee bɔla a ji demu, ama Enyɛnpe Ebɔrɛ peya. Ebɔrɛ na malɛ wɔ menyi kutɔ saŋɛ nɛ menyee ji demu na.

⁷ Men baa bunyaŋ Enyɛnpe Ebɔrɛ na nsaa de so, ŋkpal manɛ so Enyɛnpe nɛ e la anyi be Ebɔrɛ na maa sha kapuni nɛ ŋkpɛato nɛ brɔbu be asheŋ.”

⁸ Ewura Jehoshafat daŋ lara Livaiebi nɛ bɔrɛmatapoana nɛ nnaŋ be bejuŋkparpo malɛ nna ashi Jerusalɛm to fanɛ b baa ji basa nɛ baa kini kebaabɛ Enyɛnpe Ebɔrɛ be mbra be ekpa so na nɛ basa nɛ bumo nɛ bumo braana ndetobia kɔ asheŋ na demu.

⁹ Le be asheŋ ere nɛ e daŋ kaŋɛ bumo: “Men ba wora men be ashuŋ nɛnɛ ashi kabɔrɛŋana nɛ kashenteŋji be ekpa so.

¹⁰ Saŋkama nɛ men braana ndetobia na baŋ ta bumo be asheŋ fanɛ kamɔ ŋko kekini kenu n sa Ebɔrɛ be keŋini nɛ mbe mbra be asheŋ m ba menyi kutɔ, k daga men ka fɛa bumo so nɛ b sa maŋ kaŋ wora kulubi ŋ gbiti Enyɛnpe Ebɔrɛ saŋɛ na so mbe agbo maaŋ ba menyi nɛ bumo kikɛ so. Men baa wora loŋ bre, Ebɔrɛ maaŋ wu menyi kulubi.

¹¹ Bɔrɛmatapowura nimuso Amariya e naaŋ baa ji kabɔrɛshuŋ be kaplɛa so be asheŋ to, nɛ Zebadiya nɛ e la Ishmaɛl pibinyɛn nɛ e la Juda be gomena na malɛ e baa ji asheŋ nɛ a ka na to. Livaiebi na malɛ e naŋ baa keni nɛ kananɛ b nase asheŋ na a shuŋ. Men ba leŋ men be amu to nsaa bɛ keŋini ere so nɛ Enyɛnpe Ebɔrɛ e baa wɔ bekama nɛ b kɔ kashenteŋ be kaman!”