2 Kronikɛls 15 - EBƆRƐ BE KAWƆL

Ewura Asa ka lɔŋɛ asheŋ be asheŋ

¹ Asheŋ ere ka wora n choŋ na, nɛ Ebɔrɛ be kiyoyu gbelge Odɛd pibinyɛn Azariya so,

² nɛ e yɔ ewura Asa kutɔ n ya kaŋɛ mo le: “Ewura Asa nɛ Juda nɛ Bɛnjamin be basa, men kikɛ e nu nfe! Men baa nu a sa Enyɛnpe Ebɔrɛ na, mo alɛ beeŋ baa wɔ menyi kutɔ saŋkikɛ. Men baa fin mo, menyeeŋ wu mo, ama nɛ men baŋ pal kaman n sa mo bre, mo alɛ beeŋ yige menyi to.

³ Israɛlebi na daŋ yige keshuŋ kashenteŋ be Ebɔrɛ na n chɛr ga. B daa maŋ naa kɔ bɔrɛmatapoana nɛ baa ŋini bumo Ebɔrɛ be akpa. Amoso b daa maŋ naa bɛ Ebɔrɛ be mbra so.

⁴ Ama saŋkama nɛ b luri tɔrɔ to baa fin Enyɛnpe Israɛl be Ebɔrɛ na nna nsaa wu mo.

⁵ Loŋ be jemanɛ na so, esa kikɛ daa maaŋ tiŋ n nite yɛlyɛla so ŋkpal manɛ so kena daŋ baa wɔ kaplɛkama nna.

⁶ Efuliana kikɛ daŋ baa mɛaŋ abar nna nɛ ndegboŋana na gba bee mɛaŋ abar ŋkpal Ebɔrɛ ka daa bar awurfoŋ nɛ etɔrɔ bumo so na so.

⁷ Ama menyi ere e baa kɔ eleŋ nsaa maa pɔ aba ŋkpal manɛ so menyi be kushuŋ nɛ menyee wora na beeŋ bar tɔnɔ.”

⁸ Ewura Asa ka nu kewuŋkaŋɛ nɛ Odɛd pibinyɛn Azariya kaŋɛ na, nɛ e nya keleŋto. E daŋ mur agbir nɛ a wɔ Juda nɛ Bɛnjamin be kasawule so nna nɛ amo nɛ a wɔ nde nɛ e kɔ n sɔ Efrayim be abee be efuli so na kikɛ. E daŋ lɔŋɛ Enyɛnpe Ebɔrɛ be bɔrɛsure nɛ k daa yil bɔrɛlambu na be kelɔnɛ so ashi Jerusalɛm na gba nna m pɔr.

⁹ Basa damta nɛ b shi Efrayim nɛ Manase nɛ Simiɔn be kasawule so daŋ ba ka wɔ ewura Asa be kasawule so nna ŋkpal b ka wu Enyɛnpe Ebɔrɛ na ka wɔ mo kutɔ so. Ewura Asa daŋ tre bumo nɛ Juda nɛ Bɛnjamin be basa kikɛ nna m ba abar so.

¹⁰ Asa be kuwurji be kafɛ kuduanusopo be kufɔl sasopo to nɛ bumo kikɛ ba shɛr Jerusalɛm to.

¹¹ Kumo be kamɔnchɛ nɛ b daŋ ta asɔ nɛ b daŋ muu kena to ashi Gɛra na m ba lara sarga n sa Enyɛnpe Ebɔrɛ. Asɔ na e daa la ana alfa ashunu nɛ mbolpɔ nɛ mboe ŋgboŋ ashunu.

¹² B daŋ nase nnɔ nna n sa abar a laŋɛ kananɛ baaŋ ta bumo be ŋgbene nɛ ayoyu kikɛ a bunyaŋ bumo nananyɛnana be Ebɔrɛ na.

¹³ B yɛ a daga b ka mɔ ekama nyam nna, kebia, ŋko enimu ŋko enyɛn ŋko eche nɛ e maa bunyaŋ Enyɛnpe Ebɔrɛ na nna.

¹⁴ B daŋ bɔ ntaŋ Enyɛnpe Ebɔrɛ be ketre to awɔrso nna fanɛ baaŋ bɛ kɔnɔ naseso nɛ b nase na so kpakpa nsaa foŋ mbel a cha awɔr nsaa ji bumo be eyur.

¹⁵ Juda be basa kikɛ be ŋgbene daŋ fuli bumo nna ŋkpal b ka ta bumo be ŋgbene kikɛ n nase nnɔ n sa abar na so. Saŋkama nɛ baa bunyaŋ Ebɔrɛ, bumo be ŋgbene daa fuli bumo nna ŋkpal e ka daŋ sɔ bumo nseŋ sa bumo kagbenewushi ashi kusɔ kama to so.

¹⁶ Ewura Asa mo nanache Maaka daŋ yuu kedibi nna a shuŋ kegbirche nɛ baa tre Ashira na nɛ ewura Asa tia kumo ŋ kuya to n chɔɔ ashi Kidrɔn be ketaŋɛ to. Ŋkpal kusɔ nɛ Maaka wora na so nɛ ewura Asa lara mo ashi eyilikpa nɛ e daa kɔ efuli na so to.

¹⁷ Kashenteŋ nna fanɛ ewura Asa daa maŋ tiŋ m mur agbirana kikɛ ashi Israɛl be kasawule so, ama mbe ŋkpa kikɛ to e daŋ ji kashenteŋ nna n sa Ebɔrɛ.

¹⁸ E daŋ ta asɔ nɛ mo tuto Abija daŋ ta m bɔɔ Enyɛnpe Ebɔrɛ enɔ na nna, nɛ gbiti nɛ shuwa be asɔ nɛ mo alɛ gbagba ta m bɔɔ Ebɔrɛ enɔ na kikɛ n wɔtɔ bɔrɛlambu na to.

¹⁹ B daa maŋ naŋ kɔ kena kikɛ hale n ya fo Asa be kuwurji be nfɛ adesa nɛ anu.