2 Kronikɛls 16 - EBƆRƐ BE KAWƆL

Ewura Asa be lalaloge be nchɛ be asheŋ

¹ Juda be ewura Asa ka ji kuwura be kafɛ adesa nɛ ashesopo to, nɛ Israɛl be ewura Baasha kɔ n sɔ kade nɛ baa tre Raama na ashi Juda be efuli so nseŋ fara a pɔr egbal a kulti kumo, saŋɛ na so e beeŋ kuŋ basa nɛ baa luri Juda to a lar na akpa.

² Ndoŋ nna nɛ ewura Asa shin nɛ b lara gbiti nɛ shuwa ashi bɔrɛlambu na to nɛ ewurkpa n ya sa ewura Bɛnhadad nɛ e la Siriya be ewura na ashi Damaskɔs na, nseŋ kaŋɛ mo le:

³ “Shin nɛ anyi nɛ fo e wora kɔnɔkoŋwule fanɛ kananɛ an tutoana daŋ wora na. Gbiti nɛ shuwa na bre la fo kakɛ nna. A daga fanɛ fo ku fo nɛ Israɛl be ewura Baasha be kɔnɔkoŋwule nɛ men kɔ na to, nɛ kumo be loŋ e shin nɛ e lara mbe benapo ashi ma kasawule so.”

⁴ Nɛ ewura Bɛnhadad shuli kusɔ nɛ Asa kaŋɛ na nseŋ shuŋi mbe benapo nɛ bumo be benimu fanɛ b ya kɔ Israɛl be ndegboŋana na. B daŋ ya kɔ m pɔɔ Ijɔn nɛ Dan nɛ Abel Mayim nɛ Naftali be ndegboŋana nɛ b daa ta bumo be asɔ a yili to na kikɛ so nna.

⁵ Ewura Baasha ka nu kusɔ nɛ k bee wora na, nɛ e shin nɛ b yige egbal na be kepɔr ŋ kulti Raama be kushuŋ na nseŋ bɛta n yɔ epe.

⁶ Ndoŋ nna nɛ ewura Asa tre Juda be efuli so be benyɛn n shɛr abar so ŋ kaŋɛ bumo fanɛ b muu ajembu nɛ ndibi nɛ Baasha kɔ a shuŋ ashi Raama na. Ndoŋ nna nɛ b muu amo m ya pɔr egbal ŋ kulti Gɛba nɛ Mizpa be nde.

Anebi Hanani be asheŋ

⁷ Loŋ be saŋɛ na nɛ anebi Hanani yɔ ewura Asa kutɔ n ya kaŋɛ mo le: “Ŋkpal fo ka ta fo yirda n deŋi Siriya be ewura so nseŋ kini keta fo yirda n deŋi Enyɛnpe Ebɔrɛ so so, fo maaŋ naŋ tiŋ m pɔ Siriya be benapo so kikɛ.

⁸ Etopiya be efuli so ebi nɛ Libiya be efuli so ebi kɔ benapo damta nɛ egbaŋɛturko nɛ egbaŋɛdiipo damta. Ama ŋkpal fo ka ta fo yirda n deŋi Enyɛnpe Ebɔrɛ so so nɛ e shin nɛ fo kɔ m pɔɔ bumo so na.

⁹ Enyɛnpe Ebɔrɛ na nyi kusɔ nɛ durnya to ebi kikɛ bee wora, nsaa sa bekama nɛ b kɔ kasonu a sa mo na eleŋ. Ama ŋkpal fo ka wora kawulisheŋ so, yili kabre a yɔ, feeŋ baa kɔ kena nna saŋkama.”

¹⁰ Ewura Asa ka nu loŋ nɛ e nya agbo n wɔtɔ anebi na n shin nɛ b pɛ mo n ya ti ebu. Loŋ be jemanɛ na so nɛ ewura Asa fara a mɛaŋ basa na be beko.

Asa be kuwurji be ekar be asheŋ

¹¹ B sibɛ Asa ka ji kuwura hale n ya loge be asheŋ kikɛ n wɔtɔ Juda nɛ Israɛl be bewura be adrasheŋ be nwɔl to.

¹² Asa ka ji kuwura be kafɛ adesa nɛ akpanusopo to nɛ kulɔ lubi ko pɛ mbe aya nɛ e ki bobi; ŋkeshin nɛ amo nɛ amo kikɛ e daa maŋ fin kechɛto ashi Enyɛnpe Ebɔrɛ kutɔ. Edɔkta kutɔ nɛ e daŋ ya kaa fin kechɛto.

¹³ E ka naŋ ji nfɛnyɔ n ti so, nɛ e wu

¹⁴ nɛ b ta mo n ya puli mo gbagba be kejembu laŋ be nchaŋ nɛ e shin nɛ b kur n nase mo ashi Jerusalɛm nɛ k wɔ Ewura Deevid be kade to na to. B daŋ ta efɛa belbelso be duwu nna nɛ etulale be ŋkuana n ya gbiti mbe kebuni pɔɛŋ n ta mo m puli, nseŋ puga edɛgboŋ mbe keelibuna n shu mbe keeli bunyanso.